வீட்டுல கத்திரிக்காய் இருந்தா.. ஒருடைம் இந்த கோயம்புத்தூர் ஸ்டைலில் சட்னி செஞ்சு பாருங்க.. சுவை அள்ளும்..

Coimbatore Style Brinjal Chutney Recipe In Tamil: காலையில் செய்யும் இட்லி, தோசைக்கு எப்போதும் வெங்காயம், தக்காளி, தேங்காய் வெச்சு சட்னி செய்து போரடிச்சுடுச்சா? சற்று வித்தியாசமான சுவையில், அதே சமயம் சட்டென்று செய்யக்கூடியவாறு ஒரு அட்டகாசமான சட்னியை செய்ய நினைக்கிறீர்களா?

உங்கள் வீட்டில் கத்திரிக்காய் உள்ளதா? அப்படியானால் 10 நிமிடத்தில் ஒரு சூப்பரான சட்னியை செய்யலாம். இந்த கத்திரிக்காய் சட்னி இட்லி, தோசையுடன் சாப்பிட அட்டகாசமாக இருக்கும். கத்திரிக்காய் சாப்பிட மறுக்கும் உங்கள் பிள்ளைகள் மற்றும் வீட்டில் உள்ளோருக்கு இப்படி கத்திரிக்காய் வைத்து சட்னி செய்து கொடுத்தால், கேட்டு விரும்பி சாப்பிடுவார்கள். அதுவும் கோயம்புத்தூர் ஸ்டைலில் இந்த சட்னியை செய்து பாருங்கள், சுவை இன்னும் அள்ளும்.

உங்களுக்கு கோயம்புத்தூர் ஸ்டைல் கத்திரிக்காய் சட்னியை எப்படி செய்வதென்று தெரிந்து கொள்ள வேண்டுமா? கீழே கோயம்புத்தூர் ஸ்டைல் கத்திரிக்காய் சட்னி ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

* கத்திரிக்காய் - 5
* தக்காளி - 3
* சிறிய உருளைக்கிழங்கு - 1
* சின்ன வெங்காயம் - 6
* பச்சை மிளகாய் - 2
* வரமிளகாய் - 3
* புளி - சிறு துண்டு
* உப்பு - சுவைக்கேற்ப
* தண்ணீர் - 2 கப்

தாளிப்பதற்கு...

* எண்ணெய் - 1 டேபிள் ஸ்பூன்
* கடலைப் பருப்பு - 1 டேபிள் ஸ்பூன்
* கடுகு - 1 டீஸ்பூன்
* கறிவேப்பிலை - சிறிது

செய்முறை:

* முதலில் கத்திரிக்காய், தக்காளி, உருளைக்கிழங்கு ஆகியவற்றை வெட்டிக் கொள்ள வேண்டும்.
* பின்னர் குக்கரில் நறுக்கிய கத்திரிக்காய், தக்காளி, உருளைக்கிழங்கு, சின்ன வெங்காயம், பச்சை மிளகாய், வரமிளகாய், சிறு புளி துண்டு, சுவைக்கேற்ப உப்பு மற்றும் 2 கப் நீரை ஊற்றி அடுப்பில் வைக்க வேண்டும்.
* நீரானது நன்கு கொதிக்க ஆரம்பித்ததும், குக்கரை மூடி, 3 விசில் விட்டு இறக்கிக் கொள்ள வேண்டும்.
* விசில் போனதும் குக்கரைத் திறந்து, அவற்றை ஒரு குழி பாத்திரத்தில் ஊற்றிக் கொள்ள வேண்டும்.
* பின்பு மத்து கொண்டு நன்கு மசித்துக் கொள்ள வேண்டும்.
* இறுதியாக ஒரு வாணலியை அடுப்பில் வைத்து, அதில் 1 டேபிள் ஸ்பூன் எண்ணெய் ஊற்றி சூடானதும், கடுகு, கடலைப் பருப்பு மற்றும் கறிவேப்பிலை சேர்த்து தாளித்து, சட்னியுடன் சேர்த்து கிளறினால், சுவையான கோயம்புத்தூர் ஸ்டைல் கத்திரிக்காய் சட்னி தயார்.

Image Courtesy: Simple and Yummy Recipes