¼ கப் கடலைப் பருப்பும், ¼ கப் துவரம் பருப்பும் இருந்தா இந்த மாதிரி அடை செய்யுங்க..எடை புயல் வேகத்துல குறையும்!

Varagu Adai Recipe in Tamil: நீங்கள் உடல் எடையைக் குறைக்கக் கடுமையாக முயற்சி செய்து கொண்டிருக்கிறீர்களா? அதற்காக டயட்டில் இருக்கிறீர்களா? அப்படியானால் உங்கள் டயட்டில் சத்தான, அதே சமயம் உடல் எடையைக் குறைக்க உதவியாக இருக்கும் உணவுகளை தொடர்ந்து சேர்த்து வந்தால், உடல் எடை வேகமாக குறையும்.

இதுவரை உங்கள் டயட்டில் சுவையில்லாத உணவு தான் இருந்தது என்றால், உங்களின் டயட்டில் சுவையான உணவை சேர்த்துக் கொள்ள வேண்டிய நேரம் வந்துவிட்டது. உங்கள் டயட்டில் சிறுதானியத்தால் செய்யப்பட்ட சுவையான அடையை சேர்த்துக் கொள்ளுங்கள். இந்த அடை ருசியாக இருப்பதோடு, உடல் எடையைக் குறைக்கவும் உதவியாக இருக்கும். மேலும் இந்த அடை செய்வதற்கும் மிகவும் சுலபமாக இருக்கும். டயட்ட்டில் இருப்பவர்கள் மட்டுமல்ல இல்லாதவர்கள் கூட இந்த அடையை அடிக்கடி செய்து சாப்பிடலாம்.

உங்களுக்கு எடையைக் குறைக்க உதவும் சுவையான சிறுதானிய அடையை எப்படி செய்வதென்று தெரிந்து கொள்ள வேண்டுமா? கீழே எடையைக் குறைக்க உதவும் சிறுதானிய அடை ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

- 1 கப் வரகு
- ¼ கப் கடலைப் பருப்பு
- ¼ கப் துவரம் பருப்பு
- 2 டேபிள்ஸ்பூன் உளுத்தம் பருப்பு
- 2 டேபிள்ஸ்பூன் பாசிப்பருப்பு
- 2 டேபிள்ஸ்பூன் அவல்
- 8 காய்ந்த மிளகாய்
- ஒரு சிட்டிகை பெருங்காயம்
- 2 பெரிய வெங்காயம்
- 2 டேபிள்ஸ்பூன் நறுக்கிய கொத்தமல்லி இலைகள்
- 1 கொத்து கறிவேப்பிலை
- 1 டீஸ்பூன் துருவிய இஞ்சி
- தேவையான அளவு உப்பு

செய்முறை:

- முதலில் வரகை மட்டும் நன்றாக கழுவி தனியாக வைக்கவும், பின்னர் மற்ற பருப்பு வகைகள் மற்றும் அவலை தனியாக கழுவி இரண்டையும் தனித்தனியாக 3 மணி நேரம் ஊற வைக்கவும்.

- ஒரு மிக்ஸியில், முதலில் காய்ந்த மிளகாய், உப்பு மற்றும் பெருங்காயத்தூளை சேர்த்து பொடியாக அரைத்துக் கொள்ளவும். பின்னர் ஒரு கிண்ணத்திற்கு மாற்றவும்.

- பின்னர் ஊறவைத்த வரகை தண்ணீரை வடித்து வரகை மிக்ஸி ஜாரில் போட்டு, சற்று கொரகொரப்பான விழுதாக அரைத்து ஒரு பாத்திரத்திற்கு மாற்றி வைக்கவும்.

- பின்னர், ஊறவைத்து, தண்ணீர் வடித்த மற்ற பருப்பு வகைகள் மற்றும் அவலைச் சேர்த்து, கொரகொரப்பாக அரைத்து இந்த மாவையும் அதே பாத்திரத்தில் சேர்க்கவும்.

- அனைத்தையும் நன்றாகக் கலந்து, குறைந்தபட்சம் 2 மணி நேரம் அப்படியே வைக்கவும்.

- அடை செய்வதற்கு சிறிது நேரத்திற்கு முன்பு, பொடியாக நறுக்கிய பெரிய வெங்காயம், கறிவேப்பிலை, கொத்தமல்லி இலைகள், துருவிய இஞ்சி ஆகிய மற்ற அனைத்துப் பொருட்களையும் சேர்த்து நன்றாக கலக்கவும்.

- ஒரு தோசைக்கல்லைச் சூடாக்கி, எண்ணெய் தடவி, சற்று தடிமனான அடை தோசையாக ஊற்றவும்.

- மிதமான தீயில் வேகவைத்து, ஒரு பக்கம் வெந்ததும், திருப்பிப் போட்டு, இருபுறமும் பொன்னிறமாகும் வரை வார்த்தெடுக்கவும்.

- இந்த அடைக்கு சைடிஷே தேவையில்லை, நீங்கள் விருப்பப்பட்டால் தேங்காய் சட்னி அல்லது சாம்பார் வைத்து சாப்பிடலாம்.