இட்லி, தோசைக்கு அடுத்தமுறை இப்படி சாம்பார் வையுங்க... சும்மா அள்ளும்...

Hotel Style Idli Sambar Recipe: எப்போதும் இட்லி, தோசைக்கு ஒரே ஸ்டைலில் சாம்பார் செய்து போரடித்துவிட்டதா? அப்படியானால் அடுத்தமுறை ஹோட்டல் ஸ்டைலில் இட்லி சாம்பாரை செய்யுங்கள். இந்த இட்லி சாம்பார் இட்லி, தோசைக்கு மட்டுமின்றி, பொங்கல், சாதம் போன்றவற்றுடன் சாப்பிடவும் நன்றாக இருக்கும். மேலும் இது குழந்தைகள் முதல் பெரியவர்கள் வரை அனைவரும் விரும்பி சாப்பிடக்கூடியவாறு இருக்கும்.

உங்களுக்கு ஹோட்டல் ஸ்டைல் இட்லி சாம்பார் ரெசிபியை எப்படி செய்வதென்று தெரிந்து கொள்ள வேண்டுமா? கீழே ஹோட்டல் ஸ்டைல் இட்லி சாம்பார் ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

பருப்பு வேக வைப்பதற்கு...

* துவரம் பருப்பு - 1/4 கப்
* மாசூர் பருப்பு - 1/4 கப்
* மஞ்சள் தூள் - 1/4 டீஸ்பூன்
* தண்ணீர் - 1 1/2 கப்

தாளிப்பதற்கு...

* எண்ணெய் - 2 டேபிள் ஸ்பூன்
* கடுகு - 1/2 டீஸ்பூன்
* உளுத்தம் பருப்பு - 1 டீஸ்பூன்
* கறிவேப்பிலை - சிறிது
* பெருஙங்காயத் தூள் - 1/4 டீஸ்பூன்

காய்கறிகள்...

* பெரிய வெங்காயம் - 1 (நறுக்கியது)
* தக்காளி - 3 (நறுக்கியது)
* முருங்கைக்காய் - 1 (துண்டுகளாக்கப்பட்டது)
* கேரட் - 1 (நீள துண்டுகளாக்கப்பட்டது)
* பீன்ஸ் - 6-7 (துண்டுகளாக்கப்பட்டது)
* உருளைக்கிழங்கு - 1 (துண்டுகளாக்கப்பட்டது)
* வெண்டைக்காய் - 4-5 (துண்டுகளாக்கப்பட்டது)
* கத்திரிக்காய் - 6-7 (நறுக்கியது)
* தண்ணீர் - 1 1/4 கப்
* உப்பு - சுவைக்கேற்ப

புளி சாற்றிற்கு...

* புளி - 1 எலுமிச்சை அளவு
* சுடுநீர் - 1/4 கப்

சாம்பார் பொடிக்கு...

* காஷ்மீரி வர மிளகாய் - 5
* கறிவேப்பிலை - சிறிது
* மல்லி விதைகள் - 1 1/2 டேபிள் ஸ்பூன்
* கடலைப் பருப்பு - 1 டேபிள் ஸ்பூன்
* சீரகம் - 1 டீஸ்பூன்
* கடுகு - 1/2 டீஸ்பூன்
* மிளகு - 1/2 டீஸ்பூன்
* வெந்தயம் - 1/4 டீஸ்பூன்
* எண்ணெய் - 2 டீஸ்பூன்

பிற பொருட்கள்...

* தண்ணீர் - 1 கப்
* கொத்தமல்லி - சிறிது

செய்முறை:

* முதலில் பருப்புகளை நன்கு நீரில் கழுவி, குக்கரில் போட்டு, 1 1/2 கப் தண்ணீர் ஊற்றி மஞ்சள் தூள் சேர்த்து, அடுப்பில் வைத்து, 7-8 விசில் விட்டு இறக்கிக் கொள்ள வேண்டும்.
* விசில் போனதும் குக்கரைத் திறந்து, பருப்பை நன்கு மசித்து விட வேண்டும்.
* பின்னர் ஒரு வாணலியை அடுப்பில் வைத்து, அதில் சாம்பார் பொடி செய்வதற்கு கொடுத்துள்ள அளவு எண்ணெய் ஊற்றி சூடானதும், கடுகு சேர்த்து தாளித்த பின், மல்லி, சீரகம், மிளகு, கடலைப் பருப்பு, வெந்தயம், கறிவேப்பிலை, வரமிளகாய் சேர்த்து குறைவான தீயில் வைத்து, பொன்னிறமாக வறுத்து இறக்கி குளிர வைத்து, மிக்சர் ஜாரில் போட்டு அரைத்து பொடி செய்து கொள்ள வேண்டும்.
* பின்பு புளியை வெதுவெதுப்பான நீரில் 15 நிமிடம் ஊற வைத்து, அதை பிசைந்து சாறு எடுத்துக் கொள்ள வேண்டும்.
* பிறகு ஒரு வாணலியை அடுப்பில் வைத்து, அதில் தாளிப்பதற்கு கொடுத்துள்ள அளவு எண்ணெய் ஊற்றி சூடானதும், கடுகு, உளுத்தம் பருப்பு சேர்த்து தாளிக்க வேண்டும்.
* பின் வெங்காயம், கறிவேப்பிலை, பெருங்காயத் தூள் சேர்த்து 2 நிமிடம் நன்கு வதக்க வேண்டும்.
* அடுத்து தக்காளியை சேர்த்து சுவைக்கேற்ப உப்பு தூவி 4-5 நிமிடம் மிதமான தீயில் வைத்து நன்கு மென்மையாகும் வரை வதக்க வேண்டும்.
* அதன் பின் காய்கறிகளை சேர்த்து வதக்கி, 4- நிமிடம் மிதமான தீயில் வேக வைக்க வேண்டும்.
* பின் புளிச்சாற்றினை ஊற்றி, அதைத் தொடர்ந்து 1- 1 1/4 கப் நீரை ஊற்றி, சுவைக்கேற்ப உப்பு சேர்த்து பச்சை வாசனை போக நன்கு கொதிக்க வைக்க வேண்டும்.
* அடுத்து அரைத்து வைத்துள்ள பொடியை சேர்த்து கிளறி, அத்துடன் மசித்து வைத்துள்ள பருப்பையும், தேவையான அளவு நீரையும் ஊற்றி, சுவை பார்த்து, வேண்டுமானால் உப்பு சேர்த்து கிளறி, மிதமான தீயில் 6-7 மிடம் கொதிக்க வைத்து இறக்கி, கொத்தமல்லியைத் தூவினால், சுவையான ஹோட்டல் ஸ்டைல் இட்லி சாம்பார் தயார்.

Image Courtesy: vegrecipesofindia