1 பீர்க்கங்காயும், 4 முட்டையும் இருந்தா.. இப்படி பொரியல் செய்யுங்க.. டேஸ்ட் தாறுமாறா இருக்கும்..

Posted By:

Peerkangai Egg Poriyal Recipe In Tamil: இதுவரை நீங்கள் பீர்க்கங்காயைக் கொண்டு கிரேவி, பிரட்டல், பொரியல் என்று செய்து சாப்பிட்டிருப்பீர்கள். அதுவும் பொரியலைத் தான் அடிக்கடி செய்வீர்களானால், அதை எப்போதும் ஒரே மாதிரி செய்யாமல், சற்று வித்தியாசமாக அத்துடன் முட்டை சேர்த்து பொரியல் செய்யுங்கள். இப்படி முட்டை சேர்த்து பீர்க்கங்காய் பொரியலை செய்யும் போது, சுவை பிடிமாதமாக இருக்கும். குறிப்பாக டயட்டில் இருப்பவர்கள் சாதத்தைக் குறைக்க நினைத்தால், இந்த பொரியலை சற்று அதிகமாக செய்து சாப்பிட்டால் போதும். அதுவும் இந்த பொரியலை சாதத்துடன் மட்டுமின்றி, சப்பாத்தியுடனும் சாப்பிடலாம்.

Peerkangai Egg Poriyal How To Make Ridge Gourd Muttai Poriyal

உங்களுக்கு இந்த பீர்க்கங்காய் முட்டை பொரியலை எப்படி செய்வதென்று தெரிந்து கொள்ள வேண்டுமா? கீழே பீர்க்கங்காய் முட்டை பொரியல் ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

* தேங்காய் எண்ணெய் - 2 டீஸ்பூன்
* கடுகு - 1/2 டீஸ்பூன்
* கறிவேப்பிலை - 1 கொத்து
* பெரிய வெங்காயம் - 2 (பொடியாக நறுக்கியது)
* பச்சை மிளகாய் - 3 (இடித்தது)
* பீர்க்கங்காய் - 1
* உப்பு - சுவைக்கேற்ப
* மஞ்சள் தூள் - 1/4 டீஸ்பூன்
* முட்டை - 4

செய்முறை:

* முதலில் பீர்க்கங்காயின் தோலை நீக்கிவிட்டு, அதை சிறு துண்டுகளாக நறுக்கிக் கொள்ள வேண்டும்.
* பின்னர் ஒரு வாணலியை அடுப்பில் வைத்து, அதில் தேங்காய் எண்ணெய் ஊற்றி சூடானதும், கடுகு சேர்த்து தாளிக்க வேண்டும்.
* அதன் பின் அதில் இடித்த பச்சை மிளகாய், கறிவேப்பிலை மற்றும் பொடியாக நறுக்கிய வெங்காயத்தை சேர்த்து நன்கு வதக்க வேண்டும்.
* அடுத்து அதில் நறுக்கிய பீர்க்கங்காயை சேர்த்து, சுவைக்கேற்ப உப்பு மற்றும் மஞ்சள் தூள் சேர்த்து கிளறி, மூடி வைத்து 3-4 நிமிடம் பீர்க்கங்காயை வேக வைக்க வேண்டும்.
* பின்பு மூடியைத் திறந்து, காயை கிளறி விட்டு, அதன் மேல் 4 முட்டைகளை உடைத்து ஊற்றி மூடி, மேலே சிறிது உப்பு தூவி மூடி வைத்து 2 நிமிடம் வேக வைக்க வேண்டும்.
* பிறகு மூடியைத் திறந்து முட்டைகளை நன்கு உடைத்துவிட்டு கிளறி விட வேண்டும்.
* பீர்க்கங்காயும், முட்டையும் நன்கு ஒன்று சேர்ந்ததும், அடுப்பை அணைத்துவிட்டு இறக்கினால், சுவையான பீர்க்கங்காய் முட்டை பொரியல் தயார்.

[ of 5 - Users]
Story first published: Thursday, November 19, 2026, 14:17 [IST]
Desktop Bottom Promotion