கொரோனா வைரஸ் போலவே காட்சி தரும் கடம்ப மர பூக்கள் - காய்ச்சல் குணமாக கசாயம் குடிங்க...

கடம்ப மரம் மருத்துவ குணம்

கடம்ப பூக்கள் அருமையான நறுமணம் கொண்டவை. அத்தர் தயாரிப்பில் பயன்படுத்தப்படுகிறது. இந்த மரத்தின் வேர், பட்டை, இலை, காய், கனி, விதை அனைத்துமே மருத்துவ குணம் மிகுந்தவை. சிறுநீரகக் கோளாறுகளைப் போக்குகிறது. சிறுநீர் பிரச்னைகள், இரத்த சோகை, தோல் நோய்கள் ஆகியவற்றை போக்க உதவுகின்றன. மரத்தின் இலைச் சாறு வாய்ப் புண்ணை குணப்படுத்துவதோடு, தொண்டை அழற்சியையும் போக்கி, வயிற்றுப் பிரச்னையை தீர்ப்பதுடன், ஜீரண மண்டல உறுப்புகள் சீராக செயல்பட உதவும்.

காய்ச்சல் தணிக்கும் கடம்ப மரம்

தண்டின் பட்டை வாய் குழறுதலை தடுக்கும். பித்தமாற்றானது சிறுநீர்ப்பை அழற்றியைத் தடுக்கும். ஜூரத்தைத் தடுக்கும். காய்ச்சல் தணிக்கும். கடம்ப மரப்பட்டையை தண்ணீரில் ஊற வைத்து காய்ச்சி அந்த நீரை குடித்தால் காய்ச்சல் குணமாகும். கடம்ப விதைகளை அரைத்து நீரில் கலந்து குடித்தால் விஷம் முறியும். கஷாயம் வாய்ப்புண்ணுக்கு வாய் கொப்பளிக்க உதவும்.

முருகனுக்கு உகந்த கடம்ப மரம்

கடம்ப மரம் முருகனுக்கு மட்டுமல்ல, திருமாலுக்கும் உகந்த மரமாகும். பகவான் கிருஷ்ணருக்கு மஞ்சள் நிறமுடைய கடம்ப பூக்கள் மிகவும் பிடித்தமான ஒன்றாகும் என விஷ்ணு புராணத்தில் குறிப்பிடப்பட்டுள்ளது. கடம்ப மரம் நீரோட்டம் அதிகமுள்ள இடங்களில் தான் செழித்து வளரும் தன்மை கொண்டது. மேற்கு தொடர்ச்சி மலைப்பகுதிகளிலும் இவை அதிகம் காணப்படுகின்றன.

கடம்ப வனம்

நாம் இப்போது பார்க்கும் மதுரை ஐயாயிரம் ஆண்டுகளுக்கு கடம்ப மரங்களால் சூழப்பட்ட அடர்ந்த வனப்பகுதியாகும். அதனால் தான் மதுரைக்கு கடம்பவனம் என்று ஒரு பெயரும் உண்டு. அன்னை மீனாட்சியை கடம்பவனவாசினி, கடம்பவனபூவை என்றும் அழைப்பதுண்டு. இதன் காரணமாகவே, மீனாட்சியம்மன் கோவிலில் கடம்ப மரம் தலவிருட்சமாக உள்ளது. சொக்கநாதர் சன்னதிக்கு அருகில் பல நூறு ஆண்டுகள் பழமையான கடம்ப மரத்தை வெள்ளித் தகடு போர்த்தி பக்தர்களின் பார்வைக்கு வைத்துள்ளனர்.

கடம்ப மரத்தின் மருத்துவ குணம்

கடம்ப மரத்தின் வேர், பட்டை, இலை, காய், மலர் என அனைத்துமே மருத்துவ பலன்களை அளிக்கின்றன. இதன் இலை மற்றும் பட்டைகளில் இருந்து காடமைன், ஐசோகாடமைன், கடம்பைன் ஆகிய அல்கலாய்டுகள் தயாரிக்கப்பட்டு அதிலிருந்து மருந்துகள் தயாரிக்கப்படுகின்றன. கடம்பமர இலைகளில் இருந்து தயாரிக்கப்படும் குளோராஜெனிக் அமிலம் மருத்துவ குணம் நிறைந்தது.

கருப்பை கோளாறு நீங்கும்

இம்மரத்தின் பூக்களை வேகவைத்து அதன் நீராவியை வடிகட்டி தயாரிக்கப்படும் தைலம் வாசனை திரவியங்கள் தயாரிக்க பயன்படுகிறது. இதன் பட்டைகள் பெண்களின் கருப்பை கோளாறுகளை போக்கும் தன்மையை கொண்டது. பிரசவித்த பெண்களுக்கு சரியான முறையில் தாய்ப்பால் சுரக்காமல் அவதிப்படும்போது, இதை மருந்தாக பயன்படுத்தலாம்.

குளிர்ச்சி தரும் கடம்ப மரம்

கடம்ப மரம் அதிக குளிர்ச்சியை தருவதால், கிராமப்புறங்களில் உள்ளவர்கள் வீடுகளில் கடம்ப மரத்தை வளர்த்து வருகிறார்கள். இதன் இலைச் சாறுகள் வாய் புண்ணை குணப்படுத்துவதோடு, தொண்டை அழற்சி மற்றும் வயிற்று உபாதைகளை போக்குவதோடு, நமது ஜீரண மண்டல உறுப்புகள் சீராக செயல்பட வைக்கிறது. கடம்ப இலை சாறுடன் சிறிது சர்க்கரை மற்றும் சீரகத்தை சேர்த்து குடித்தால் வயிற்றுப் பொருமல் பிரச்சனை தீரும். இலைகளை சூடுபடுத்தி காயம்பட்ட இடத்தில் வைத்து கட்டினால் வலி நீங்கி விரைவில் குணமாகும்.