மாத்திரைகள் உதவியின்றி ரத்த அழுத்தத்தை கட்டுப்படுத்த சில குறிப்புகள்!

ஜாக்கிங் :

ஜாக்கிங் செய்வதால் ஆக்ஸிஜன் உடலில் அதிகளவு சேரும். இது ரத்த அழுத்தத்தை குறைத்து, இதயத்தை பலப்படுத்துவதால் இதயத்தால் குறைந்த முயற்சியிலேயே அதிக ரத்தத்தை உந்தித்தள்ள முடிகிறது. இதனால் இதய வால்வுகளுக்கு கொடுக்கப்படும் அழுத்தம் குறையும்.

தயிர் :

ஒரு நாளைக்கு ஒரு கப் தயிரை குடிப்பதன் மூலம் ரத்த அழுத்தத்தை குறைக்க முடியும். இயற்கையாகவே கிடைத்திடும் கால்சியம், ரத்த நாளங்களை நெகிழச் செய்வதால் அவை விரிவடைகின்றன. இதனால் ரத்த அழுத்தம் குறைந்திடும்.

வாழை :

பொட்டாசியம் நிறைந்த வாழைப்பழத்தை சாப்பிடுவதாலும் மற்றும் எடுத்துக் கொள்ளும் உணவில் உப்பின் அளவைக் குறைப்பதாலும் ரத்த அழுத்தத்தை குறைக்க முடியும்.

குறிப்பாக பதப்படுத்தப்பட்ட உணவுகளான பிஸ்கட்டுகள், தானியங்கள்,துரித உணவுகள் மற்றும் இன்ஸ்டண்ட் மிக்ஸ் போன்றவற்றில் அதிகமான உப்பு இருக்கும்.

எடை குறைவு :

நமது உடல் எடையில் சில கிலோக்களை குறைப்பதன் மூலமாக ரத்த அழுத்தத்தை குறைக்க முடியும். உடல் எடை அதிகமாக இருப்பவர்களுக்கு இதயம் அதிக அழுத்தம் கொடுக்க வேண்டியிருப்பதால் ரத்த அழுத்தம் அதிகரிக்க வாய்ப்புகள் அதிகம்.

புகைப்பழக்கம் :

சிகரெட்டில் உள்ள நிக்கோடின் உடலிலுள்ள அட்ரீனலினை தூண்டுவதால் இதயம் வழக்கத்திற்கு மாறாக வேகமாக துடிக்கும். இதனால் எப்போதும் வேகமாக துடிக்க வேண்டிய கட்டாயத்திற்கு இதயம் தள்ளப்பட்டு ரத்த அழுத்தம் அதிகரிக்கும்.

காபி :

ஒரு நாளில் மூன்று கப் காபி குடிப்பதால் ரத்த அழுத்தமும் மூன்று புள்ளிகள் உயருமாம். காபியில் உள்ள காஃபைன் மூலப்பொருள் ரத்த நாளங்களை இறுக்கி விடுவதால் ரத்த அழுத்தம் ஏற்படுவதற்கான சதவீதங்கள் அதிகரிக்கின்றன.

பீட்ரூட் :

பீட்ரூட்டில் இயற்கையாகவே இருக்கும் நைட்ரேட்டினால் ரத்த அழுத்தத்தை குறைக்க முடியும். ஒரு நாளில் 250 மில்லி பீட்ரூட் சாறு குடிப்பதனால் ரத்த அழுத்தத்தை 7 சதவீதம் அளவிற்கு குறைத்திட முடியும்.