சிம்புவின் மிரள வைக்கும் புதிய தோற்றம்.. உடல் எடையைக் குறைக்க என்ன செய்தார் தெரியுமா?

101 கிலோ எடை

கடந்த சில வருடங்களில் சிம்பு அதிக வெயிட் போட்டு 101 கிலோ உடல் எடையை கொண்டிருந்தார் நடிகர் சிம்பு. கட்டுமஸ்தாக இருந்த சிம்பு இவ்வளவு உடல் எடை அதிகரிப்பதை பார்த்து சமூக வலைதளங்களில் பலர் கிண்டல் செய்தனர். எடை அதிகரிப்பால் சிம்புவின் மார்க்கெட் குறைந்துவிட்டதாகவும் கூறப்பட்டது.

ஈஸ்வரன் படத்திற்காக 71 கிலோவான சிம்பு

இந்நிலையில், கடந்த ஆண்டு இயக்குனர் சுசீந்திரன் இயக்கத்தில் உருவான ஈஸ்வரன் திரைப்படத்திற்காக சிம்பு அவரது உடல் எடையை 101 கிலோவிலிருந்து 71 கிலோவாக குறைத்தார். இது தொடர்பான வீடியோ சமூகவலைதளங்களில் வைரலானது. சுமார் 30 கிலோ எடையை குறைத்து மிகவும் இளமையாக நல்ல உடல் எடையை கொண்ட சிம்பை திரையில் பார்த்து அவரது ரசிகர்கள் கொண்டாட்டம் அடைந்தனர். எடை குறைப்பிற்கான கடின உழைப்பு பலரையும் வியக்க வைத்தது.

மீண்டும் 15 கிலோ எடையை குறைத்த சிம்பு

கெளதம் மேனனின் ‘வெந்து தணிந்தது காடு' படத்திற்காக நடிகர் சிம்பு தற்போது 15 கிலோ எடையைக் குறைத்துள்ளார். இப்படத்தின் படப்பிடிப்பு கடந்தவாரம் திருச்செந்தூரில் தொடங்கியது. படத்தின் ஃபர்ஸ்ட் லுக் போஸ்டரும் கவனம் ஈர்த்தது. ஏனெனில், இப்படத்தில் சிறுவயது தோற்றத்திற்காக சிம்பு 15 கிலோ எடையைக் குறைத்துள்ளார். ‘சிம்புவா இது' என்று ஆச்சர்யப்படும் அளவுக்கு தற்போது உடல் மெலிந்து உண்மையிலேயே 16 அல்லது 17வயது சிறுவனின் தோற்றத்தை கொண்டு வந்துள்ளார். படக்குழு வெளியிட்டுள்ள இந்தப் புகைப்படம் தற்போது சமூக வலைதளங்களில் வைரலாகிக் கொண்டிருக்கிறது.

அதிகாலையில் நடைப்பயிற்சி

தனது உடல் எடையை குறைக்க சிம்பு கடின முயற்சிகளை மேற்கொண்டிருந்தார். அதிகாலை 4.30 மணிக்கு எழுந்து நடைபயிற்சி செய்வார். அதன் பிறகு ஜிம்மிற்கு வந்து ஒர்க்அவுட் செய்வார். பல்வேறு பயிற்சிகளை தொடர்ந்து செய்துகொண்டே இருந்தார். ஒரே பயிற்சிகளை மட்டுமல்லாமல் வெவ்வேறு பயிற்சிகளையம் அவர் மேற்கொண்டார்.

உணவு கட்டுப்பாடு

ஜங்க் ஃபுட் மற்றும் அசைவ உணவுகள் சாப்பிடுவதை சிம்பு சுத்தமாக தவிர்த்துவிட்டார். அல்கலைன் நிறைந்த உணவுகளையும், அதிக ஊட்டச்சத்து மிகுந்த உணவுகளைதான் தொடர்ந்து எடுத்துக்கொண்டார். அதிக மாவுச்சத்து நிறைந்த உணவுகளையும் தவிர்த்தார். அதே சமயங்களில் திரவ உணவுகளையும் அவர் எடுத்துக்கொண்டார். மேலும், அவருக்கு தேவையான உணவை அவரே சமைத்து சாப்பிட ஆரம்பித்தார்.

விளையாட்டிலும் ஆர்வம்

சிம்புவுக்கு விளையாட்டு என்றால் மிகவும் பிடிக்குமாம். உடல் எடையை குறைக்க உடற்பயிற்சி செய்வது மட்டுமல்லாமல் டென்னிஸ், பாக்ஸிங், நீச்சல், பேஸ்கட்பால் போன்ற விளையாட்டுகளிலும் அவர் ஈடுபட்டாரம்.

இறுதிகுறிப்பு

உடல் எடையை குறைப்பது என்பது மிகவும் சவாலான பணி. உணவு கட்டுப்பாடுகள், உடற்பயிற்சி மற்றும் வாழ்க்கை முறை மாற்றங்கள் அனைத்தும் செய்யும்போது, நமது உடல் எடை குறைய ஆரம்பிக்கிறது. இவற்றை முழுவதாக பின்பற்றுவதுதான் எடை இழப்பு பயணத்தின் முக்கிய பணி. சிம்பு படத்திற்காகவோ, மற்றவர்களுக்கு நிரூபிக்கவோ தன் உடல் எடையை குறைக்கவில்லையாம். தான் கஷ்டப்பட்டபோது தனக்கு ஆதரவாக இருந்த ரசிகர்கள் மற்றும் தன் நலம் விரும்பிகளுக்காக எடையை குறைத்துள்ளதாக அவர் கூறுகிறார்.