ஹிமாலயன் வயகரா என்று அழைக்கப்படும் இந்த காளானின் விலை எவ்வளவுனு தெரிஞ்சா மயக்கமே வந்துரும்...

உலகின் மிகவும் காஸ்ட்லியான மசாலாப் பொருள் எதுவென்றால் பெரும்பாலான மக்கள் குங்குமப்பூ என்று கூறுவார்கள். ஆனால் இந்தியாவில் கிடைக்கும் ஒரு பொருள் உலகின் மற்ற அனைத்து மசாலாப் பொருட்களையும் விட பல மடங்கு விலையுயர்ந்தது என்றால் உங்களால் நம்ப முடியுமா? இது இமயமலையிலிருந்து நேராக வருகிறது.

அந்த காஸ்ட்லியான பொருள் கம்பளிப்பூச்சி காளான் என்று பிரபலமாக அறியப்படும் யார்ட்சா குன்புதான். நாம் பொதுவாக காளானை ஒரு பாக்ஸ் 60 ரூபாய் கொடுத்து வாங்குகிறோம், ஆடம்பரமான ஆசிய உணவகங்களில் ஷிடேக் காளான்கள் ஒரு கிலோவுக்கு சுமார் ₹1,650 என்ற விலையிலும் விற்கப்படும் நிலையில், யார்ட்சா குன்பு என்பது பணக்காரர்களையே வாங்குவதற்கு பயப்பட வைக்கும் விலையில் விற்கப்படுகிறது. ஒரு கிலோ ₹15 லட்சத்திற்கு விற்கப்படும் இந்த காளானை வைத்து பல சவரன் தங்கம் அல்லது ஒரு ஆடம்பர காரையே வாங்கி விடலாம்.

5,000 மீட்டர் உயரத்தில் வளரும் கம்பளிப்புழு காளான்

காளான்கள் அவற்றிலுள்ள வைட்டமின் டி, அதிக புரதம் மற்றும் நீர்ச்சத்து ஆகியவற்றிற்காக ஏற்கனவே பெரிதும் விரும்பப்படுகின்றன. ஆனால் யார்ட்சா குன்பு காளான்களின் விலையையும், தரத்தையும் அடுத்த லெவலுக்கு எடுத்துச் செல்கிறது. பூட்டான், திபெத், நேபாளம் மற்றும் இந்தியாவின் உயரமான இமயமலைப் பகுதிகளில் வளரும் இந்த விசித்திரமான காளான், ஒரு திகிலூட்டும் வரலாற்றைக் கொண்டுள்ளது. இது ஒரு கம்பளிப்புழுவிலிருந்து வளர்கிறது. ஆம், இந்தக் காளான் அந்தப் பூச்சியின் உடலுக்குள் ஊடுருவி, உள்ளிருந்து மெதுவாகச் செரித்து, அந்தப் பூச்சியை ஒரு சிறிய மம்மி செய்யப்பட்ட கம்பளிப்புழுவைப் போல மாற்றி, பின்னர் தரைக்கு மேலே முளைக்கிறது.

மருத்துவ அதிசயம்

இந்த காளான்களின் வியக்கத்தக்க தோற்றம் மற்றும் மிக உயர்ந்த விலையைத் தாண்டி, 'யார்ட்சா குன்பு' அதன் அற்புதமான மருத்துவ குணங்களுக்காக மிகவும் புகழ்பெற்றது. சீன மற்றும் திபெத்திய மருத்துவ முறைகளில், இது நுரையீரல் மற்றும் சிறுநீரகங்களை வலுப்படுத்துவதாகவும், வீரியமிக்க இயற்கை வயகராவாகவும் செயல்படுவதாகவும் நம்பப்படுகிறது. இதன் பெருமை 15-ஆம் நூற்றாண்டைச் சேர்ந்த 'காமத்தூண்டும் குணங்களின் பெருங்கடல்' (An Ocean of Aphrodisiacal Qualities) எனும் திபெத்திய மருத்துவ நூலிலேயே குறிப்பிடப்பட்டுள்ளது. இன்று, இது வெறும் மருந்தாக மட்டுமல்லாமல், பணக்காரர்களுக்கான ஒரு ஆடம்பரப் பொருளாகவும் திகழ்கிறது. இது பெரும்பாலும் இறைச்சி, வாத்து அல்லது கோழி உணவுகளுடன் சேர்த்து பரிமாறப்படுகிறது அல்லது பொடியாக்கப்பட்டு தேநீரில் கலந்து பருகப்படுகிறது.

இந்த காளானுக்காக ஏன் தேடுதல் வேட்டை நடைபெறுகிறது?

யார்ட்சா குன்புவைத் தேடுவது என்பது மிகவும் கடினமான செயலாகும். சேகரிப்பாளர்கள் 3,000 முதல் 5,000 மீட்டர் உயரத்திலுள்ள கரடுமுரடான மலைப் பாதைகளில் பயணம் செய்து, தரையில் அந்தக் காளான்களை உன்னிப்பாகத் தேடுகிறார்கள். அதன் அரிதான தன்மை, அயல்நாட்டுத் தோற்றம் மற்றும் அதன் சக்திகளைச் சுற்றியுள்ள புராணக் கதைகள் ஆகியவை இதை உலகின் மிகவும் விலையுயர்ந்த மற்றும் விரும்பத்தக்க காளான்களில் ஒன்றாக மாற்றுகிறது. இதை வைத்திருப்பது அல்லது பரிமாறுவது என்பது வெறும் சுவைக்காக மட்டுமல்ல, அது செல்வம் மற்றும் தனித்துவத்தின் ஒரு வெளிப்பாடாகும்.

யார்ட்சா குன்புவின் முக்கியத்துவம்

உணவுப் பிரியர்களின் ஆர்வம் கொண்ட தேடலோ அல்லது மூலிகை மருத்துவத்தில் ஈடுபாடு கொண்டவர்களின் ஆர்வமோ எதுவாக இருந்தாலும், 'யார்ட்சா குன்பு' பழங்கால மரபுகளையும் நவீன கால ஆடம்பர உணவுகளையும் இணைக்கிறது. இந்த ஆடம்பர காளானை தேடிச்செல்பவர்களில் குறிப்பிட்ட எண்ணிக்கையிலான நபர்கள் உயிரிழக்கிறார்கள் என்பது துரதிர்ஷ்டவசமானது.