தினமும் இளநீர் குடிப்பீங்களா? அப்ப இந்த அளவுக்கு மேல குடிக்காதீங்க.. இல்லன்னா பல பிரச்சனைகளை சந்திப்பீங்க...

கலோரிகள் அதிகம்

இளநீரில் கலோரிகள் அதிகளவில் இருப்பது பெரும்பாலானோருக்கு தெரிவதில்லை. என்ன தான் இளநீரில் மற்ற பழச்சாறுகள் மற்றும் பிற பானங்களை விட சர்க்கரை குறைவாக இருந்தாலும், இவற்றில் கலோரிகள் அதிகளவில் உள்ளன. எனவே நீங்கள் எடையைக் குறைக்கும் டயட்டில் இருந்தால், அதிகமாக இளநீரைக் குடிக்காதீர்கள்.

அடிக்கடி சிறுநீர் கழிக்க நேரிடும்

இளநீரில் டையூரிக் பண்புகள் அதிகளவில் உள்ளன. எனவே இளநீரை அதிகம் குடித்தால், அதன் விளைவாக அடிக்கடி சிறுநீர் கழிக்க நேரிடும். அதுவே அளவாக குடித்து வந்தால், அது உடலுக்கு நீரேற்றத்தையும், ஆற்றலையும் மட்டுமே வழங்கும். எனவே கவனமாக இருங்கள்.

உடற்பயிற்சி பின் குடிக்கக்கூடாது

கடுமையான உடற்பயிற்சி செய்து முடித்த பின் உடலானது வறட்சியடைந்து இருக்கும். இம்மாதிரியான சூழ்நிலையில் உடனே இளநீரைக் குடிக்கக் கூடாது. எப்போதுமே உடற்பயிற்சிக்கு பின் நீரைக் குடிப்பது தான் நல்லது. மேலும் அளவுக்கு அதிகமான தாகத்தில் இருக்கும் போது, இளநீரைக் குடிப்பது நல்லதல்ல. ஏனெனில் அதிகமான தாகத்தில் ஒன்றிற்கு இரண்டு இளநீரைக் குடிக்க நேரிடும். இது உடல் ஆரோக்கியத்திற்கு நல்லதல்ல.

சில வகையான அழற்சி இருப்பவர்கள் குடிக்கக்கூடாது

உங்களுக்கு பழம் அல்லது நட்ஸ் அழற்சி இருந்தால், இளநீரைக் குடிப்பதன் மூலம் அழற்சி ஏற்படுவதற்கான வாய்ப்புள்ளது. ஏனெனில் இளநீரும் இந்த வகையை சேர்ந்தது என்பதால், இது அழற்சியை மோசமாக்கி, சில சமயங்களில் கடுமையானதாக மாற வாய்ப்புள்ளது.

இரத்த சர்க்கரை அதிகரிக்கலாம்

இளநீரில் சர்க்கரை குறைவாக இருக்கலாம். ஆனால் கலோரிகள் மற்றும் கார்போஹைட்ரேட்டுகள் அதிகம் உள்ளன. இவை இரண்டும் சர்க்கரை நோயாளிகளுக்கு நல்லதல்ல. அதற்காக சர்க்கரை நோயாளிகள் இளநீரைக் குடிக்கக்கூடாது என்பதில்லை, அளவாக அதுவும் எப்போதாவது குடிக்கலாம்.

இரத்த அழுத்தத்தை மிகவும் குறைக்கலாம்

உயர் இரத்த அழுத்த நோயாளிகளுக்கு இளநீர் ஆபத்தானது. அதுவும் இரத்த அழுத்தத்திற்கு மாத்திரைகளை எடுத்து வருபவராயின், இளநீரைக் குடிக்கக்கூடாது. இல்லாவிட்டால், அது இரத்த அழுத்தத்தை அளவுக்கு அதிகமாக குறைத்துவிடும். எனவே பிபி நோயாளிகள் இளநீரைக் குடிப்பதாக இருந்தால், மருத்துவரிடம் அனுமதி பெற்ற பின்னரே குடிக்க வேண்டும்.

எலக்ட்ரோலைட் சமநிலையின்மையை ஏற்படுத்தும்

இளநீரில் சோடியம் குறைவாகவும், பொட்டாசியம் அதிகமாகவும் உள்ளன. எனவே ஒருவர் இளநீரை அதிகம் குடிக்கும் போது, அந்நபரின் உடலில் பொட்டாசியத்தின் அளவு அதிகரித்து, எலக்ட்ரோலைட் சமநிலையின்மையை ஏற்படுத்தி, கடுமையான ஆரோக்கிய பிரச்சனைகளை வரவழைத்துவிடும். மேலும் வெயிலில் அதிகமாக சுற்றுபவர்கள், இளநீரை குடிப்பதில் கவனமாக இருக்க வேண்டும். ஏனெனில் ஹைபர்கேமியா என்னும் நிலையால் மயக்கமடைய வாய்ப்புள்ளது.