World Heart Day 2026: 1 சிகரெட் அடிச்சா 20 நிமிஷத்துல இதயத்துல என்ன நடக்கும்? - விளக்கும் இதய நிபுணர்!

World Heart Day 2026: நமது உடலில் இதயம் மிகவும் முக்கியமான உறுப்பாகும். ஏனெனில் இது உடலின் அனைத்து பகுதிகளுக்கும் இரத்தம், ஆக்ஸிஜன் மற்றும் ஊட்டச்சத்துக்களை அனுப்புவதோடு, பயன்படுத்தப்பட்ட இரத்தத்தை மீண்டும் நுரையீரலுக்கு அனுப்புவதன் மூலம், கார்பன் டை ஆக்சைடை வடிகட்ட இது உதவுகிறது. இந்த இதயத்தின் ஆரோக்கியம் மற்றும் ஆரோக்கியமான வாழ்க்கை முறைத் தேர்வுகளின் முக்கியத்துவத்தை வலியுறுத்துவதற்காக ஒவ்வொரு ஆண்டும் செப்டம்பர் 29 ஆம் தேதி உலக இதய தினம் கடைப்பிடிக்கப்படுகிறது.

தற்போது புகைப்பிடிக்கும் பழக்கமானது நிறைய பேரிடம் உள்ளது. மேலும் புகைப்பிடித்தல் நுரையீரல் நோய்களுக்கு முக்கிய காரணமாக அடிக்கடி பேசப்படுகிறது. ஆனால், இதய ஆரோக்கியத்தைப் பொறுத்தவரை, பலர் நினைப்பதை விட மிகவும் முன்னதாகவே அதன் பாதிப்புகள் தொடங்கிவிடுகின்றன.

அதுவும் ஒருவர் புகைப்பிடிக்கத் தொடங்கிய உடனேயே இதயமும் இரத்த நாளங்களும் அதற்கு எதிர்வினையாற்றுகின்றன. காலப்போக்கில் இதுபோன்ற பாதிப்புகள் மீண்டும் மீண்டும் ஏற்படுவது, இதய நோய்களின் (Cardiovascular Disease) அபாயத்தை கணிசமாக அதிகரிக்கலாம்.

இன்று உலக இதய தினம் என்பதால், ஒரு சிகரெட் பிடித்த சில நிமிடங்களிலேயே இதயத்திற்குள் என்ன நிகழ்கிறது என்பது குறித்து சென்னையில் உள்ள கிளீனீகிள்ஸ் மருத்துவமனையின் இதய நிபுணரான டாக்டர் கோபு பி அவர்கள் தமிழ் போல்ட்ஸ்கையுடன் பகிர்ந்து கொண்டார்.

அப்போது அவர் கூறியதாவது, "ஒருவர் நீண்ட காலமாக புகைப்பிடித்த பிறகுதான் இதயம் பாதிக்கப்படும் என்பதில்லை. ஒருவர் புகைப்பிடிக்கும் அந்தச் செயலிலிருந்தே இதயத்தின் எதிர்வினை தொடங்குகிறது. நிகோடின், உடலின் சிம்பத்தெடிக் நரம்பு மண்டலத்தை தூண்டுவதன் மூலம் இதயத் துடிப்பு மற்றும் இரத்த அழுத்தத்தை அதிகரிக்கக்கூடும். அதே நேரத்தில், இரத்த நாளங்கள் சுருங்கக்கூடும். இதனால், இதயம் அதிக எதிர்ப்புக்கு எதிராக இரத்தத்தைச் செலுத்த வேண்டிய நிலை ஏற்படுகிறது.

ஏற்கனவே உயர் இரத்த அழுத்தம், சர்க்கரை நோய், உயர் கொலஸ்ட்ரால் அல்லது இதயத் தமனி நோய் போன்ற பாதிப்புகள் உள்ளவர்களுக்கு, இதுபோன்ற மீண்டும் மீண்டும் ஏற்படும் மாற்றங்கள் குறிப்பாக கவலைக்குரியவை. ஒருவர் ஒரு சிகரெட் புகைத்த பிறகு வழக்கத்திற்கு மாறாக எதையும் உணராமல் இருக்கலாம். ஆனால், அறிகுறிகள் இல்லாததால் இதயத்தில் எந்தப் பாதிப்பும் ஏற்படவில்லை என்று அர்த்தமல்ல." என்றார்.

சிகரெட் இதயத்தில் ஏற்படுத்தும் தாக்கம்

"சிகரெட் புகை இரத்த நாளங்களில் ஏற்படுத்தும் தாக்கம் முக்கியமானது. புகைப்பிடித்தல் உடலில் அழற்சி மற்றும் ஆக்ஸிடேட்டிவ் ஸ்ட்ரெஸ் (Oxidative Stress) ஆகியவற்றை அதிகரிக்கிறது. மேலும், இரத்தத் தமனிகளின் உட்புறத்தில் உள்ள மென்மையான படலமான எண்டோதீலியம் (Endothelium) வழக்கமாகச் செயல்படுவதையும் பாதிக்கக்கூடும். இவ்வாறு தொடர்ந்து ஏற்படும் பாதிப்புகள், இரத்த நாளங்களின் ஆரோக்கியம் குறைவதற்கும் , அத்தெரோஸ்க்ளெரோசிஸ் (Atherosclerosis) எனப்படும் தமனித் தடிப்பு உருவாகவும், மேலும் அது தீவிரமடையவும் காரணமாகலாம்.

