பீர்க்கங்காயை வெச்சு இப்படி குழம்பு வையுங்க.. சாத்துடன் சாப்பிட சூப்பரா இருக்கும்...

Peerkangai Paal Kuzhambu: இன்று மதியம் என்ன செய்வது என்று யோசித்துக் கொண்டிருக்கிறீர்களா? இதுவரை வீட்டில் செய்திராத ஒரு குழம்பை செய்ய நினைக்கிறீர்களா? உங்கள் வீட்டில் பீர்க்கங்காய் உள்ளதா? அப்படியானால் அந்த பீர்க்கங்காய் கொண்டு பால் குழம்பு செய்யுங்கள்.

இந்த பீர்க்கங்காய் பால் குழம்பு சாதத்துடன் சாப்பிட அட்டகாசமாக இருக்கும். மேலும் இது குழந்தைகள் விரும்பி சாப்பிடக்கூடியவாறு இருக்கும். முக்கியமாக இது நீங்கள் வழக்கமாக செய்யும் குழம்பை விட சற்று வித்தியாசமாக இருக்கும். அதோடு இந்த குழம்பை 15 நிமிடத்தில் செய்துவிடலாம். அந்த அளவில் சீக்கிரம் செய்யக்கூடியது.

உங்களுக்கு பீர்க்கங்காய் பால் குழம்பு எப்படி செய்வதென்று தெரிந்து கொள்ள வேண்டுமா? கீழே பீர்க்கங்காய் பால் குழம்பு ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

* பீர்க்கங்காய் - 500 கிராம்
* எண்ணெய் - 1 டீஸ்பூன்
* கடுகு - 1/4 டீஸ்பூன்
* கறிவேப்பிலை - சிறிது
* சின்ன வெங்காயம் - 15 (பொடியாக நறுக்கியது)
* மஞ்சள் தூள் - 1/2 டீஸ்பூன்
* சாம்பார் தூள் - 1 டீஸ்பூன்
* உப்பு - 3/4 டீஸ்பூன்
* தண்ணீர் - 1 கப்
* காய்ச்சிய பால் - 1 கப்

செய்முறை:

* முதலில் பீர்க்கங்காயை கழுவி, தோலை நீக்கிவிட்டு, சிறு துண்டுகளாக வெட்டிக் கொள்ள வேண்டும்.
* பின் ஒரு வாணலியை அடுப்பில் வைத்து, அதில் எண்ணெய் ஊற்றி சூடானதும், கடுகு, கறிவேப்பிலை சேர்த்து தாளிக்க வேண்டும்.
* பின்பு அதில் சின்ன வெங்காயத்தைப் போட்டு சிறிது உப்பு தூவி நன்கு மென்மையாகும் வரை வதக்க வேண்டும்.
* பிறகு அதில் பீர்க்கங்காயை சேர்த்து, அத்துடன் மஞ்சள் தூள், சாம்பார் தூள், உப்பு மற்றும் 1 கப் நீரை ஊற்றி நன்கு கிளறி, மூடி வைத்து மிதமான தீயில் வைத்து 6-7 நிமிடம் பீர்க்கங்காய் வேகும் வரை வேக வைக்க வேண்டும்.
* நீரானது வற்றி பீர்க்கங்காய் வெந்ததும், அதில் 1 கப் பாலை ஊற்றி கிளறி, மிதமான தீயில் வைத்து 3-4 நிமிடம் கொதிக்க வைத்து இறக்கினால், சுவையான பீர்க்கங்காய் பால் குழம்பு தயார்.