ஹோட்டல் ஸ்டைல் முட்டை கிரேவி - சிம்பிளா எப்படி செய்றது-ன்னு பாத்து ட்ரை பண்ணுங்க...

Hotel Style Egg Gravy Recipe In Tamil: உங்கள் வீட்டில் அடிக்கடி சப்பாத்தி செய்வீர்களா? அந்த சப்பாத்திக்கு முட்டை கொண்டு அடிக்கடி சைடு டிஷ் செய்வீர்களா? அதுவும் முட்டை கிரேவியை செய்தால் எப்போதும் ஒரே சுவையில் தான் செய்வீர்களா? அப்படியானால் ஒருமுறை ஹோட்டல் ஸ்டைலில் முட்டை கிரேவியை செய்யுங்கள்.

இப்படி முட்டை கிரேவி செய்யும் போது, அது சப்பாத்தியுடன் மட்டுமின்றி, பூரி, நாண், சாதம் போன்றவற்றுடன் சேர்த்து சாப்பிடவும் அற்புதமாக இருக்கும். ஒருமுறை இந்த ஸ்டைலில் முட்டை கிரேவி செய்தால், பின் இப்படி தான் எப்போதும் கிரேவி செய்வீர்கள். அந்த அளவில் இதன் சுவை ருசியாக இருக்கும்.

உங்களுக்கு ஹோட்டல் ஸ்டைல் முட்டை கிரேவியை எப்படி செய்வதென்று தெரிந்து கொள்ள வேண்டுமா? கீழே ஹோட்டல் ஸ்டைல் முட்டை கிரேவி ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

அரைப்பதற்கு...

* தக்காளி - 2
* இஞ்சி - 1 இன்ச்
* பூண்டு - 6 பல்
* பச்சை மிளகாய் - 1
* மஞ்சள் தூள் - 1/2 டீஸ்பூன்
* மிளகாய் தூள் - 2 டீஸ்பூன்
* மல்லித் தூள் - 2 டீஸ்பூன்
* கரம் மசாலா - 1 டீஸ்பூன்
* கொத்தமல்லி - சிறிது
* தண்ணீர் - சிறிது

கிரேவிக்கு...

* எண்ணெய் - 3 டேபிள் ஸ்பூன்
* சோம்பு - 1/4 டீஸ்பூன்
* பெரிய வெங்காயம் - 2 (பொடியாக நறுக்கியது)
* கறிவேப்பிலை - 1 கொத்து
* உப்பு - சுவைக்கேற்ப
* தண்ணீர் - தேவையான அளவு
* தேங்காய் பால் - 1/2 கப்
* வேக வைத்த முட்டை - 6 (இரண்டாக வெட்டியது)
* கொத்தமல்லி - சிறிது

செய்முறை:

* முதலில் மிக்சர் ஜாரில் தக்காளி, இஞ்சி, பூண்டு, பச்சை மிளகாய், மஞ்சள் தூள், மல்லித் தூள், கரம் மசாலா, கொத்தமல்லி மற்றும் சிறிது நீரை ஊற்றி நன்கு மென்மையாக அரைத்து தனியாக வைத்துக் கொள்ள வேண்டும்.
* பின்னர் ஒரு வாணலியை அடுப்பில் வைத்து, அதில் எண்ணெய் ஊற்றி சூடானதும், சோம்பு சேர்த்து தாளிக்க வேண்டும்.
* அதன் பின் அதில் கறிவேப்பிலை மற்றும் பொடியாக நறுக்கிய வெங்காயத்தை சேர்த்து, பொன்னிறமாகும் வரை வதக்க வேண்டும்.
* அடுத்து அதில் அரைத்த மசாலாவை சேர்த்து, சுவைக்கேற்ப உப்பு சேர்த்து, 5 நிமிடம் நன்கு கிளறி, பச்சை வாசனை போக வதக்க வேண்டும்.
* பின் அதில் கிரேவிக்கு தேவையான அளவு நீரை ஊற்றி கிளறி, நன்கு 3 நிமிடம் கொதிக்க வைக்க வேண்டும்.
* பிறகு அதில் தேங்காய் பாலை ஊற்றி கிளறி, 2-3 நிமிடம் கொதிக்க வைக்க வேண்டும்.
* அடுத்து அதில் வேக வைத்த முட்டைகளை இரண்டாக வெட்டி போட்டு, மூடி வைத்து 2 நிமிடம் மிதமான தீயில் வேக வைத்து இறக்க வேண்டும்.
* இறுதியாக கொத்தமல்லியைத் தூவி கிளறினால், சுவையான ஹோட்டல் ஸ்டைல் முட்டை கிரேவி தயார்.