Mothers Day 2026: உங்க அம்மாவுக்கு இந்த 'உயிர்காக்கும் மருத்துவ பரிசோதனைகள்' பரிசா குடுங்க.. ஹேப்பி ஆவாங்க..

Mothers Day 2026: ஒவ்வொரு ஆண்டும் மே மாதத்தில் வரும் இரண்டாவது ஞாயிற்றுக்கிழமை அன்னையர் தினம் கொண்டாடப்பட்டு வருகிறது. இந்நாளில் பலரும் அம்மாக்களுக்கு சாக்லேட்டுகள், பூக்கள் மற்றும் அவருக்கு பிடித்ததை பரிசாக கொடுத்து கொண்டாடுவது வழக்கம். ஆனால் தற்போது அதிகரித்து வரும் நோய்கள் மற்றும் ஆரோக்கிய பிரச்சனைகளைப் பார்க்கும் போது, ஒவ்வொரு அம்மாவுக்கும் அவர்களது பிள்ளைகள் அளிக்கக்கூடிய மிகவும் அர்த்தமுள்ள பரிசு என்றால் அது நல்ல ஆரோக்கியம் தான். உங்கள் அம்மா நீண்ட காலம் ஆரோக்கியமாக நோயின்றி வாழ வேண்டுமானால், அவர்களுக்கு ஒருசில சுகாதார பரிசோதனைகளை ஆண்டுதோறும் செய்து பார்க்க வேண்டியது மிகவும் அவசியம்.

பொதுவாக அம்மாக்கள் பலரும் தங்கள் குடும்பத்தை கவனித்துக் கொள்ளும் அளவில், தங்கள் ஆரோக்கியத்தின் மீது கவனம் செலுத்துவதில்லை. அதோடு தங்களுக்கு ஏதாவது உடல்நலம் சரியில்லாவிட்டாலும், அதை பொருட்படுத்தாமல், குடும்பத்தினரின் தேவையை சரிவர செய்ய முனைகின்றனர். சொல்லப்போனால் பல அம்மாக்கள் தாங்கள் சந்திக்கும் பிரச்சனைகளை கூட வெளியே சொல்லிக் கொள்வதில்லை. இதனால் நிலைமை முற்றிய நிலையில் மருத்துவரை அணுகி, சிகிச்சை அளிப்பது கடினமாக உள்ளது.

ஆனால் வழக்கமான மருத்துவ பரிசோதனைகளை செய்யும் போது, நீரிழிவு நோய், இதய நோய், எலும்புப்புரை, மார்பகப் புற்றுநோய் மற்றும் தைராய்டு கோளாறுகள் போன்ற நோய்கள் இருந்தால், அவற்றை ஆரம்பத்திலேயே கண்டறிந்து சிகிச்சை அளிக்க பயனுள்ளதாக இருக்கும். அதுவும் 40 வயதிற்கு மேற்பட்ட பெண்கள், இந்த பரிசோதனைகளை தாங்கள் முற்றிலும் ஆரோக்கியமாக உணர்ந்தாலும் செய்து பார்க்க வேண்டும்.

ஏனெனில் வயது அதிகரிக்கும் போது உடலினுள் ஹார்மோன் மாற்றங்கள், வாழ்க்கை முறை நோய்கள் போன்றவை யாருக்கும் தெரியாமல் உருவாகலாம். அதுவும் அப்படி உருவாகும் நோய்கள் அறிகுறிகளை வெளிப்படுத்தினாலும், அவற்றை பல பெண்கள் சாதாரணமாக எடுத்துக் கொண்டு புறக்கணித்துவிடுகிறார்கள். ஆனால் மருத்துவ பரிசோதனைகளை சீரான இடைவெளியில் செய்யும் போது ஆரம்பத்திலேயே நோய்களை கண்டறிந்து சிகிச்சை அளிக்கவும் முடியும், பிற்காலத்தில் மருத்துவ செலவுகளையும், சிக்கல்களையும் குறைக்கவும் முடியும்.

எனவே இந்த அன்னையர் தினத்தில் உங்கள் அம்மாவின் ஆரோக்கியம் சிறப்பாக இருக்க நினைத்தால், அவர்களுக்கு பின்வரும் பரிசோதனைகள் நிறைந்த ஒரு உயிர்காக்கும் மருத்துவ பரிசோதனை பேக்கேஜ்ஜை பரிசாக கொடுங்கள். இப்போது வருடாந்திரம் எந்தெந்த பரிசோதனைகளை ஒவ்வொரு பெண்ணும்/அம்மாவும் செய்ய வேண்டும் என்பதைக் காண்போம்.

1. பிபி மற்றும் இதய ஆரோக்கிய பரிசோதனை

உலகளவில் பெண்களிடையே ஏற்படும் இறப்புகளுக்கு முக்கிய காரணங்களுள் ஒன்றாக இதய நோய் உள்ளது. இப்படிப்பட்ட இதய நோயை ஒரு எளிய இரத்த அழுத்தப் பரிசோதனை, கொலஸ்ட்ரால் அளவு, இதயச் செயலிழப்புப் படம் (ECG) மற்றும் இதய மதிப்பீடு ஆகியவற்றை பரிசோதிப்பதன் மூலம் ஆரம்பத்திலேயே கண்டறியலாம். அதுவும் சர்க்கரை நோய், உடல் பருமன், புகைப்பழக்கம் அல்லது பரம்பரையில் இதய நோய் உள்ள அம்மாக்கள், இந்த பரிசோதனைகளை வழக்கமாக செய்ய மருத்துவர்கள் பரிந்துரைக்கின்றனர்.

