உங்க வீட்டு சிலிண்டரில் எவ்வளவு கேஸ் மிச்சமிருக்குனு தெரியணுமா? இதை பண்ணுங்க... சரியா கண்டுபிடிச்சிரலாம்...!

கடந்த சில நாட்களாக இந்தியாவில் LPG சிலிண்டர் தட்டுப்பாடு மிகப்பெரிய பிரச்சினையாக மாறிவருகிறது. ஈரான்-அமெரிக்க இடையே நடைபெற்று வரும் மோதலால் பல்வேறு உலக நாடுகளில் குறிப்பாக இந்தியாவில் எரிவாயு தட்டுப்பாடு ஏற்பட்டுள்ளது. நமது அன்றாட வாழ்வில் பிரிக்க முடியாத ஒன்றாக மாறிவிட்ட கேஸ் சிலிண்டரில் தட்டுப்பாடு ஏற்பட்டிருப்பது நமது வாழ்க்கையை வெகுவாக பாதித்துள்ளது என்பது மறுக்க முடியாதது.

தற்போது வீட்டு உபயோக சிலிண்டர் புக் செய்தால் வருவதற்கு 25 நாட்கள் ஆகும் என்று நிர்ணயிக்கப்பட்டுள்ளது. இந்த நேரத்தில் திடீரென்று சமைக்கும் போது கேஸ் சிலிண்டர் தீர்ந்து போய்விட்டால் என்ன செய்வது? உங்கள் கேஸ் சிலிண்டர் காலியாகப் போவதை பொதுவாக தெரிந்து கொள்ள முடியாது என்று கூறுவார்கள், ஆனால் உண்மையில் கேஸ் சிலிண்டர் தீரப்போவதை சில வழிகள் மூலம் துல்லியமாக தெரிந்து கொள்ளலாம்.

நெருப்பின் நிறத்தைக் கவனிப்பது அல்லது சிலிண்டரின் எடையைச் சோதிப்பது போன்ற பாரம்பரிய முறைகள் எப்போதும் நம்பகமானவையாக இருக்காது என்றாலும், வேறுசில வழிகள் மூலம் சிலிண்டர் தீரப்போவதை முன்கூட்டியே கணித்து விடலாம். அவை எந்தெந்த வழிகள் என்று இந்த பதிவில் தெரிந்து கொள்ளலாம்.

ஈரத்துணி மூலம் தெரிந்து கொள்ளலாம்

கேஸ் சிலிண்டரைச் சுற்றி ஈரமான துணியைச் சுற்றி வையுங்கள், அது கிட்டதட்ட ஒரு நிமிடம் அப்படியே இருக்கட்டும். பின்னர், துணியை அகற்றி, அடுத்த சில நிமிடங்களுக்கு சிலிண்டரை உன்னிப்பாகக் கவனிக்கவும். உலர்ந்த பகுதி சிலிண்டரின் உள்ளே காலியான இடத்தைக் குறிக்கும், அதே நேரத்தில் ஈரமான பகுதி வாயு இருப்பதைக் குறிக்கும், இதனால் அந்த பகுதி குளிர்ச்சியாகவும், விரைவில் உலர்த்துவது கடினமாகவும் இருக்கும். மீதமுள்ள கேஸ் சிலிண்டரின் அளவைத் தீர்மானிப்பதற்கான துல்லியமான முறையாக இது விளங்குகிறது.

தொடு உணர்வு சோதனை

கேஸ் சிலிண்டரில் மீதமிருக்கும் வாயுவின் அளவைச் சரிபார்க்கப் புலன் சார்ந்த ஒரு அணுகுமுறையும் உள்ளது. சிலிண்டரில் உள்ள வாயு குளிர்ந்த நிலையிலேயே இருப்பதால், சிலிண்டரின் ஒரு பக்கமாகச் சிறிது வெதுவெதுப்பான நீரை ஊற்றவும். பின்னர் தண்ணீர் ஊற்றப்பட்ட பகுதியின் மீது உங்கள் விரலை மெதுவாக நகர்த்திச் செல்லவும். உங்கள் விரலில் குளிர்ச்சியை உணரும் இடமே, சிலிண்டரில் தற்போதுள்ள வாயுவின் அளவைக் குறிக்கும். இந்த தொடு உணர்வு முறை மூலம் எளிதில் சிலிண்டரில் மீதமுள்ள அளவை உங்களால் மதிப்பிட இயலும்.

சாக்பீஸ் முறை

ஒரு சாக்பீஸைப் பயன்படுத்தி சிலிண்டரின் மேலிருந்து கீழ்வரை ஒரு நீண்ட கோட்டை வரையவும். அந்தக் கோட்டின் எந்தப் பகுதி ஈரமாகவே இருக்கிறதோ, அதுவரை எரிவாயு நிரம்பியிருப்பதை அது குறிக்கும். கோட்டின் உலர்ந்த பகுதி, உருளையின் காலியான பகுதியைச் சுட்டிக்காட்டுகிறது. எரிவாயு எப்போது தீரப்போகிறது என்பதை அறிந்துகொள்ள இந்த மிகவும் எளிய வழியாகும்.

நெருப்பின் நிறம்

இந்த முறையின் மூலம், மீதமுள்ள எரிவாயுவின் துல்லியமான அளவை உங்களால் அறிய இயலாது; இருப்பினும், இது நிச்சயமாக உங்களுக்கு ஒரு முன்னெச்சரிக்கையை அளிக்கும். நெருப்பின் நிறம் நீலமாக இருந்தால், அது போதுமான அளவு எரிவாயு இருப்பதையும், அதன் அழுத்தம் சீராக இருப்பதையும் அது குறிக்கிறது. மாறாக, நெருப்பின் நிறம் மஞ்சள் அல்லது ஆரஞ்சு நிறத்தில் தென்பட்டால், அது எரிவாயு தீரும் நிலையில் இருப்பதை உணர்த்துகிறது. பர்னரில் உள்ள எரிவாயுவின் அழுத்தம் குறைவதாலும், எரிவாயுவில் கலந்திருக்கும் மாசுக்கள் எரியத் தொடங்குவதாலும் இந்த நிற மாற்றம் ஏற்படுகிறது.

எடையை வைத்துக் கண்டறிதல்

உங்கள் வீட்டில் எடை பார்க்கும் கருவி இருந்தால், எரிவாயுவின் அளவை மிகவும் துல்லியமாக அறிந்துகொள்ள முடியும். ஒவ்வொரு LPG சிலிண்டரிலும், அது காலியாக இருக்கும்போதுள்ள எடை குறிக்கப்பட்டிருக்கும், இது 'டேர் எடை' (Tare Weight) என்று அழைக்கப்படுகிறது. முதலில், சிலிண்டரை எடை பார்க்கும் கருவியின் மீது வைத்து, அதன் மொத்த எடையைக் குறித்துக்கொள்ளுங்கள். பின்னர், அந்த மொத்த எடையிலிருந்து 'டேர் எடை'யைக் கழித்துவிடுங்கள். இதன் மூலம் கிடைக்கும் எடையே, சிலிண்டருக்குள் மீதமுள்ள எரிவாயுவின் எடையாகும். பொதுவாக வீட்டு உபயோக சிலிண்டரில் சுமார் 14.2 கிலோ எரிவாயு நிரப்பப்பட்டிருக்கும். இந்த அளவின் அடிப்படையில், நீங்கள் எவ்வளவு எரிவாயுவைப் பயன்படுத்தியுள்ளீர்கள் என்பதையும், எவ்வளவு மீதமுள்ளது என்பதையும் தெரிந்து கொள்ள முடியும்.