மாதுளையை 'இப்படி' சாப்பிட்டா தொப்பை குறையுமாம்... அட இத்தன நாள் இது தெரியாம போச்சே...

எடையைக் குறைக்க மாதுளை உதவுமா?

மாதுளையில் எடை இழப்பில் முக்கிய பங்கை வகிக்கும் டயட்டரி நார்ச்சத்துக்கள், ஆன்டி-ஆக்ஸிடன்ட்டுகள், வைட்டமின்கள் மற்றும் கனிமச்சத்துக்கள் உள்ளன. எனவே மாதுளையை தினசரி உணவில் சேர்க்கும் போது, அது உடலின் மெட்டபாலிசத்தை மேம்படுத்துவதோடு, செரிமானத்தை வேகப்படுத்தி, எடை இழப்பிற்கு உதவுகிறது. எனவே நீங்கள் உங்கள் உடல் எடையை அல்லது தொப்பையைக் குறைக்க விரும்பினால் மாதுளையை அன்றாட உணவில் சேர்த்துக் கொள்ளுங்கள்.

மாதுளை எப்படி எடை இழப்பிற்கு உதவுகிறது?

நார்ச்சத்துள்ள பழம்

மாதுளையில் எடை இழப்பிற்கு மற்றும் உடல் எடையைப் பராமரிக்க உதவும் டயட்டரி நார்ச்சத்துக்கள் அதிகம் உள்ளன. 100 கிராம் மாதுளையில் 4 கிராம் நார்ச்சத்து உள்ளது. இது ஒரு நாளைக்கு வேண்டிய நார்ச்சத்தில் 16% ஆகும்.

பசியைக் கட்டுப்படுத்தும்

மாதுளையானது வயிற்றை நிரப்பி, ஒருவரது பசியைக் கட்டுப்படுத்தும். இதற்கு அதில் உள்ள நார்ச்சத்து தான் முக்கிய காரணமாக நிபுணர்கள் நம்புகின்றனர். ஆய்வுகளும், குறைவான கார்போஹைட்ரேட் மற்றும் அதிகப்படியான நார்ச்சத்து நிறைந்த உணவுகளை உண்ணும் போது, அது உண்ணும் உணவின் அளவைக் குறைத்து, ஒருவரது உடல் எடை அதிகரிப்பதை தடுப்பதாக கூறுகின்றன.

எடை இழப்பிற்கு உதவும் பாலிஃபீனால்கள்

மாதுளையில் ஏராளமான அளவில் பாலிஃபீனால்கள் உள்ளன. இவை இயற்கையாகவே கொழுப்புக்களை கரைக்கக்கூடியவை. ஆய்வுகளின் படி, பாலிஃபீனால்கள் நிறைந்த உணவுகளை தினசரி உணவில் சேர்க்கும் போது, அது எடை இழப்பிற்கு உதவுவதோடு, உடலில் கொழுப்புக்கள் தேங்குவதையும் தடுக்கின்றன.

கலோரி குறைவான பழம்

பொதுவாக எடையைக் குறைக்க வேண்டுமானால் கலோரி குறைவான உணவுகளை உண்ண வேண்டும். மாதுளையில் கலோரிகள் குறைவு. அதுவும் 100 கிராம் மாதுளையில் 83 கலோரிகளே உள்ளன. எனவே இந்த மாதுளையை தினசரி உணவில் சேர்த்து, உடற்பயிற்சிகளை தவறாமல் செய்து வரும் போது, உடல் எடை கட்டுப்பாட்டில் இருக்கும். முக்கியமாக உடல் பருமனுள்ள சர்க்கரை நோயாளிகளுக்கு மாதுளை ஒரு சிறந்த பழம்.

ஆன்டி-ஆக்ஸிடன்ட் அதிகம்

மாதுளையில் ஆன்டி-ஆக்ஸிடன்டுகள் அதிகளவில் நிறைந்துள்ளன. இவை ப்ரீ-ராடிக்கல்களை எதிர்ப்பதோடு, செல்களின் மீதான ஆக்ஸிஜனேற்ற அழுத்தத்தைக் குறைக்கிறது. ஆய்வுகளின் படி, ஆன்டி-ஆக்ஸிடன்ட் நிறைந்த உணவுகளை ஒருவர் தினமும் போதுமான அளவில் உட்கொள்ளும் போது, அது உடலில் மெட்டபாலிச அளவை அதிகரித்து, உடல் எடையைக் குறைக்க உதவுகின்றன.

உடல் எடையைக் குறைக்க மாதுளையை எப்படி உட்கொள்ள வேண்டும்?

மாதுளையை ஒருவர் மூன்று வழிகளில் தங்களின் தினசரி உணவில் சேர்க்கலாம். அதில் ஒரு கப் நற்பதமான மாதுளை விதைகளை மட்டும் சாப்பிடலாம் அல்லது மாதுளை விதைகளை தயிருடன் சேர்த்து சாப்பிடலாம். இல்லாவிட்டால், மாதுளையைக் கொண்டு ஜூஸ் தயாரித்துக் குடிக்கலாம். ஆனால் அந்த ஜூஸில் சர்க்கரை எதுவும் சேர்க்கக்கூடாது. சிறந்த பலனைப் பெற ஒரு நாளைக்கு 250 மிலி முதல் 300 மிலி மாதுளை ஜூஸைக் குடிக்கலாம்.