2. மேமோகிராபி

பெண்களுக்கு ஏற்படும் பொதுவான புற்றுநோய்களுள் மார்பக புற்றுநோயும் ஒன்றாகும். அதுவும் 40 வயதிற்கு மேற்பட்ட பெண்களுக்கு, குறிப்பாக பரம்பரையில் மார்பக புற்றுநோய் உள்ளவர்களுக்கு இந்த புற்றுநோயின் அபாயம் அதிகம் உள்ளது. எனவே இத்தகையவர்களை மேமோகிராம் பரிசோதனையை செய்ய மருத்துவர்கள் பரிந்துரைப்பார்கள். வழக்கமான மார்பக புற்றுநோய் பரிசோதனையை செய்வதன் மூலம், ஆரம்பத்திலேயே கட்டிகளை கண்டறிந்து, உயிர்பிழைக்கும் விகிதத்தை அதிகரிக்கலாம்.

3. சர்க்கரை நோய் பரிசோதனை

சர்க்கரை நோயாளிகளின் எண்ணிக்கை நாளுக்கு நாள் அதிகரிக்கிறது. வெறும் வயிற்றில் எடுக்கப்படும் இரத்த சர்க்கரை பரிசோதனை மற்றும் HbA1c பரிசோதனை ஆகியவை, நீரிழிவு நோய்க்கு முந்தைய நிலை அல்லது நீரிழிவு நோயை ஆரம்பத்திலேயே கண்டறிய உதவும். பல பெண்களுக்கு சர்க்கரை நோய் தீவிரமாகும் வரை அறிகுறிகள் தெரியாமல் இருக்கலாம். இருப்பினும் ஆரம்பத்திலேயே சர்க்கரை நோயை கண்டறிந்தால், சிறுநீரகங்கள், கண்கள், நரம்புகள் மற்றும் இதயத்தைப் பாதுகாக்கலாம்.

4. எலும்பு அடர்த்தி சோதனை

பெண்களிடையே ஆஸ்டியோபோரோசிஸ் பிரச்சனை அதிகரிக்கிறது. அதுவும் மாதவிடாய் நின்ற பெண்களின் உடலில் ஈஸ்ட்ரோஜென் அளவு குறைவதால், ஆஸ்டியோபோரோசிஸ் அபாயம் அதிகரிக்கிறது. இந்நிலையில் எலும்பு அடர்த்தி பரிசோதனையை செய்வது, எலும்பின் வலிமையையும் எலும்பு முறிவு அபாயத்தையும் மதிப்பிட உதவுகிறது.

5. தைராய்டு சோதனை

இந்திய பெண்களிடையே காணப்படும் மிகவும் பொதுவான பிரச்சனைகளுள் ஒன்று தைராய்டு. காரணமின்றி உடல் எடை அதிகரித்தல், முடி உதிர்தல், சோர்வு, மனநிலை மாற்றங்கள் மற்றும் ஒழுங்கற்ற தூக்கம் போன்றவை தைராய்டு பிரச்சனையின் அறிகுறிகள் ஆகும். இந்நிலையில் ஒரு சிம்பிளான தைராய்டு பரிசோதனையை செய்வதனால், ஹைப்போதைராய்டிசம் அல்லது ஹைப்பர்தைராய்டிசத்தை முன்கூட்டியே கண்டறியலாம்.

6. கர்ப்பப்பை வாய் புற்றுநோய் பரிசோதனை

30 வயதிற்கு மேற்பட்ட பெண்கள் அவசியம் பாப் ஸ்மியர் பரிசோதனையும் HPV பரிசோதனையும் செய்ய வேண்டும் என்று மருத்துவர்கள் கூறுகின்றனர். இந்த வகை பரிசோதனையை செய்வதன் மூலம், ஆரம்பத்திலேயே இந்த புற்றுநோயை கண்டறிந்து, சிகிச்சை அளித்து தடுக்க முடியும்.

எனவே நண்பர்களே! உங்கள் அம்மாவிற்கு சாக்லேட், பூக்கள் என்று பரிசை கொடுப்பதற்கு பதிலாக, அவர்களின் ஆரோக்கியத்தில் அக்கறை கொண்டு, அவர்களுக்கு ஒரு உயிர்காக்கும் மருத்துவ பரிசோதனை பேக்கேஜ்ஜை பரிசாக கொடுங்கள்.

(பொறுப்புத் துறப்பு: மேலே கொடுக்கப்பட்டுள்ள தகவல் இணையத்தில் கிடைக்கும் அனுமானங்கள் மற்றும் தகவல்களின் அடிப்படையில் கொடுக்கப்பட்டுள்ளன மற்றும் நம்பகத்தன்மைக்கு உத்தரவாதம் இல்லை. தமிழ் போல்ட்ஸ்கை இக்கட்டுரை தொடர்பான தகவலை உறுதிப்படுத்தவில்லை. பிப்ரவரிலும் எங்கள் ஒரே நோக்கம் தகவலை வழங்குவது மட்டுமே. அதை வெறும் தகவலாக மட்டும் எடுத்துக் கொள்ள வேண்டும். எந்தவொரு தகவலையும் அனுமானத்தையும் பயிற்சி செய்வதற்கு அல்லது செயல்படுத்துவதற்கு முன், தயவுசெய்து சம்பந்தப்பட்ட நிபுணரை அணுகவும்.)