ஒருமுறை உருளைக்கிழங்கு கிரேவியை இந்த மாதிரி செய்யுங்க.. சும்மா அள்ளும்.. அடிக்கடியும் செய்வீங்க...

Potato Gravy Recipe In Tamil: இன்னிக்கு காலையில் உங்க வீட்டில் இட்லி, தோசை செய்யப் போறீங்களா? அதற்கு எப்பவும் சட்னி செஞ்சு போரடிச்சுடுச்சா? அப்படியானால் கிரேவி செய்யுங்கள். அதுவும் உங்கள் வீட்டில் உருளைக்கிழங்கு இருந்தால், அதைக் கொண்டு ஹோட்டல் ஸ்டைலில் உருளைக்கிழங்கு கிரேவியை செய்யுங்கள்.

இந்த உருளைக்கிழங்கு கிரேவி இட்லி, தோசையுடன் மட்டுமின்றி, சப்பாத்தி, பூரியுடன் சாப்பிடவும் அட்டகாசமாக இருக்கும். முக்கியமாக இது செய்வதற்கு மிகவும் சுலபமாக இருக்கும்.

உங்களுக்கு ஹோட்டல் ஸ்டைலில் உருளைக்கிழங்கு கிரேவியை எப்படி செய்வதென்று தெரிந்து கொள்ள வேண்டுமா? கீழே ஹோட்டல் ஸ்டைல் உருளைக்கிழங்கு கிரேவி ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

* எண்ணெய் - 2 டேபிள் ஸ்பூன்
* பிரியாணி இலை - 1
* பட்டை - 1 துண்டு
* கிராம்பு - 3
* சீரகம் - 1/2 டீஸ்பூன்
* சோம்பு - 1/2 டீஸ்பூன்
* கறிவேப்பிலை - சிறிது
* பெரிய வெங்காயம் - 1 (பொடியாக நறுக்கியது)
* இஞ்சி பூண்டு பேஸ்ட் - 1 டீஸ்பூன்
* மஞ்சள் தூள் - 1/4 டீஸ்பூன்
* மிளகாய் தூள் - 1 1/2 டீஸ்பூன்
* கரம் மசாலா - 1/2 டீஸ்பூன்
* மல்லித் தூள் - 1 டீஸ்பூன்
* உப்பு - சுவைக்கேற்ப
* கெட்டி தயிர் - 1/4 கப்
* உருளைக்கிழங்கு - 2 (வேக வைத்து மசித்தது)
* தண்ணீர் - தேவையான அளவு
* கொத்தமல்லி - சிறிது

செய்முறை:

* முதலில் உருளைக்கிழங்கை வேக வைத்து, கையால் மசித்து தனியாக வைத்துக் கொள்ள வேண்டும்.
* பின்னர் ஒரு வாணலியை அடுப்பில் வைத்து, அதில் எண்ணெய் ஊற்றி சூடானதும், பட்டை, கிராம்பு, பிரியாணி இலை, சோம்பு, சீரகம், கறிவேப்பிலை சேர்த்து தாளிக்க வேண்டும்.
* பின்பு அதில் பொடியாக நறுக்கிய வெங்காயத்தை சேர்த்து கண்ணாடி பதத்திற்கு வதக்க வேண்டும்.
* பின் இஞ்சி பூண்டு பேஸ்ட் சேர்த்து பச்சை வாசனை போக வதக்க வேண்டும்.
* அடுத்து மஞ்சள் தூள், மல்லித் தூள், மிளகாய் தூள், கரம் மசாலா மற்றும் சுவைக்கேற்ப உப்பு சேர்த்து 1 நிமிடம் கிளறி விட வேண்டும்.
* பிறகு கெட்டி தயிரை நன்கு அடித்து ஊற்றி கிளறி, 2 நிமிடம் கொதிக்க வைக்க வேண்டும்.
* பின் வேக வைத்து மசித்து வைத்துள்ள உருளைக்கிழங்கு சேர்த்து நன்கு கிளறி, கிரேவிக்கு தேவையான அளவு நீரை ஊற்றி 3-4 நிமிடம் நன்கு கொதிக்க வைத்து இறக்கி, கொத்தமல்லியைத் தூவினால், சுவையான ஹோட்டல் ஸ்டைல் உருளைக்கிழங்கு கிரேவி தயார்.

Image Courtesy: FIST, IIT Patna