சர்க்கரை நோய் உள்ளவர்கள் அவர்களது கால் பாதுகாப்பு குறித்து கவனத்தில் கொள்ளவேண்டியவை!!!

வெறும் காலில் செல்லக்கூடாது

சர்க்கரை நோய் உள்ளவர்கள் செருப்பு அல்லது ஷூ அணியாமல் எங்கும் செல்லக்கூடாது. வெறும் கால்களில் கோயில்களுக்கு நடந்து செல்வது, பாதை யாத்திரை செல்வது போன்றவற்றை தவிர்க்கவும்.

வீட்டுக்குள்ளே காலணிகள் அவசியம்

முக்கியமாக, வீட்டுக்குள்ளே இருந்தாலும் கூட, தனியாக காலணிகள் பயன்படுத்தி நடப்பது பாதுகாப்பானதாக இருக்கும்.

லெதர் செருப்புகள் தவிர்க்கவும்

லெதர் பொருளில் தயாரிக்கப்பட்ட செருப்பு, ஷூ முதலியவை செருப்புக்கடி எனும் புண் ஏற்படக் காரணமாக இருக்கும். எனவே, ரப்பர் செருப்புகள், மென்மையான காலணிகள் பயன்படுத்துவது சிறந்தது.

சுயபரிசோதனை

காலையும், இரவு வேளைகளிலும் நீங்களே உங்கள் கால்களை சரிப் பார்த்து, ஏதேனும் புண் அல்லது கொப்பளங்கள் உண்டாகியிருக்கிறதா என்று பாருங்கள். அப்படி இருந்தால் உடனடியாக மருத்துவரை அணுகுங்கள். ஏனெனில், சர்க்கரை நோயாளிகளுக்கு புண் மிக விரைவாக பரவ ஆரம்பித்துவிடும்.

சீழ் பிடிக்கும் அபாயம்

ஓரிரு நாட்கள் தாமதித்தால் கூட சீழ் பிடிக்கும் வாய்ப்புகள் அதிகமாக இருக்கின்றன. அதுமட்டும் இல்லாமல் இது மிக விரைவாக கால் முழுதும் பரவி உடலையும் தாக்கும் அபாயமும் இருக்கின்றது.

அறிகுறிகள்

கால்களில் வீக்கம், காரணமில்லாமல் காய்ச்சல் ஏற்படுவது, இடுப்பு பகுதிகளில் நெரி கட்டுதல் போன்ற அறிகுறிகள், உங்கள் கால்களில் பாதிப்பு ஏற்பட்டுக் கொண்டிருக்கிறது என்பதை சொல்லும் எச்சரிக்கை மணி.

அபாயப் பிரச்சனைகள்

கால்களில் வெடிப்பு, காப்பு காய்த்தல், காலில் ஆணி போன்ற கால் பாதிப்புகள் மிகவும் ஆபத்தானவை என சர்க்கரை நோய் மருத்துவர்கள் கூறுகின்றனர்.

நகங்கள்

கால்களில் நகங்களை மிகவும் சதையோடு நெருக்கி வெட்ட வேண்டாம்,. இதனால், விரல் நகம் ஒட்டியுள்ள சதை பகுதியில் புண் ஏற்படும் வாய்ப்புகள் இருக்கின்றன.