தூங்கி எழுந்தாலும் நீங்க கண்ட கனவு ஞாபகத்துல இருக்கணுமா? அப்ப தூங்கும் முன் இத சாப்பிடுங்க...

ஆஸ்திரேலியா ஆய்வு

ஆஸ்திரேலியாவின் அடிலெய்ட் பல்கலைக்கழகத்தால் ஒரு ஆய்வு மேற்கொள்ளப்பட்டது. இந்த ஆய்வில் சுமார் 100 பேர் கலந்து கொண்டனர். அதில் பங்கேற்றவர்களுக்கு இரவு தூங்குவதற்கு முன் 240 மி.கி வைட்டமின் பி6 சப்ளிமெண்ட் தொடர்ச்சியாக 5 நாட்கள் கொடுக்கப்பட்டது. அப்படி வைட்டமின் பி6 சப்ளிமெண்டுகளை எடுத்துக் கொண்டவர்களின் கனவை நினைவுப்படுத்தும் திறனில் முன்னேற்றம் இருப்பதாக ஆய்வாளர்கள் தெரிவித்தனர். அதோடு சப்ளிமெண்டுகளை எடுத்துக் கொண்டது பங்கேற்பாளரின் தெளிவான தன்மை, கனவில் வினோதம் அல்லது தூக்க முறைகளின் பிற அம்சங்களைப் பாதிக்காது என்றும் ஆய்வாளர்கள் குறிப்பிட்டனர்.

இருப்பினும் இந்த ஊட்டச்சத்து எவ்வாறு கனவை நினைவுப்படுத்துவதற்கு உதவியது என்பதை அவர்களால் புரிந்து கொள்ள முடியவில்லை. இதன் பின்னணியில் உள்ள மர்மத்தை அறிய கூடுதல் ஆராய்ச்சியையும் மேற்கொள்ளவிருப்பதாகவும் தெரிவித்தனர்.

வைட்டமின் பி6

வைட்டமின் பி6 என்பது வைட்டமின் பி காம்ப்ளக்ஸ் குழுவில் உள்ள 8 வைட்டமின்களுள் ஒன்றாகும். பைரிடாக்சின் என்று அழைக்கப்படும் இந்த நீரில் கரையக்கூடிய வைட்டமின் உடல் ஆரோக்கியத்தைப் பேணுவதற்கும், மூளையின் ஆரோக்கியத்தை மேம்படுத்துவதிலும் முக்கிய பங்கை வகிக்கிறது. வைட்டமின் பி6, மற்ற பி வைட்டமின்களுடன் சேர்ந்து, உணவில் இருந்து புரோட்டீன், கார்போஹைட்ரேட் மற்றும் கொழுப்பை பதப்படுத்த உடலுக்கு உதவுகிறது. மேலும் இந்த வைட்டமின் நரம்பு மண்டலத்தின் செயல்பாடு மற்றும் நோயெதிர்ப்பு ஆரோக்கியத்திற்கும் முக்கியமானது.

நமது உடலால் வைட்டமின் பி6-ஐ உற்பத்தி செய்ய முடியாததால், அதை வெவ்வேறு மூலங்களில் இருந்து தான் பெற வேண்டும். வைட்டமின் பி6 நீரில் கரையக்கூடியது. இது உடலில் பெரிய அளவில் சேமிக்கப்படுவதில்லை என்பதால், இந்த வைட்டமின் எளிதில் உடலில் இருந்து வெளியேறிவிடும்.

வைட்டமின் பி6 உணவுகள்

வைட்டமின் பி6 ஆனது பீன்ஸ், கோழி, மீன், வலுவூட்டப்பட்ட தானியங்கள், அடர் பச்சை நிற கீரைகள், பப்பாளி, ஆரஞ்சு, முலாம் பழம், வாழைப்பழம், அவகேடோ, பசலைக்கீரை, உருளைக்கிழங்கு, பால், சீஸ், முட்டை, மாட்டிறைச்சி, ஈரல் போன்றவற்றில் அதிகமாக நிறைந்துள்ளது.

ஒரு கப் வேக வைத்த கிட்னி பீன்ஸில் 0.2 மி.கி வைட்டமின் பி6 உள்ளது. அதேப் போல் ஒரு பெரிய ஆரஞ்சு பழத்தில் 0.1 மி.கி வைட்டமின் பி6 உள்ளது.

ஒரு நாளைக்கு எவ்வளவு தேவை?

வயது வந்த ஆண்களுக்கும், 50 வயது வரையிலான பெண்களுக்கும் ஒரு நாளைக்கு 1.3 மில்லிகிராம் வைட்டமின் பி6 தேவைப்படுகிறது. அமெரிக்க தேசிய மருத்துவ நூலகத்தின் படி, 50 வயதிற்கு மேலான ஆண்களுக்கு 1.7 மி.கி அளவும், 50 வயதிற்கு மேலான பெண்களுக்கு ஒரு நாளைக்கு 1.5 மி.கி அளவும் தேவைப்படுகிறது.

வைட்டமின் பி6 குறைபாடு

வைட்டமின் பி6 சிறிய குறைபாடு ஏற்படுவது பொதுவானது. ஆனால் இச்சத்தில் பெரிய குறைபாடு என்பது அரிதானது. பெரும்பாலும் வைட்டமின் பி6 குறைபாடு குழந்தைகள், முதியவர்கள் மற்றும் குறைந்த அளவு வைட்டமின் பி6-ஐ ஏற்படுத்தக்கூடிய சில மருந்துகளை உட்கொள்பவர்களில் காணப்படுகிறது.

யாருக்கெல்லாம் வைட்டமின் பி6 குறைபாடு ஏற்படலாம்?

சிறுநீரக நோய், குடிப்பழக்கம், ஹைப்பர் தைராய்டிசம், முடக்கு வாதம் போன்ற ஆட்டோ இம்யூன் கோளாறுகள் மற்றும் செலியாக் நோய் அல்லது கிரோன் நோய் போன்ற அழற்சி குடல் நோய்கள் உள்ளவர்களுக்கு இச்சத்து குறைபாடு ஏற்படலாம். இத்தகையவர்களுக்கு உணவுப் பொருட்களில் இருந்து இச்சத்தை உறிஞ்சுவதில் சிக்கல் இருப்பதால் தான் இப்பிரச்சனை ஏற்படுகிறது.

வைட்டமின் பி6 குறைபாட்டின் அறிகுறிகள்

ஒருவருக்கு வைட்டமின் பி6 மிகவும் குறைவாக இருந்தால் வெளிப்படும் அறிகுறிகள் பின்வருமாறு:

* பலவீனமான நோயெதிர்ப்பு சக்தி

* இரத்த சோகை

* சரும அரிப்பு மற்றும் தடிப்புகள்

* உதடுகளில் தோல் உரிவது

* வாயின் மூலைகளில் வெடிப்புகள்/விரிசல்

* நாக்கு வீக்கம்

* வைட்டமின் பி6 மிக மிக குறைவாக இருந்தால், அது மனச்சோர்வு மற்றும் குழப்பத்தை ஏற்படுத்தக்கூடும்.

வைட்டமின் பி6 ஒருசில மருந்துகளுடன் தொடர்பு கொள்ளலாம். எனவே, பைரிடாக்சின் சப்ளிமெண்ட் எடுப்பதற்கு முன்பு எப்போதும் உங்கள் மருத்துவரிடம் கலந்துரையாடுங்கள்.