தஹி பன்னீர் கிரேவி

பன்னீர் அனைவருக்குமே பிடித்தமான ஒரு உணவுப் பொருள். ஆனால் பலருக்கு பன்னீரை எப்படி சமைப்பதென்று தெரியாது. இதுநாள் வரை நீங்கள் கடைகளில் தான் பன்னீர் ரெசிபிக்களைச் சுவைத்திருந்தீர்களானால், இன்று வீட்டிலேயே செய்யலாம். உங்களுக்கு சப்பாத்திக்கு சைடு டிஷ்ஷாக பன்னீர் கிரேவி செய்ய விரும்புகிறீர்களா? அப்படியானால், இன்று தஹி பன்னீரை கிரேவியை செய்யுங்கள். தஹி பன்னீர் என்பது தயிர் கொண்டு செய்யப்படும் ஒரு பன்னீர் ரெசிபியாகும்.

உங்களுக்கு தஹி பன்னீர் கிரேவியை எப்படி செய்வதென்று தெரிந்து கொள்ள வேண்டுமா? அப்படியானால் இக்கட்டுரையைத் தொடர்ந்து படியுங்கள். ஏனெனில் கீழே தஹி பன்னீர் கிரேவியின் எளிய செய்முறை கொடுக்கப்பட்டுள்ளது. முக்கியமாக வீட்டில் இருக்கும் பொருட்களைக் கொண்டே செய்யக்கூடியது என்பதால், அனைவருமே முயற்சிக்கலாம். சரி, வாருங்கள் இப்போது தஹி கிரேவியின் செய்முறையைக் காண்போம். அதைப் படித்து உங்கள் அனுபவத்தை எங்களுடன் பகிர்ந்து கொள்ளுங்கள்.

MOST READ: மலாய் பன்னீர் கிரேவி

தேவையான பொருட்கள்:

* பன்னீர் - 200 கிராம் (துண்டுகளாக்கப்பட்டது)

* எண்ணெய் - 3 டேபிள் ஸ்பூன்

* சீரகம் - 1 டீஸ்பூன்

* பிரியாணி இலை - 1

* பட்டை - 1

* வெங்காயம் - 1 (பெரியது மற்றும் நறுக்கியது)

* தயிர் - 1 கப்

* கடலை மாவு - 2 டேபிள் ஸ்பூன்

* காஷ்மீரி மிளகாய் தூள் - 2 டீஸ்பூன்

* மஞ்சள் தூள் - 1 டீஸ்பூன்

* கரம் மசாலா - 1 டீஸ்பூன்

* உப்பு - தேவையான அளவு

* சர்க்கரை - தேவையான அளவு

* உலர்ந்த வெந்தய கீரை இலைகள் - 1 டேபிள் ஸ்பூன்

* கொத்தமல்லி - சிறிது

செய்முறை:

* முதலில் மிக்ஸியில் தயிர், கடலை மாவு, இதர மசாலாக்கள் மற்றும் உப்பு சேர்த்து நன்கு அரைத்துக் கொள்ள வேண்டும்.

* பின் ஒரு வாணலியை அடுப்பில் வைத்து, அதில் எண்ணெய் ஊற்றி சூடானதும், சீரகம், பட்டை, பிரியாணி இலை சேர்த்து தாளித்துக் கொள்ளவும்.

* பின்பு அதில் வெங்காயத்தை சேர்த்து, பொன்னிறமாக வதக்கவும்.

* அதன் பின் அரைத்த தயிர் கடலை மாவு கலவையை சேர்த்து, தேவையான அளவு நீர் ஊற்றி, நன்கு எண்ணெய் பிரியும் வரை கொதிக்க வைக்க வேண்டும்.

* பிறகு அதில் பன்னீர் துண்டுகள், சர்க்கரை சேர்த்து நன்கு கிளறி விட்டு, குறைவான தீயில் 5 நிமிடம் வேக வைக்கவும்.

* இறுதியில் காய்ந்த வெந்தய கீரை இலைகளை கையால் நசுக்கி மேலே தூவி இறக்கினால், சுவையான தஹி பன்னீர் ரெடி!

Image Courtesy