சப்பாத்திக்கு ஏற்ற வெஜிடேபிள் வெள்ளை குருமா - எப்படி செய்றது-ன்னு பாத்து செஞ்சு பாருங்க..

Vegetable Soya White Kurma Recipe In Tamil: இரவு நேரத்தில் உங்கள் வீட்டில் பெரும்பாலும் சப்பாத்தி தான் டின்னராக இருக்குமா? அந்த சப்பாத்திக்கு எப்போதும் ஒரே சுவையில் தான் சைடு டிஷ் செய்வீர்களா? அப்படியானால் ஒருமுறை சற்று வித்தியாசமான சுவையில் ஒரு சைடு டிஷ் செய்யுங்கள்.

அதுவும் வீட்டில் கேரட், பீன்ஸ், உருளைக்கிழங்கு, மீல் மேக்கர் இருந்தால், அவற்றைக் கொண்டு வெள்ளை குருமா செய்யுங்கள். இந்த வெஜிடேபிள் வெள்ளை குருமாவை செய்தால், வீட்டில் உள்ளோர் வழக்கமாக சாப்பிடுவதை விட சற்று அதிகமாக சாப்பிடுவார்கள். முக்கியமாக இந்த குருமாவை செய்வது மிகவும் சுலபம். பேச்சுலர்களும், வேலைக்கு செல்பவர்களும் இப்படியான சைடு டிஷ்ஷை தெரிந்து வைத்துக் கொள்வது நல்லது.

உங்களுக்கு வெஜிடேபிள் சோயா வெள்ளை குருமாவை எப்படி செய்வதென்று தெரிந்து கொள்ள வேண்டுமா? கீழே வெஜிடேபிள் சோயா வெள்ளை குருமா ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

* எண்ணெய் - 2 டேபிள் ஸ்பூன்
* சோம்பு - 1 டீஸ்பூன்
* ஏலக்காய் - 2
* கிராம்பு - 2
* அன்னாசிப்பூ - 1
* பட்டை - 1 துண்டு
* பிரியாணி இலை - 1
* கல்பாசி - 1
* பெரிய வெங்காயம் - 1 (பொடியாக நறுக்கியது)
* கேரட் - 1 (நறுக்கியது)
* பீன்ஸ் - 3 (நறுக்கியது)
* உருளைக்கிழங்கு - 1 (நறுக்கியது)
* மீல்மேக்கர் - 1/2 கப் (5 நிமிடம் சுடுநீரில் ஊற வைத்தது)
* உப்பு - சுவைக்கேற்ப
* துருவிய தேங்காய் - 1/2 கப்
* இஞ்சி - 1 சிறிய துண்டு
* பூண்டு - 5 பல்
* முந்திரி - 10
* கசகசா - 1 டீஸ்பூன்
* பச்சை மிளகாய் - 2
* கொத்தமல்லி - சிறிது
* புதினா - சிறிது
* தண்ணீர் - தேவையான அளவு

செய்முறை:

* முதலில் குக்கரை அடுப்பில் வைத்து, அதில் எண்ணெய் ஊற்றி சூடானதும், சோம்பு, ஏலக்காய், கிராம்பு, அன்னாசிப்பூ, பட்டை, பிரியாணி இலை, கல்பாசி ஆகியவற்றை சேர்த்து தாளிக்க வேண்டும்.
* பின் அதில் பொடியாக நறுக்கிய வெங்காயத்தை சேர்த்து கண்ணாடி பதத்திற்கு வதக்க வேண்டும்.
* பின்பு அதில் நறுக்கிய கேரட், பீன்ஸ், உருளைக்கிழங்கு சேர்த்து 2 நிமிடம் வதக்க வேண்டும்.
* அடுத்து அதில் 5 நிமிடம் சுடுநீரில் ஊற வைத்து பிழிந்த மீல் மேக்கரை சேர்த்து, சுவைக்கேற்ப உப்பு தூவி நன்கு கிளறி விட வேண்டும்.
* பிறகு மிக்சர் ஜாரில் துருவிய தேங்காய், இஞ்சி, பூண்டு, முந்திரி, கசகசா, பச்சை மிளகாய் சேர்த்து, சிறிது நீரை ஊற்றி நன்கு மென்மையாக அரைத்துக் கொள்ள வேண்டும்.
* அதன் பின் அரைத்த விழுதை குக்கரில் உள்ள காய்கறிகளுடன் சேர்த்து, தேவையான அளவு நீரை ஊற்றி கிளறி, சுவைக்கேற்ப உப்பு சேர்த்து கிளறி, குக்கரை மூடி 3 விசில் விட்டு இறக்க வேண்டும்.
* விசில் போனதும் குக்கரைத் திறந்து, அதில் பொடியாக நறுக்கிய சிறிது கொத்தமல்லி மற்றும் புதினாவை சேர்த்து கிளறினால், சுவையான வெஜிடேபிள் சோயா வெள்ளை குருமா தயார்.