முட்டைக்கோஸ் பாசிப்பருப்பு பொரியல்

உங்கள் வீட்டில் உள்ளோருக்கு முட்டைக்கோஸ் பிடிக்காதா? எப்படி செய்து கொடுத்தாலும் சாப்பிடமாட்டார்களா? அப்படியானால் இன்று முட்டைக்கோஸை பாசிப்பருப்புடன் சேர்த்து பொரியல் செய்து கொடுங்கள். இந்த முட்டைக்கோஸ் பாசிப்பருப்பு பொரியல் மிகவும் ருசியாக இருக்கும் மற்றும் முட்டைக்கோஸ் சாப்பிடாதவர்கள் கூட இந்த பொரியலை விரும்பி சாப்பிடுவார்கள். அதோடு இதை செய்வதும் மிகவும் சுலபம்.

உங்களுக்கு முட்டைக்கோஸ் பாசிப்பருப்பு பொரியல் எப்படி செய்வதென்று தெரிந்து கொள்ள வேண்டுமா? கீழே முட்டைக்கோஸ் பாசிப்பருப்பு பொரியல் ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

* முட்டைக்கோஸ் - 1 கப் (நறுக்கியது)

* பாசிப்பருப்பு - 3 டேபிள் ஸ்பூன்

* வெங்காயம் - 1 (பொடியாக நறுக்கியது)

* பச்சை மிளகாய் - 2

* உப்பு - சுவைக்கேற்ப

* துருவிய தேங்காய் - சிறிது

தாளிப்பதற்கு...

* கடுகு - 1/4 டீஸ்பூன்

* உளுத்தம் பருப்பு - 1/2 டீஸ்பூன்

* சீரகம் - 1/4 டீஸ்பூன்

* பெருங்காயத் தூள் - 1 சிட்டிகை

* எண்ணெய் - 2 டேபிள் ஸ்பூன்

செய்முறை:

* முதலில் பாசிப்பருப்பை நீரில் 5 நிமிடம் ஊற வைத்து, கழுவிக் கொள்ள வேண்டும்.

* பின்னர் குக்கரில் முட்டைக்கோஸ் மற்றும் பாசிப்பருப்பை போட்டு, சிறிது நீரைத் தெளித்து அடுப்பில் வைத்து, குக்கரை மூடி 1 விசில் விட்டு இறக்கிக் கொள்ள வேண்டும்.

* பின்பு ஒரு வாணலியை அடுப்பில் வைத்து, அதில் எண்ணெய் ஊற்றி சூடானதும், கடுகு, உளுத்தம் பருப்பு, சீரகம், பெருங்காயத் தூள் சேர்த்து தாளிக்க வேண்டும்.

* பிறகு அதில் பச்சை மிளகாயை இரண்டாக கீறி போட்டு வதக்கி, பின் வெங்காயத்தைப் போட்டு சிறிது உப்பு தூவி நன்கு வதக்க வேண்டும்.

* அடுத்து, அதில் வேக வைத்துள்ள முட்டைக்கோஸ் மற்றும் பாசிப்பருப்பை சேர்த்து, சுவைக்கேற்ப உப்பு தூவி நன்கு ஒருசேர விட வேண்டும்.

* இறுதியாக துருவிய தேங்காயை சேர்த்து கிளறி இறக்கினால், சுவையான முட்டைக்கோஸ் பாசிப்பருப்பு பொரியல் தயார்.