4 வெங்காயம் இருந்தா.. இட்லிக்கு இப்படி சட்னி செய்யுங்க.. வீட்டுல எல்லாரும் 2 இட்லி எக்ஸ்ட்ரா சாப்பிடுவாங்க..

Vengaya Chutney Recipe In Tamil: காலையில் உங்கள் வீட்டில் இட்லி தான் செய்யப் போகிறீர்களா? அந்த இட்லிக்கு என்ன சட்னி செய்வதென்று யோசித்துக் கொண்டிருக்கிறீர்களா? தேங்காய் சட்னி, தக்காளி சட்னி, கார சட்னி செய்து போரடித்துவிட்டதா? சிம்பிளாக அதே சமயம் ருசியான சட்னி செய்ய வேண்டுமா?

அப்படியானால் வெங்காய சட்னியை செய்யுங்கள். அதுவும் இந்த பக்குவத்தில் வெங்காய சட்னியை செய்யும் போது வீட்டில் உள்ளோர் வழக்கத்தை விட அதிகமாக சாப்பிடுவார்கள். மேலும் ஒருமுறை இந்த சட்னியை செய்தால், அடிக்கடி செய்ய சொல்லி கேட்பார்கள்.

உங்களுக்கு வெங்காய சட்னியை எப்படி செய்வதென்று தெரிந்து கொள்ள வேண்டுமா? கீழே வெங்காய சட்னி ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

* எண்ணெய் - 3 டேபிள் ஸ்பூன்
* கடுகு - 1/4 டேபிள் ஸ்பூன்
* உளுத்தம் பருப்பு - 1/2 டேபிள் ஸ்பூன்
* கடலைப் பருப்பு - 4 1/4 டேபிள் ஸ்பூன்
* வரமிளகாய் - 5
* புளி - சிறிய எலுமிச்சை அளவு
* பெருங்காயத் தூள் - 1 டீஸ்பூன்
* பெரிய வெங்காயம் - 4 (நறுக்கியது)
* உப்பு - சுவைக்கேற்ப
* கறிவேப்பிலை - 1 கைப்பிடி
* புதினா - 1 கைப்பிடி
* கொத்தமல்லி - 1 கைப்பிடி
* தண்ணீர் - சிறிது

தாளிப்பதற்கு...

* எண்ணெய் - 2 டேபிள் ஸ்பூன்
* கடுகு - 1/2 டீஸ்பூன்
* உளுத்தம் பருப்பு - 1/2 டீஸ்பூன்
* வரமிளகாய் - 1
* கறிவேப்பிலை - 1 கொத்து

செய்முறை:

* முதலில் ஒரு வாணலியை அடுப்பில் வைத்து, அதில் எண்ணெய் ஊற்றி சூடானதும், கடுகு, உளுத்தம் பருப்பு சேர்த்து பொரிய விட வேண்டும்.
* பின்பு அதில் கடலைப் பருப்பை சேர்த்து வறுக்க வேண்டும்.
* அதன் பின் அதில் வரமிளகாய், புளி, பெருங்காயத் தூள் சேர்த்து நன்கு வதக்க வேண்டும்.
* பிறகு அதில் நறுக்கிய வெங்காயம் மற்றும் சுவைக்கேற்ப உப்பு சேர்த்து, வெங்காயம் கண்ணாடி பதத்திற்கு வரும் வரை வதக்க வேண்டும்.
* பின்னர் அதில் கறிவேப்பிலை, புதினா, கொத்தமல்லி சேர்த்து 1 நிமிடம் வதக்கி இறக்கி குளிர வைக்க வேண்டும்.
* பின்பு மிக்சர் ஜாரில் வதக்கிய பொருட்களை சேர்த்து கொரகொரவென்று அரைத்துக் கொள்ள வேண்டும்.
* பின் அரைத்த சட்னியை கிண்ணத்தில் எடுத்துக் கொண்டு, சிறிது நீரை ஜாரில் ஊற்றி அலசி சேர்த்து கலந்து கொள்ள வேண்டும்.
* இறுதியாக ஒரு வாணலியை அடுப்பில் வைத்து, அதில் தாளிப்பதற்கு எண்ணெய் ஊற்றி சூடானதும், கடுகு, உளுத்தம் பருப்பு, வரமிளகாய், கறிவேப்பிலை சேர்த்து தாளித்து, சட்னியுடன் சேர்த்து கலந்தால், சுவையான வெங்காய சட்னி தயார்.