காரசாரமான... மதுரை பச்சை மிளகாய் சட்னி - எப்படி செய்றது-ன்னு பாத்துட்டு செஞ்சு பாருங்க..

Madurai Pachai Milagai Chutney Recipe In Tamil: காலையில் உங்கள் வீட்டில் இட்லி, தோசைக்கு என்ன சைடு டிஷ் செய்வதென்று யோசித்துக் கொண்டிருக்கிகீர்களா? உங்கள் வீட்டில் உள்ளோர் ஒரே மாதிரியான சட்னியை சாப்பிட்டு போரடித்துவிட்டது என்று கூறுகிறார்களா? சற்று வித்தியாசமான சுவையுடைய, அதே சமயம் புதுமையான சட்னியை செய்ய நினைக்கிறீர்களா?

அதுவும் உங்கள் வீட்டில் உள்ளோர் காரமான சட்னியை மதுரை பச்சை மிளகாய் சட்னியை செய்ய 3 பொருட்களே போதுமானது, இப்படி சட்னியை செய்து இட்லியுடன் சேர்த்து சாப்பிட்டால் வழக்கமாக சாப்பிடுவதை விட அதிகமாக சாப்பிடுவார்கள்.

உங்களுக்கு மதுரை பச்சை மிளகாய் சட்னியை எப்படி செய்வதென்று தெரிந்து கொள்ள வேண்டுமா? கீழே மதுரை பச்சை மிளகாய் சட்னி ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

* எண்ணெய் - 1 டேபிள் ஸ்பூன்
* கடலைப் பருப்பு - 1/4 கப்
* புளி - சிறிய நெல்லிக்காய் அளவு
* பெருங்காயத் தூள் - 1/4 டீஸ்பூன்
* தண்ணீர் - 1 கப்
* பச்சை மிளகாய் - 8
* உப்பு - சுவைக்கேற்ப

செய்முறை:

* முதலில் ஒரு வாணலியை அடுப்பில் வைத்து, அதில் 1 டேபிள் ஸ்பூன் எண்ணெய் ஊற்றி சூடானதும், கடலைப் பருப்பை சேர்த்து நன்கு நிறம் மாற வறுக்க வேண்டும்.
* அதன் பின் அதில் புளி மற்றும் பெருங்காயத் தூள் சேர்த்து நன்கு வதக்கி இறக்கை குளிர வைக்க வேண்டும்
* பிறகு அதே வாணலியை அடுப்பில் வைத்து, அதில் 1 கப் நீரை ஊற்றி, 8 பச்சை மிளகாயை சேர்த்து, பச்சை மிளகாயின் நிறம் மாற வேக வைக்க வேண்டும்.
* பச்சை மிளகாயின் நிறம் மாறியதும், அடுப்பை அணைத்துவிட்டு, பச்சை மிளகாயை ஒரு தட்டில் எடுத்து வைத்து குளிர வைக்க வேண்டும்.
* பின்பு மிக்சர் ஜாரில் வறுத்த கடலைப் பருப்பு, புளியை சேர்த்து முதலில் ஒருமுறை அரைத்துக் கொள்ள வேண்டும்.
* அதன் பின் பச்சை மிளகாயை சேர்த்து, சுவைக்கேற்ப உப்பு சேர்த்து, சிறிது நீரை ஊற்றி நன்கு அரைத்துக் கொள்ள வேண்டும்.
* பின் அரைத்த சட்னியை ஒரு கிண்ணத்தில் எடுத்து வைத்தால், சுவையான மற்றும் காரசாரமான மதுரை பச்சை மிளகாய் சட்னி தயார்.