பத்தே நிமிடத்தில் ப்ளாக் பெப்பர் சிக்கன் ப்ரை செய்வது எப்படி தெரியுமா?

சிக்கன் பிரியரா நீங்கள்? நீங்கள் சிக்கன் வாங்கினால் தவறாமல் சிக்கன் 65 செய்து சாப்பிடுவீர்களா? ஆனால் இனிமேல் சிக்கன் 65 செய்வதற்கு பதிலாக ப்ளாக் பெப்பர் சிக்கன் ப்ரை செய்து சாப்பிடுங்கள். இந்த ப்ளாக் பெப்பர் சிக்கன் ப்ரை மிகவும் சுவையானது மட்டுமின்றி, செய்வதற்கு மிகவும் சுலபமானதும் கூட. குறிப்பாக குளிர்காலத்தில் ப்ளாக் பெப்பர் சிக்கன் ப்ரை செய்து சாப்பிட்டால், சளி பிரச்சனை இருந்தாலும் அதிலிருந்து சற்று நிவாரணம் கிடைக்கும். முக்கியமாக இந்த ப்ளாக் பெப்பர் சிக்கன் ப்ரை ரெசிபியானது 10 நிமிடத்தில் செய்யக்கூடியது.

உங்களுக்கு ப்ளாக் பெப்பர் சிக்கன் ப்ரை எப்படி செய்வதென்று தெரிந்து கொள்ள வேண்டுமா? கீழே ப்ளாக் பெப்பர் சிக்கன் ப்ரை ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

* எலும்பில்லாத சிக்கன் - 500 கிராம்

* மிளகுத் தூள் - 1-2 டேபிள் ஸ்பூன்

* உப்பு - சுவைக்கேற்ப

* எலுமிச்சை சாறு அல்லது வினிகர் - 1 டேபிள் ஸ்பூன்

* கொத்தமல்லி - 2 டேபிள் ஸ்பூன் (பொடியாக நறுக்கியது)

* இஞ்சி பூண்டு பேஸ்ட் - 2 டேபிள் ஸ்பூன்

* கரம் மசாலா - 1 டீஸ்பூன்

* மைதா - 1/4 கப்

* சோள மாவு - 1/4 கப்

* எண்ணெய் - பொரிப்பதற்கு தேவையான அளவு

செய்முறை:

* முதலில் சிக்கனை நன்கு சுத்தமாக கழுவிக் கொள்ள வேண்டும்.

* பின் சிக்கனை ஒரு பாத்திரத்தில் எடுத்து, அதில் மைதா மாவு, சோள மாவு, கரம் மசாலா, இஞ்சி பூண்டு பேஸ்ட், கொத்தமல்லி, எலுமிச்சை சாறு அல்லது வினிகர், சுவைக்கேற்ப உப்பு மற்றும் மிளகுத் தூள் சேர்த்து நன்கு ஒருசேர பிசைந்து சிறிது நேரம் ஊற வைக்க வேண்டும்.

* பின்பு ஒரு வாணலியை அடுப்பில் வைத்து, அதில் பொரிப்பதற்கு தேவையான அளவு எண்ணெய் ஊற்றி சூடேற்ற வேண்டும்.

* எண்ணெய் சூடானதும், ஊற வைத்த சிக்கன் துண்டுகளைப் போட்டு பொன்னிறமாக பொரித்து எடுத்தால், சுவையான மற்றும் காரசாரமான ப்ளாக் பெப்பர் சிக்கன் ப்ரை தயார்.

Image Courtesy: yummytummyaarthi