நுரையீரலில் உள்ள அழுக்குகளை வெளியேற்றி, அதன் ஆரோக்கியத்தை மேம்படுத்தும் உணவுகள்!

முட்டைக்கோஸ், ப்ராக்கோலி, கேல்

இந்த காய்கறிகள் நுரையீரலை சுத்தம் செய்ய உதவும். ஏனெனில் இந்த காய்கறிகளில் சல்பர் மற்றும் ஆன்டி-ஆக்ஸிடன்ட்டுகள் அதிகம் உள்ளதால், இவற்றை அடிக்கடி உட்கொள்ளும் போது, நுரையீரல் மற்றும் உடலின் மூலை முடுக்குகளில் உள்ள டாக்ஸின்கள் அனைத்தும் வெளியேறிவிடும். ஆகவே உங்கள் நுரையீரலை சுத்தமாகவும் ஆரோக்கியமாகவும் வைத்துக் கொள்ள இந்த காய்கறிகளை வாரத்திற்கு 3 முறையாவது சேர்த்துக் கொள்ளுங்கள்.

கரோட்டினாய்டு உணவுகள்

கேரட், குடைமிளகாய் போன்றவற்றில் கரோட்டினாய்டு அதிகம் உள்ளது. இது உடலினுள் செல்லும் போது வைட்டமின் ஏ-வாக மாறும். மேலும் வைட்டமின் ஏ ஆஸ்துமா பிரச்சனையை சரிசெய்வதாக ஆய்வில் நிரூபிக்கப்பட்டுள்ளது. எனவே இந்த உணவுகளை அடிக்கடி உட்கொண்டு, உங்கள் நுரையீரலின் ஆரோக்கியத்தை மேம்படுத்திக் கொள்ளுங்கள்.

ஒமேகா-3 உணவுகள்

ஒமேகா-3 ஃபேட்டி ஆசிட் சுவாச மண்டலத்திற்கு மிகவும் நல்லது. உங்களுக்கு சுவாச பிரச்சனைகள் இருந்தால், ஒமேகா-3 ஃபேட்டி ஆசிட் நிறைந்த மீன், வால்நட்ஸ், ஆளி விதை போன்றவற்றை உட்கொண்டு வாருங்கள். இதனால் சுவாச பிரச்சனைகளான ஆஸ்துமா, மூச்சுத்திணறல் போன்றவற்றில் இருந்து விரைவில் குணமாகலாம்.

ஃபோலேட் உணவுகள்

ஃபோலேட் நிறைந்த உணவுகள் நுரையீரல் புற்றுநோயில் இருந்து விடுபட உதவுவதாக ஆய்வுகளில் நிரூபிக்கப்பட்டுள்ளது. அதிலும் நீங்கள் புகைப்பிடிப்பவராக இருந்தால், ஃபோலேட் உணவுகளான அஸ்பாரகஸ், பசலைக்கீரை, பீட்ரூட் போன்றவற்றை அதிகம் உட்கொண்டு வாருங்கள். இதனால் நுரையீரலின் ஆரோக்கியத்தைப் பாதுகாக்க முடியும்.

பூண்டு

உணவுப் பொருட்களிலேயே பூண்டை விட சிறந்தது வேறு எதுவும் இல்லை. ஏனெனில் இதில் மற்ற காய்கறிகளை விட ஆன்டி-ஆக்ஸிடன்ட்டுகள் ஏராளமாக நிறைந்திருப்பதோடு, சொல்ல முடியாத அளவில் மருத்துவ குணங்களையும் கொண்டுள்ளது. எனவே உங்களின் நுரையீரலை சுத்தமாக வைத்துக் கொள்ள நினைத்தால் பூண்டை அன்றாட உணவில் சேர்த்து வாருங்கள்.

வைட்டமின் சி உணவுகள்

வைட்டமின் சி நிறைந்த உணவுகள், நுரையீரலானது மற்ற உறுப்புகளுக்கு ஆக்ஸிஜனை எவ்வித தடையுமில்லாமல் அனுப்ப உதவும். இத்தகைய வைட்டமின் சி சத்தானது, சிட்ரஸ் பழங்களான ஆரஞ்சு, எலுமிச்சை, திராட்சையிலும், குடைமிளகாயிலும் ஏராளமான அளவில் நிறைந்துள்ளது. எனவே இந்த உணவுகளை அடிக்கடி அதிகம் உட்கொண்டு வந்து, உங்கள் நுரையீரலைப் பாதுகாத்துக் கொள்ளுங்கள்.