கர்ப்பிணிகள் அதிகமாக மீன் சாப்பிடுவதால் ஏற்படும் உடல்நல விபரீதங்கள்!

மூளைக்கு நல்லது தான்

மீன் உண்ணுவது மூளைக்கு மிகவும் நல்லது தான். மேலும் இதிலிருக்கும் புரதமும் நமது உடல்நலத்திற்கு மிகவும் அவசியமானது தான். ஆனால், அளவிற்கு அதிகமாக உட்கொள்ளும் போது இது உடல்நலத்தில் விபரீதங்களை ஏற்படுத்துகிறது. முக்கியமாக கர்ப்பிணி பெண்கள் மத்தியில்.

மூன்று முறை

வாரத்திற்கு மூன்று முறைக்கு மேல் மீனை உட்கொள்வது வளரும் சிசுவிற்கு உடல்பருமன் ஏற்படும் அபாயத்தை உண்டாக்குகிறது.

ஆய்வறிக்கை

அமெரிக்காவின் மருத்துவ கூட்டமைப்பு பத்திரிக்கையில் வெளியான ஆய்வறிக்கையில் தான் இந்த தகவல்கள் வெளியாகியுள்ளன. அளவுக்கு அதிகமாக கர்ப்பிணி பெண்கள் மீன் உட்கொள்வது குழந்தைக்கு உடல்பருமன் அதிகரிக்கும் அபாயத்தை உண்டாக்குகிறது என ஆய்வாளர்கள் தெரிவித்துள்ளனர்.

கிரீட் பல்கலைக்கழகம்

இந்த ஆய்வை கிரீஸில் உள்ள கிரீட் பல்கலைக்கழகத்தை சேர்ந்த மருத்துவர் லீடா (Leda Chatzhi) ஐரோப்பிய மற்றும் அமெரிக்காவை சேர்ந்த 26,000 கர்ப்பிணி பெண்கள் மற்றும் அவர்களது குழந்தைகளை வைத்து நடத்தினார்.

எப்.டி.எ

அமெரிக்காவின் உணவு மற்றும் மருந்து மையம் கர்ப்பிணி பெண்கள் கர்ப்பகாலத்தில் வாரத்திற்கு மூன்று முறைக்கு மேல் மீனை உட்கொள்ள வேண்டாம் என அறிவுரைக்கிறது.

குழந்தைகளின் பி.எம்.ஐ

கர்ப்பகாலத்தில் அதிகளவு மீன் உட்கொள்ளும் பெண்களுக்கு பிறக்கும் குழந்தைகளிடம் 2,4,6 வயது என வளர, வளர ஆராய்ச்சி செய்ததில் அவர்களின் பி.எம்.ஐ அளவு மற்ற குழந்தைகளைவிட அதிகமாக இருப்பது தெரியவந்துள்ளது.

பெண் குழந்தைகள்

ஆண் குழந்தைகளை விட, பெண் குழந்தைகளிடம் தான் இந்த தாக்கம் அதிகமாக ஏற்படுகிறது எனவும் ஆய்வில் தெரிவிக்கப்பட்டுள்ளது.

தொடர்ந்து ஆராய்ச்சி

இதில் எந்தெந்த மீன்களை எவ்வளவு சாப்பிடலாம் என மேற்கொண்டு ஆய்வு நடத்தப்பட்டு வருகிறது. ஆய்வாளர் லீடா வாரத்திற்கு மூன்று முறைக்கு மேல் மீனை உட்கொள்ளாமல் பார்த்துக் கொள்ளுங்கள் என்று மட்டும் அறிவுரைத்திருக்கிறார்.