காரமான வெங்காய சட்னி

காலையில் இட்லி அல்லது தோசைக்கு மிகவும் சிம்பிளாக ஒரு சட்னி செய்ய நினைத்தால், வெங்காய சட்னியை செய்து சாப்பிடுங்கள். இது 5 நிமிடத்தில் செய்யக்கூடிய அட்டகாசமான சட்னி. மேலும் இது கெட்டுப் போகவும் செய்யாது. காலையில் செய்தால், இரவு வரை வைத்து சாப்பிடலாம். பேச்சுலர்களுக்கு ஏற்ற சட்னியும் கூட.

சரி, இப்போது அந்த காரமான வெங்காய சட்னியை எப்படி செய்வதென்று பார்ப்போமா!!!

தேவையான பொருட்கள்:

வெங்காயம் - 3 (நறுக்கியது)
வரமிளகாய் - 7-8
பொட்டுக்கடலை - 1 டேபிள் ஸ்பூன்
புளிச்சாறு - 1 டேபிள் ஸ்பூன்
உப்பு - தேவையான அளவு
வெல்லம் - 1 டேபிள் ஸ்பூன்
எண்ணெய் - 1 டேபிள் ஸ்பூன்

செய்முறை:

முதலில் ஒரு வாணலியை அடுப்பில் வைத்து, அதில் எண்ணெய் ஊற்றி காய்ந்ததும், வரமிளகாய் சேர்த்து 1 நிமிடம் வதக்கி, பின் வெங்காயத்தை சேர்த்து பொன்னிறமாக வதக்க வேண்டும்.

பின்னர் அதில் பொட்டுக்கடலை, உப்பு, புளிச்சாறு மற்றும் வெல்லம் சேர்த்து 4-5 நிமிடம் மிதமான தீயில் வதக்கி விட வேண்டும்.

பின்பு அதனை இறக்கி குளிர வைத்து, பின் மிக்ஸியில் போட வேண்டும்.

பின் அதில் சிறிது தண்ணீர் ஊற்றி நன்கு மென்மையாக அரைத்தால், வெங்காய சட்னி ரெடி!!!

டிப்ஸ்:

இந்த சட்னியில் புளிச்சாற்றிற்கு பதிலாக எலுமிச்சை சாறு வேண்டுமானாலும் சேர்த்துக் கொள்ளலாம். இதுவும் வித்தியாசமான சுவையைத் தரும்.