பீன்ஸை இந்த மாதிரி பொரியல் செய்யுங்க.. பிடிக்காதவங்க கூட கேட்டு வாங்கி சாப்பிடுவாங்க..

Beans Poriyal Recipe In Tamil: உங்கள் வீட்டில் உள்ளோர் பீன்ஸ் என்றாலே தலைத்தெறிக்க ஓடுவார்களா? அத்தகையவர்களை பீன்ஸ் சாப்பிட வைக்க வேண்டுமா? அப்படியானால் ஒருமுறை அவர்களுக்கு இந்த பக்குவத்தில் பொரியல் செய்து கொடுங்கள்.

இப்படி பொரியலை செய்யும் போது பிடிக்காதவர்கள் கூட கேட்டு விரும்பி சாப்பிடுவார்கள். இந்த பொரியலின் ஸ்பெஷலே, அதில் தனியாக அரைத்து சேர்க்கும் மசாலா தான். இது தான் அந்த பொரியலின் சுவையை கூட்டுகிறது. முக்கியமாக இது குழந்தைகள் விரும்பி சாப்பிடக்கூடியவாறு இருக்கும்.

உங்களுக்கு பீன்ஸ் மசாலா பொரியலை எப்படி செய்வதென்று தெரிந்து கொள்ள வேண்டுமா? கீழே பீன்ஸ் மசாலா பொரியல் ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

வறுத்து அரைப்பதற்கு...

* வரமிளகாய் - 2
* உளுத்தம் பருப்பு - 1 டேபிள் ஸ்பூன்
* மல்லி விதை - 1 டேபிள் ஸ்பூன்
* மிளகு - 1/4 டீஸ்பூன்
* துருவிய தேங்காய் - 3 டேபிள் ஸ்பூன்
* காஷ்மீரி மிளகாய் தூள் - 1/2 டீஸ்பூன்

தாளிப்பதற்கு...

* எண்ணெய் - 1 டேபிள் ஸ்பூன்
* கடுகு - 1/2 டீஸ்பூன்
* சீரகம் - 1/2 டீஸ்பூன்
* வெங்காயம் - 1 (பொடியாக நறுக்கியது)
* கறிவேப்பிலை - 1 கொத்து
* பீன்ஸ் - 250 கிராம் (பொடியாக நறுக்கியது)
* உப்பு - சுவைக்கேற்ப
* மஞ்சள் தூள் - 1/4 டீஸ்பூன்
* தண்ணீர் - சிறிது

செய்முறை:

* முதலில் பீன்ஸை கழுவி, பொடியாக நறுக்கி தனியாக வைத்துக் கொள்ள வேண்டும்.
* பின்னர் ஒரு வாணலியை அடுப்பில் வைத்து, அதில் வரமிளகாய், உளுத்தம் பருப்பு, மிளகு, மல்லி விதை சேர்த்து நன்கு வறுக்க வேண்டும்.
* பின் அதில் துருவிய தேங்காயை சேர்த்து நன்கு வறுத்து இறக்கி குளிர வைக்க வேண்டும்.
* அதன் பின் மிக்சர் ஜாரில் வறுத்து பொருட்களை சேர்த்து, அத்துடன் காஷ்மீரி மிளகாய் தூள் சேர்த்து கொரகொரவென்று அரைத்துக் கொள்ள வேண்டும்.
* பின்பு ஒரு வாணலியை அடுப்பில் வைத்து, அதில் எண்ணெய் ஊற்றி சூடானதும், கடுகு, சீரகம் சேர்த்து தாளிக்க வேண்டும்.
* அடுத்து அதில் பொடியாக நறுக்கிய வெங்காயம், கறிவேப்பிலை சேர்த்து நன்கு வதக்க வேண்டும்.
* பிறகு அதில் பொடியாக நறுக்கிய பீன்ஸை சேர்த்து, சுவைக்கேற்ப உப்பு தூவி, மஞ்சள் தூள் சேர்த்து, 1/2 டம்ளர் நீரை ஊற்றி கிளறி, மூடி வைத்து, மிதமான தீயில் வைத்து, பீன்ஸை நன்கு வேக வைக்க வேண்டும்.
* பீன்ஸ் நன்கு வெந்ததும், அதில் அரைத்து வைத்துள்ள பொடியை சேர்த்து கிளறி, 2 நிமிடம் வேக வைத்து இறக்கினால், சுவையான பீன்ஸ் மசாலா பொரியல் தயார்.