தேங்காய் சேர்க்காமலே தேங்காய் சட்னி செய்யலாம் தெரியுமா? எப்படி-ன்னு பாருங்க...

Coconut Chutney Without Coconut In Tamil: காலையில் பெரும்பாலும் உங்கள் வீட்டில் இட்லி, தோசை தான் காலை டிபனாக இருக்குமா? அந்த இட்லி, தோசைக்கு சட்டென்று ஒரு சட்னி செய்வதாக இருந்தால், பலரும் முதலில் செய்வது தேங்காய் சட்னி தான். அதுவும் அந்த தேங்காய் சட்னியை நீர் போன்று அரைத்தால், சாப்பிட இன்னும் பிரமாதமாக இருக்கும்.

ஆனால் தேங்காய் சட்னியை அரைக்க வீட்டில் தேங்காய் இல்லையா? அப்படியானால் கவலை வேண்டாம். தேங்காய் இல்லாமலே தேங்காய் சட்னியை செய்யலாம். இந்த சட்னி செய்வதற்கு சுலபமாக இருப்பதோடு, ருசியாகவும் இருக்கும். முக்கியமாக இது செய்வதற்கு மிகவும் சுலபமாக இருக்கும்.

உங்களுக்கு தேங்காய் இல்லாத தேங்காய் சட்னியை எப்படி செய்வதென்று தெரிந்து கொள்ள வேண்டுமா? கீழே தேங்காய் இல்லாத தேங்காய் சட்னி ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

* எண்ணெய் - 2 டீஸ்பூன்
* பச்சை மிளகாய் - 4
* பெரிய வெங்காயம் - 1
* பொட்டுக்கடலை - 1/4 கப்
* பூண்டு - 2 பல்
* உப்பு - சுவைக்கேற்ப
* புளி - சிறிய துண்டு
* தண்ணீர் - தேவையான அளவு

தாளிப்பதற்கு...

* எண்ணெய் - 1 டேபிள் ஸ்பூன்
* கடுகு - 1/2 டீஸ்பூன்
* உளுத்தம் பருப்பு - 1/2 டீஸ்பூன்
* கறிவேப்பிலை - 1 கொத்து
* வரமிளகாய் - 1
* பெருங்காயத் தூள் - 1/4 டீஸ்பூன்
* சின்ன வெங்காயம் - 5 (பொடியாக நறுக்கியது)

செய்முறை:

* முதலில் ஒரு வாணலியை அடுப்பில் வைத்து, அதில் எண்ணெய் ஊற்றி சூடானதும், பச்சை மிளகாய் சேர்த்து வதக்க வேண்டும்.
* அதன் பின் அதில் நறுக்கிய வெங்காயத்தை சேர்த்து வதக்கி இறக்கி குளிர வைக்க வேண்டும்.
* அடுத்து, மிக்சர் ஜாரில் வதக்கிய வெங்காயம், பச்சை மிளகாயை சேர்த்து, அத்துடன் பொட்டுக்கடலை, பூண்டு, சுவைக்கேற்ப உப்பு, புளி ஆகியவற்றை சேர்த்து,, சிறிது நீரை ஊற்றி நன்று மென்மையாக அரைத்துக் கொள்ள வேண்டும்.
* பின் அரைத்த சட்னியை ஒரு கிண்ணத்தில் எடுத்துக் கொண்டு, சட்னிக்கு தேவையான அளவு நீரை ஊற்றி கலந்து கொள்ள வேண்டும்.
* இறுதியாக ஒரு வாணலியை அடுப்பில் வைத்து, அதில் தாளிப்பதற்கு எண்ணெய் ஊற்றி சூடானதும், கடுகு, உளுத்தம் பருப்பு, கறிவேப்பிலை, வரமிளகாய், பெருங்காளத் தூள் சேர்த்து தாளிக்க வேண்டும்.
* அதன் பின் அதில் பொடியாக நறுக்கிய சின்ன வெங்காயத்தை சேர்த்து வதக்கி இறக்கி, சட்னியுடன் சேர்த்து கலந்தால், சுவையான தேங்காய் சேர்க்காத தேங்காய் சட்னி தயார்.