சப்பாத்திக்கு ஒருவாட்டி இப்படி முட்டை பெப்பர் கிரேவியை செய்யுங்க.. வீட்டுல எல்லாரும் எக்ஸ்ட்ரா சாப்பிடுவாங்க..

Egg Pepper Gravy For Chapati: உங்கள் வீட்டில் நைட் பெரும்பாலும் சப்பாத்தி தான் செய்வீர்களா? அந்த சப்பாத்திக்கு ஒவ்வொரு நாளும் வித்தியாசமான சைடு டிஷ்ஷை வீட்டில் உள்ளோர் எதிர்பார்க்கிறார்களா? உங்கள் வீட்டில் அடிக்கடி சப்பாத்திக்கு முட்டை கிரேவியை செய்வீர்களா? அப்படியானால் அடுத்தமுறை முட்டை கிரேவி செய்வதாக இருந்தால், முட்டை பெப்பர் கிரேவியை செய்யுங்கள்.

இந்த பெப்பர் கிரேவியில் அனைத்தையும் அரைத்து சேர்ப்பதால், குழந்தைகள் முதல் பெரியவர்கள் வரை கேட்டு விரும்பி சாப்பிடுவார்கள். முக்கியமாக ஒருமுறை இப்படி கிரேவி செய்தால், அடிக்கடி இப்படி தான் செய்து கொடுக்க கேட்பார்கள். அந்த அளவில் சுவை பிரமாதமாக இருக்கும்.

உங்களுக்கு முட்டை பெப்பர் கிரேவியை எப்படி செய்வதென்று தெரிந்து கொள்ள வேண்டுமா? கீழே முட்டை பெப்பர் கிரேவி ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

* வேக வைத்த முட்டை - 7
* எண்ணெய் - 2 டேபிள் ஸ்பூன்
* மிளகு - 1 டீஸ்பூன்
* மல்லி - 1 டீஸ்பூன்
* சீரகம் - 1 டீஸ்பூன்
* பட்டை - 1 துண்டு
* கிராம்பு - 2
* ஏலக்காய் - 1
* கல்பாசி - 1 துண்டு
* அன்னாசிப்பூ - 1
* பெரிய வெங்காயம் - 2 (பொடியாக நறுக்கியது)
* சின்ன வெங்காயம் - 10
* தக்காளி - 1 (நறுக்கியது)
* இஞ்சி - 2 துண்டு
* பூண்டு - 5 பல்
* கறிவேப்பிலை - சிறிது
* வரமிளகாய் - 2
* உப்பு - 1 டீஸ்பூன்
* மிளகாய் தூள் - 1 டீஸ்பூன்
* கரம் மசாலா - 1 டீஸ்பூன்
* கொத்தமல்லி - சிறிது

செய்முறை:

* முதலில் ஒரு வாணலியை அடுப்பில் வைத்து, அதில் சீரகம், மல்லி, மிளகு, சோம்பு, பட்டை, கிராம்பு, கல்பாசி, ஏலக்காய், அன்னாசிப்பூ சேர்த்து, அத்துடன் 1 டீஸ்பூன் எண்ணெய் ஊற்றி நல்ல மணம் வரும் வரை வறுக்க வேண்டும்.
* பின்னர் அதில் சின்ன வெங்காயம், இஞ்சி, பூண்டு பற்கள், தக்காளி சேர்த்து நன்கு வதக்கி இறக்கி குளிர வைக்க வேண்டும்.
* பின்பு மிக்சர் ஜாரில் வதக்கிய பொருட்களை சேர்த்து, நன்கு மென்மையாக அரைத்துக் கொள்ள வேண்டும்.
* பிறகு ஒரு வாணலியை அடுப்பில் வைத்து, அதில் 2 டேபிள் ஸ்பூன் எண்ணெய் ஊற்றி சூடானதும், பொடியாக நறுக்கிய வெங்காயம், வரமிளகாய் மற்றும் கறிவேப்பிலை சேர்த்து நன்கு பொன்னிறமாக வதக்க வேண்டும்.
* பின் அதில் உப்பு, மிளகாய் தூள், கரம் மசாலா சேர்த்து நன்கு 1 நிமிடம் வதக்க வேண்டும்.
* அதன் பின் அதில் வேக வைத்த முட்டைகளை சேர்த்து 1 நிமிடம் வதக்க வேண்டும்.
* பின்னர் அதில் அரைத்து வைத்துள்ள மசாலாவை சேர்த்து கிளறி, கிரேவிக்கு தேவையான அளவு நீரை ஊற்றி, நன்கு 7-8 நிமிடம் பச்சை வாசனை போக கொதிக்க வைத்து, கொத்தமல்லியைத் தூவி இறக்கினால், சுவையான முட்டை பெப்பர் கிரேவி தயார்.