உங்களுக்கு எந்த கலர்-ல சளி வருதுன்னு சொல்லுங்க.. உங்க ஆரோக்கியத்தை பத்தி ஒன்னு சொல்றோம்...

வெள்ளை நிறம்

வெள்ளை நிறத்தில் சளி வந்தால், அது சாதாரணம் மற்றும் எந்த ஒரு அபாயமும் இல்லை. ஏனெனில் இம்மாதிரியான சளியானது மூச்சுக்குழாய் அழற்சி மற்றும் மூக்கடைப்பின் காரணமாக வரும். பொதுவாக நாசிப்பாதையானது வீக்கமடையும் போது, சுவாசப் பாதையில் உள்ள சளி நகர முடியாமல் இறுக்கமடைந்து வெள்ளை நிறத்தில் மாறும். இதனாலேயே வெள்ளை நிற சளி வெளிவருகிறது.

மஞ்சள் அல்லது பச்சை நிற சளி

சளி பச்சை அல்லது மஞ்சள் நிறத்தில் வந்தால், உடலானது வைரஸ் அல்லது பாக்டீரியா தொற்றுக்களை எதிர்த்துப் போராடிக் கொண்டிருக்கிறது என்று அர்த்தம். பொதுவாக இரத்த வெள்ளையணுக்கள் தான் நோய்த்தொற்றுக்களை எதிர்த்துப் போராடுகிறது. இவை சளியில் இருந்து எடுக்கப்படுவதால், கிருமிகளை எதிர்த்துப் போராடும் போது, அவை மஞ்சள் அல்லது பச்சை நிறத்தில் மாறுகிறது.

சிவப்பு நிற சளி

ஒருவருக்கு சளி சிவப்பு நிறத்தில் வந்தால், அது உடனே கவனிக்கப்பட வேண்டியதை குறிக்கிறது. ஏனெனில் இம்மாதிரி அடர் சிவப்பு நிறத்தில் வரும் சளி நுரையீரலில் இருந்து வரலாம். மேலும் இது மார்பு தொற்று அல்லது நுரையீல் கட்டியின் அறிகுறியாகவும் இருக்கலாம். எனவே உங்களுக்கு இம்மாதிரி சிவப்பு நிறத்தில் சளி வந்தால், தாமதிக்காமல் உடனே மருத்துவரை அணுகுங்கள்.

பிங்க் நிற சளி

பிங்க் நிறத்தில் சளி வந்தால், அது நுரையீரலில் திரவம் தேங்கி இருக்கும் நிலையான நுரையீரல் வீக்கம் இருப்பதைக் குறிக்கலாம். இம்மாதிரியான நுரையீரல் வீக்க பிரச்சனை கொண்டவர்கள் நுரை போன்ற சளியை வெளியிட நேரிடும். மேலும் இப்பிரச்சனை மூச்சுத்திணறல் அல்லது சில இதய செயலிழப்புக்கு வழிவகுக்கும்.

கருப்பு நிற சளி

ஒருவருக்கு சளியானது கருப்பு நிறத்தில் வந்தால், அது தூசி அல்லது அழுக்கு நிற காற்றினை சுவாசிப்பதால் வரக்கூடும். இது தவிர புகைப்பிடிக்கும் பழக்கம் இருந்தாலும், கருப்பு நிற சளியை வெளியிட நேரிடும்.

ப்ரௌன் நிற சளி

யாரெல்லாம் புகைப்பிடிக்கிறார்களோ அவர்களுக்கு ப்ரௌன் நிற சளி வர வாய்ப்புள்ளது. நெருப்பு புகை அல்லது மாசடைந்த காற்றினை சுவாசிப்பதனாலும் ப்ரௌன் நிற சளி வரலாம். மேலும் இது நிமோனியாவின் அறிகுறியாகவும் இருக்கலாம். எனவே உங்களுக்கு இந்த மாதிரியான நிறத்தில் சளி வந்தால், உடனே மருத்துவரை அணுகி பரிசோதனை செய்யுங்கள்.