முட்டை இருந்தா.. ஒருடைம் ஈவ்னிங்-ல இப்படி வடை செஞ்சு சாப்பிடுங்க.. ருசியானதும், சத்தானதும் கூட..

Egg Vada Recipe In Tamil: மாலை வேளையில் காபி, டீ குடிக்கும் போது மொறுமொறுவென்று ஏதாவது சாப்பிட உங்கள் வீட்டில் உள்ளோர் கேட்கிறார்களா? பொதுவாக மாலை வேளையில் வடை, பஜ்ஜி, பக்கோடா, போண்டா என்று தான் சாப்பிட பிடிக்கும். ஏனெனில் காபி, டீயுடன் மொறுமொறுப்பான வடை அல்லது பஜ்ஜி செய்து சாப்பிட்டால் மிகவும் பிரமாதமாக இருக்கும்.

அதுவும் எப்போதும் ஒரே மாதிரியான சுவையில் வடையை செய்து சாப்பிட்டு போரடித்திருந்தால், முட்டையைக் கொண்டு வடை செய்து கொடுங்கள். இந்த முட்டை வடை வித்தியாசமான சுவையில், மிகவும் அருமையாக இருக்கும். ஒருமுறை இந்த வடையை செய்து கொடுத்தால், உங்கள் வீட்டில் உள்ளோர் அடிக்கடி செய்து கொடுக்குமாறு கேட்பார்கள்.

உங்களுக்கு முட்டை வடையை எப்படி செய்வதென்று தெரிந்து கொள்ள வேண்டுமா? கீழே முட்டை வடை ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

* வேக வைத்த முட்டை - 4
* பெரிய வெங்காயம் - 1 (பொடியாக நறுக்கியது)
* மிளகாய் தூள் - 1 டீஸ்பூன்
* கரம் மசாலா - 1/2 டீஸ்பூன்
* சீரகத் தூள் - 1/2 டீஸ்பூன்
* இஞ்சி - சிறிது (பொடியாக நறுக்கியது)
* கறிவேப்பிலை - 1 கொத்து (பொடியாக நறுக்கியது)
* கொத்தமல்லி - சிறிது (பொடியாக நறுக்கியது)
* உப்பு - சுவைக்கேற்ப
* மிளகுத் தூள் - 1/2 டீஸ்பூன்
* கடலை மாவு - 2 டேபிள் ஸ்பூன்
* அரிசி மாவு - 1 டேபிள் ஸ்பூன்
* முட்டை - 1
* எண்ணெய் - பொரிப்பதற்கு தேவையான அளவு

செய்முறை:

* முதலில் வேக வைத்த 4 முட்டைகளை துருவிக் கொள்ள வேண்டும்.
* பின்னர் துருவிய முட்டையுடன், பொடியாக நறுக்கிய வெங்காயம், மிளகாய் தூள், கரம் மசாலா, சீரகத் தூள் ஆகியவற்றை சேர்க்க வேண்டும்.
* அதன் பின் அதில் பொடியாக நறுக்கிய இஞ்சி, கறிவேப்பிலை, கொத்தமல்லி ஆகியவற்றை சேர்க்க வேண்டும்.
* பின்பு அதில் சுவைக்கேற்ப உப்பு, மிளகுத் தூள் சேர்க்க வேண்டும்.
* அடுத்து அதில் கடலை மாவு, அரிசி மாவு ஆகியவற்றை சேர்த்து கைகளால் நன்கு கிளறி விட வேண்டும்.
* பிறகு ஒரு கிண்ணத்தில் ஒரு முட்டையை உடைத்து ஊற்றி நன்கு கலந்து கொள்ள வேண்டும்.
* பின் அடித்த இந்த முட்டையை பாதி அதில் ஊற்றி நன்கு பிசைந்து கொள்ள வேண்டும்.
* இறுதியாக ஒரு வாணலியை அடுப்பில் வைத்து, அதில் பொரிப்பதற்கு தேவையான அளவு எண்ணெய் ஊற்றி சூடேற்ற வேண்டும்.
* எண்ணெய் சூடானதும், பிசைந்து வைத்துள்ளதை கொஞ்சம் கொஞ்சமாக எடுத்து வடை போன்று தட்டிக் கொள்ள வேண்டும். இதேப் போன்று அனைத்தையும் தட்டி ஒரு தட்டில் வைத்துக் கொள்ள வேண்டும்.
* பின் தட்டி வைத்துள்ளதை எண்ணெயில் போட்டு, மிதமான தீயில் வைத்து, பொன்னிறமாக பொரித்து எடுத்தால், சுவையான முட்டை வடை தயார்.