மதியம் டக்குன்னு சமையலை முடிக்கணுமா? 1 கப் தயிர் இருந்தா.. 10 நிமிடத்தில் இத செய்யுங்க...

Summer Special Dahi Tadka Recipe In Tamil: கோடைக்காலம் ஆரம்பித்துவிட்ட நிலையில், ஒவ்வொரு நாளும் மதியம் என்ன சமையல் செய்வது என்று முடிவு செய்வதே ஒரு பெரிய வேலையாக இருக்கும். ஏனெனில் கோடையில் சமையலறையில் இருந்து நீண்ட நேரம் சமைக்கவும் பிடிக்காது, அதே போல் காரசாரமாக சாப்பிடவும் பிடிக்காது.

இப்படிப்பட்ட சூழலில் கொளுத்தும் கோடை வெயிலின் போது தயிரை உணவில் அதிகம் சேர்த்துக் கொள்வது நல்லது. அதுவும் தயிரை வெறுமனே உணவில் கலந்து சாப்பிடாமல், அந்த தயிரைக் கொண்டு சாதத்திற்கு ஏற்றவாறு அருமையான பல சைடு டிஷ் ரெசிபிக்களை செய்யலாம்.

அதில் ஒன்று தான் தஹி தட்கா. இந்த தஹி தட்கா சூடான சாதத்துடன் மட்டுமின்றி, சப்பாத்தியுடன் சாப்பிடவும் அட்டகாசமாக இருக்கும். முக்கியமாக இந்த தஹி தட்கா 5 நிமிடத்தில் டக்கென்று செய்யக்கூடியவாறு ஈஸியாக இருக்கும்.

உங்களுக்கு தஹி தட்காவை எப்படி செய்வதென்று தெரிந்து கொள்ள வேண்டுமா? கீழே தஹி தட்கா ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

* நெய் - 1 டீஸ்பூன்
* சீரகம் - 1/2 டீஸ்பூன்
* வெங்காயம் - 1 (பொடியாக நறுக்கியது)
* பெருங்காயத் தூள் - 1/4 டீஸ்பூன்
* கறிவேப்பிலை - 1 கொத்து
* பச்சை மிளகாய் - 1 (பொடியாக நறுக்கியது)
* தக்காளி - 1 (பொடியாக நறுக்கியது)
* இஞ்சி பூண்டு பேஸ்ட் - 1/2 டீஸ்பூன்
* காஷ்மீரி மிளகாய் தூள் - 1 டீஸ்பூன்
* மல்லித் தூள் - 1/2 டீஸ்பூன்
* கரம் மசாலா - 1/4 டீஸ்பூன்
* மஞ்சள் தூள் - 1 சிட்டிகை
* கசூரி மெத்தி - 1 டீஸ்பூன்
* உப்பு - சுவைக்கேற்ப
* கொத்தமல்லி - சிறிது
* தயிர் - 1 கப்

செய்முறை:

* முதலில் ஒரு வாணலியை அடுப்பில் வைத்து, அதில் 1 டீஸ்பூன் நெய் ஊற்றி சூடானதும், சீரகம் சேர்த்து தாளிக்க வேண்டும்.
* பின்பு அதில் பொடியாக நறுக்கிய வெங்காயத்தை சேர்த்து கண்ணாடி பதத்திற்கு வதக்க வேண்டும்.
* அதன் பின் அதில் பெருங்காயத் தூள், கறிவேப்பிலை, பொடியாக நறுக்கிய பச்சை மிளகாயை சேர்த்து நன்கு வதக்க வேண்டும்.
* பிறகு அதில் பொடியாக நறுக்கிய தக்காளியை சேர்த்து நன்கு மென்மையாகும் வரை வதக்க வேண்டும்.
* அடுத்து அதில் இஞ்சி பூண்டு பேஸ்ட்டை சேர்த்து பச்சை வாசனை போக வதக்க வேண்டும்.
* அதன் பின் அதில் காஷ்மீரி மிளகாய் தூள், மல்லித் தூள், கரம் மசாலா, மஞ்சள் தூள், கசூரி மெத்தி சேர்த்து, சுவைக்கேற்ப உப்பு தூவி நன்கு கிளறி, 3 நிமிடம் மிதமான தீயில் வைத்து நன்கு பச்சை வாசனை போக வதக்கி இறக்கி குளிர வைக்க வேண்டும்.
* மசாலா நன்கு குளிர்ந்த பின், அதில் 1 கப் தயிரை நன்கு கலந்து விட்டு சேர்த்து கிளறினால், சுவையான தஹி தட்கா தயார்.