உங்க வீட்டுல கொரோனா நோயாளி இருக்காங்களா? அப்ப இத செய்யுங்க.. இல்ல கஷ்டப்படுவீங்க..

மாஸ்க் அணியவும்

உங்கள் வீட்டில் கோவிட் நோயாளி தனிமைப்படுத்திக் கொண்டு, தனியாக ஒரு அறையில் இருந்தால், வீட்டில் உள்ளோர் அனைவருமே நாள் முழுவதும் மாஸ்க் அணிந்திருக்க வேண்டும். அதோடு தேவையில்லாமல் மாஸ்க்கை அடிக்கடி தொடுவதைத் தவிர்க்க வேண்டும். மேலும் மாஸ்க்கை கழற்றிய பின், தவறாமல் கைகளைக் கழுவ வேண்டும்.

கைகளை அடிக்கடி கழுவவும்

ஆக்சிஜன் அளவைக் கண்காணிப்பது முதல் உணவு மற்றும் மருந்து கொடுப்பது வரை, பல வழிகளில் கொரோனா நோயாளிக்கு உதவ வேண்டியிருக்கலாம். ஆகவே அடிக்கடி கைகளை சுத்தம் செய்ய தவறாதீர்கள். முக்கியமாக தேவையில்லாமல் கண்கள், மூக்கு மற்றும் வாய் பகுதியைத் தொடுவதைத் தவிர்த்திடுங்கள்.

தனி பாத்திரத்தைப் பயன்படுத்தவும்

வீட்டில் கொரோனா நோயாளி இருந்தால், அவர்களுக்கு என்று தனி பாத்திரத்தைப் பயன்படுத்துங்கள். அவர்களுக்கு பயன்படுத்தும் பாத்திரத்தை மற்ற பாத்திரங்களுடன் சேர்த்து பயன்படுத்த வேண்டாம். அதுமட்டுமின்றி, அவர்களுக்கு பயன்படுத்தும் பாத்திரத்தை தனியாக கழுவுங்கள். முக்கியமாக அந்த பாத்திரங்களைக் கழுவும் போது மாஸ்க் அணிந்து கொள்வதோடு, கையில் கையுறை அணியுங்கள் மற்றும் சுடுநீரால் அவர்களுக்கு பயன்படுத்தும் பாத்திரங்களைக் கழுவுங்கள். இறுதியாக பாத்திரங்களைக் கழுவிய பின் தவறாமல் உங்கள் கைகளை நன்கு சுத்தமாக கழுவுங்கள்.

மேற்பரப்புகளை சுத்தம் செய்யவும்

நீங்கள் அடிக்கடித் தொடும் மேற்பரப்புகளான ஸ்விட் போர்டு, டேபிள் டாப், ரிமோட், கதவு கைப்பிடி, குழாய் போன்றவற்றை தினமும் சுத்தம் செய்யுங்கள். சொல்லப்போனால் ஒரு நாளைக்கு பல முறை அந்த மேற்பரப்புகளை சுத்தம் செய்ய முயலுங்கள்.

ஆரோக்கியத்தைக் கண்காணிக்கவும்

நீங்கள் ஒரு கோவிட் நோயாளியைக் கவனிக்கும் போது, உங்களது ஆரோக்கியத்தையும் தவறாமல் கண்காணிக்க வேண்டும். இருமல், காய்ச்சல், மூச்சுத் திணறல் போன்ற எந்த அறிகுறிகளை அனுபவிக்கிறீர்களா என்பதை கவனிக்கவும். ஒருவேளை நீங்கள் அவர்களுடன் நெருங்கியத் தொடர்பில் இருந்தால், நீங்களும் 14 நாட்களுக்கு வீட்டிலேயே தனிமைப்படுத்தப்பட வேண்டும்.