1 மாம்பழமும், 1/2 கப் ஜவ்வரிசியும் இருந்தா.. இத செஞ்சு சாப்பிடுங்க.. குளுகுளுன்னு செம டேஸ்ட்டா இருக்கும்..

Mango Kheer Recipe In Tamil: கோடைக்காலம் என்பதால் மாம்பழம் விலை குறைவில் மார்கெட்டுகளில் விற்கப்படுவதைக் காணலாம். இப்படி குறைவான விலையில் மாம்பழம் விற்பதால், நிறைய பேரின் வீடுகளில் மாம்பழம் குவிந்திருக்கும். உங்கள் வீட்டிலும் அப்படி மாம்பழம் குவிந்துள்ளதா? அந்த மாம்பழத்தை சற்று வித்தியாசமாக சாப்பிட விரும்புகிறீர்களா? உங்கள் பிள்ளைகளும் ஏதாவது வித்தியாசமாக சாப்பிட செய்து கொடுக்க கேட்கிறார்களா?

அப்படியானால் வீட்டில் ஜவ்வரிசி இருந்தால், அந்த ஜவ்வரிசியையும், மாம்பழத்தையும் கொண்டு ஜில்லென்று ஒரு அற்புதமான ஸ்வீட் செய்து கொடுங்கள். இந்த மாம்பழ கீர் செய்தால், நொடியில் வீட்டில் உள்ளோர் காலி செய்துவிடுவார்கள். அவ்வளவு ருசியாக இருக்கும். எனவே மிஸ் பண்ணாம, மாம்பழ சீசன் இருக்கும் போதே உங்கள் வீட்டில் உள்ளோருக்கு ஒருமுறை செய்து கொடுங்கள்.

உங்களுக்கு இந்த மாம்பழ கீர் ரெசிபியை எப்படி செய்வதென்று தெரிந்து கொள்ள வேண்டுமா? கீழே மாம்பழ கீர் ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

* மாவு ஜவ்வரிசி - 1/2 கப்
* சுடுதண்ணீர் - 1/4 கப்
* கெட்டியான பால் - 3 கப் அல்லது 1/2 லிட்டர்
* சர்க்கரை - 1/2 கப்
* ஏலக்காய் தூள் - 1/2 டீஸ்பூன்
* மாம்பழ கூழ் - 1 கப்
* மாம்பழத் துண்டுகள் - சிறிது
* பாதாம் - சிறிது (பொடியாக நறுக்கியது)

செய்முறை:

* முதலில் ஒரு கிண்ணத்தில் 1/2 கப் மாவு ஜவ்வரிசியை எடுத்து நீரில் 2 முறை கழுவிக் கொள்ள வேண்டும்.
* பின் அதில் 1/4 கப் சுடுநீரை ஊற்றி 10 நிமிடம் ஊற வைக்க வேண்டும்.
* பின்பு ஒரு வாணலியை அடுப்பில் வைத்து, அதில் 3 கப் கெட்டியான பாலை ஊற்றி, அடுப்பில் வைத்து, பாலை நன்கு 3-4 நிமிடம் கொதிக்க வைக்க வேண்டும்.
* பால் நன்கு கொதித்ததும், அதில் சர்க்கரையை 1/2 கப் சேர்த்து கிளறி விட வேண்டும்.
* அதன் பின் ஏலக்காய் தூளை சேர்த்து கிளறி, அரைத்து வைத்துள்ள மாம்பழக் கூழை சேர்த்து கிளறி விட்டு, அடுப்பை அணைத்துவிட்டு, ஓரளவு குளிர வைக்க வேண்டும்.
* பிறகு அதில் பொடியாக நறுக்கிய மாம்பழத் துண்டுகளை சேர்த்து கிளறி விட வேண்டும்.
* இறுதியாக பொடியாக நறுக்கிய பாதாமை தூவி கிளறி சூடாகவோ அல்லது ஃப்ரிட்ஜ்ஜில் வைத்து நன்கு குளிர வைத்தோ குடிக்கலாம். இப்போது சுவையான மாம்பழ கீர் தயார்.