தேங்காய் டீ பற்றி கேள்விப்பட்டதுண்டா? அதன் நன்மைகள் என்ன மற்றும் அதை தயாரிப்பது எப்படி?

தேங்காயில் உள்ள சத்துக்கள்

தேங்காயில் சாச்சுரேட்டட் கொழுப்புக்கள் அதிகம் உள்ளன. இது தவிர, அதில் லாரிக் அமிலம், வைட்டமின் சி, மக்னீசியம், இரும்புச்சத்து, பொட்டாசியம் மற்றும் நார்ச்சத்து போன்றவை அதிகம் உள்ளன. இச்சத்துக்கள் அனைத்துமே உடல் ஆரோக்கியத்திற்கு தேவையான சத்துக்களாகும்.

சருமத்திற்கு நல்லது

தேங்காய் இயற்கையாகவே சருமத்திற்கு நல்ல பாதுகாப்பை வழங்கும். ஏனெனில் இது ஆரோக்கியமான கொழுப்புக்களும், ஆன்டி-ஆக்ஸிடன்ட்டுகளும் அதிகளவில் உள்ளன. ஆகவே தேங்காயை எந்த வடிவில் உட்கொண்டாலும், அதில் உள்ள சத்துக்கள் உடலுக்கு கிடைக்கும்.

நோயெதிர்ப்பு சக்தி வலுபெறும்

க்ரீன் டீயைக் கொண்டு தயாரிக்கப்படும் தேங்காய் டீயை குடித்தால், நோயெதிர்ப்பு மண்டலம் வலிமையாகும். ஏனெனில் தேங்காயில் வைட்டமின் சி அதிகம் உள்ளது. ஆகவே உங்கள் நோயெதிர்ப்பு சக்தியை மேம்படுத்த தேங்காய் டீ பெரிதும் உதவும்.

எடை இழப்பிற்கு உதவும்

நீங்கள் எடையை குறைக்கும் முயற்சியில் ஈடுபட்டிருந்தால், தேங்காய் டீ குடியுங்கள். ஏனெனில் இந்த டீ உடலின் மெட்டபாலிசத்தை ஊக்குவித்து கொழுப்பைக் குறைக்கும் செயல்முறையை வேகப்படுத்தும்.

இதயத்திற்கு நல்லது

தேங்காயில் நல்ல கொழுப்புக்கள் மற்றும் லாரிக் அமிலம் அதிகம் உள்ளது. இது உயர் இரத்த அழுத்தம் மற்றும் கரோனரி இதய நோயில் இருந்து பாதுகாக்க உதவும். ஆகவே தேங்காயை அப்படியே சாப்பிட்டாலும் சரி, அதைக் கொண்டு டீ தயாரித்துக் குடித்து வந்தாலும், இதய நோயின் அபாயத்தில் இருந்து தப்பிக்கலாம்.

தேங்காய் டீ தயாரிப்பது எப்படி?

* தேங்காய் டீ தயாரிப்பதற்கு முதலில் ஒரு பாத்திரத்தில் 4 கப் நீரை ஊற்றி கொதிக்க வைக்க வேண்டும்.

* பின் அதில் 3 க்ரீன் டீ பேக்கை சேர்க்க வேண்டும்.

* பின்பு அதில் 1/2 கப் தேங்காய் பால் மற்றும் 2 டேபிள் ஸ்பூன் க்ரீம் சேர்த்து நன்கு கலந்து, க்ரீன் டீ பேக்குகளை நீக்கிவிட வேண்டும்.

* விருப்பமுள்ளவர்கள், இந்த டீயுடன் ஒரு டீஸ்பூன் பனங்கற்கண்டு சேர்த்துக் கொள்ளலாம்.

தேங்காய் டீயின் சில பக்கவிளைவுகள்

தேங்காய் டீயை ஒருவர் அளவுக்கு அதிகமாக குடித்தால், அது செரிமான பிரச்சனைகளை உண்டாக்குவதாக ஆய்வு ஒன்று தெரிவிக்கிறது. இது தவிர, கர்ப்பிணிப் பெண்கள் அல்லது தாய்ப்பால் கொடுக்கும் பெண்கள் தேங்காய் டீ அதிகம் குடிப்பதைத் தவிர்க்க வேண்டும்.