பிரச்சினை என்னவென்றால், புகைப்பிடித்தல் என்பது பொதுவாக ஒருமுறை மட்டும் நடைபெறும் செயலல்ல. ஒரு சிகரெட் புகைத்த பிறகு இதயத் துடிப்பும் இரத்த அழுத்தமும் தற்காலிகமாக அதிகரிக்கலாம். ஆனால், இதுபோன்ற பாதிப்பு ஒரு நாளில் பல முறை, பல ஆண்டுகளாகத் தொடர்ந்து ஏற்படும் போது காலப்போக்கில், இதயத் தமனி நோய் (Coronary Artery Disease), மாரடைப்பு (Heart Attack) மற்றும் பக்கவாதம் (Stroke) ஆகியவற்றின் அபாயத்தை அதிகரிக்கிறது.

தங்களை 'எப்போதாவது மட்டும் புகைப்பவர்கள்' அல்லது 'குறைவாகப் புகைப்பவர்கள்' (Light Smokers) என்று கூறிக்கொள்பவர்களிடமும் ஒரு தவறான நம்பிக்கையை நான் பார்க்கிறேன். ஒரு நாளைக்கு சில சிகரெட்டுகள் மட்டுமே புகைப்பதால் இதயத்திற்கு பெரிய பாதிப்பு ஏற்படாது என்று அவர்கள் நினைக்கலாம்.

ஆனால், இதய-இரத்த நாள ஆரோக்கியத்தைப் பொறுத்தவரை, புகையிலைப் பயன்பாட்டின் (Tobacco Exposure) பாதுகாப்பான அளவு என்று எதுவும் இல்லை. சிகரெட்டுகளின் எண்ணிக்கையைக் குறைப்பதை விட, புகைப்பிடிப்பதை முழுமையாக நிறுத்துவதே இலக்காக இருக்க வேண்டும். அறிகுறிகள் அல்லது ஒரு நோயைக் கண்டறியும் நிலை வரும் வரை காத்திருக்க வேண்டிய அவசியமில்லை." என்று டாக்டர் கூறினார்.

ஒரு சிகரெட் பிடித்தாலும் மாரடைப்பு ஏற்படுமா?

"ஒரு சிகரெட் புகைத்தவுடன் நேரடியாக மாரடைப்பு ஏற்படும் என பொருள்படும் ஆய்வை பெரிதாக எடுத்துக் கொள்ள வேண்டாம். ஏனெனில் இந்த ஆய்வு சிறிய அளவிலானது; மேலும், இது உடலில் உடனடியாக ஏற்படும் உடலியல் மாற்றங்களை (Immediate Physiological Changes) மட்டுமே ஆய்வு செய்தது. இது நமக்குச் சொல்வது என்னவென்றால், புகையிலைக்கு உட்படும் உடனேயே இதய-இரத்த நாள அமைப்பு எதிர்வினையாற்றுகிறது என்பது தான். அதே நேரத்தில், பல மாதங்கள் மற்றும் ஆண்டுகளாக தொடர்ந்து புகைப்பிடிப்பது, இதய-இரத்த நாளங்களின் மீது ஏற்படும் ஒட்டுமொத்த பாதிப்பை அதிகரிக்கிறது." என்று டாக்டர் கூறினார்.

இதய நிபுணர் மக்களுக்கு வலியுறுத்துவது..

"உலக இதய தினத்தை முன்னிட்டு, புகைப்பிடித்தலை நுரையீரலை மட்டுமே பாதிக்கும் ஒரு பழக்கமாகப் பார்க்காமல், இதயம் மற்றும் இரத்த நாளங்களையும் நேரடியாகப் பாதிக்கும் ஒன்றாக மக்கள் புரிந்து கொள்ள வேண்டும் என்று நான் வலியுறுத்துகிறேன். இதயத்தைப் பாதுகாக்க இரத்த அழுத்தம், கொழுப்புச்சத்து மற்றும் இரத்தச் சர்க்கரை அளவைக் கட்டுப்படுத்துவதில் நாம் தொடர்ந்து கவனம் செலுத்துகிறோம்.

அதே அளவிலான முக்கியத்துவத்தை புகைப்பிடிப்பதை நிறுத்துவதற்கும் (Smoking Cessation) வழங்க வேண்டும். ஏனெனில், இதன் மூலம் இதய-இரத்த நாள அமைப்பின் மீது தொடர்ந்து ஏற்படும் முக்கியமான அழுத்தங்களில் ஒன்றை நீக்க முடியும்.

பல ஆண்டுகளாகப் புகைப்பிடித்து வருபவர்கள் கூட, புகைப்பிடிப்பதை நிறுத்துவதற்கு ஒருபோதும் தாமதமாகிவிடவில்லை. புகைப்பிடிப்பதை நிறுத்தும் முடிவு, நீண்ட கால இதய ஆரோக்கியத்திற்காக ஒருவர் எடுக்கக்கூடிய மிக முக்கியமான நடவடிக்கைகளில் ஒன்றாகும். புகைப்பிடிப்பதை நிறுத்துவது கடினமாக இருந்தால், மருத்துவ உதவியை நாடுங்கள்." என்றார்.