இந்தியாவின் 'அரிசித் தலைநகரம்' என்று அழைக்கப்படும் மாநிலம் எது தெரியுமா? தென்னிந்திய மாநிலம் எதுவும் இல்லையாம்

இந்தியாவின் பிரதான உணவுகளில் அரிசி முதன்மையான உணவாகும். இந்தியாவில் கோடிக்கணக்கான மக்கள் தினமும் அரிசியை தங்கள் உணவாக உட்கொள்கின்றனர். சாதகமான வானிலை, வளமான மண் மற்றும் போதுமான நீர் வசதி காரணமாக, இந்தியாவின் பல மாநிலங்களில் நெல் பயிரிடப்படுகிறது. சில மாநிலங்கள் மிக அதிக அளவில் அரிசியை உற்பத்தி செய்கின்றன. குறிப்பாக தென்னிந்தியாவில் அனைத்து மாநிலங்களும் அரிசியை அதிகளவில் பயிரிடுகின்றன.

ஆனால் இந்தியாவின் 'அரிசித் தலைநகரம்' அல்லது 'இந்தியாவின் அரிசிக் கிண்ணம்' என்று அழைக்கப்படுவது எந்த தென்னிந்திய மாநிலமும் அல்ல. இந்த மாநிலம் இந்தியாவின் உணவு வழங்கலிலும், வேளாண் பொருளாதாரத்திலும் முக்கியப் பங்கு வகிக்கிறது. இந்த பதிவில் இந்தியாவின் அரிசித் தலைநகரம் என்று அழைக்கப்படும் மாநிலம் எதுவென்று தெரிந்து கொள்ளலாம்.

இந்தியாவின் 'அரிசித் தலைநகரம்' எது?

அரிசியை அதிகம் உட்கொள்ளும் எந்த தென்னிந்திய மாநிலமும் அல்லாமல் மேற்கு வங்கம் இந்தியாவின் 'அரிசித் தலைநகரம்' என்று அழைக்கப்படுகிறது. நாட்டின் மற்ற எந்த மாநிலத்தை விடவும் இங்கு அதிக அளவில் அரிசி உற்பத்தி செய்யப்படுகிறது; இதன் மூலம் இந்தியாவின் ஒட்டுமொத்த அரிசி உற்பத்தியில் மேற்கு வங்கம் முதன்மையான பங்களிப்பை வழங்குகிறது. வளமான மண், அதிக மழைப்பொழிவு மற்றும் சாதகமான வெப்பநிலை ஆகியவை மேற்கு வங்கம் முழுவதும் பெருமளவில் நெல் சாகுபடி செய்யத் துணைபுரிகின்றன. மேற்கு வங்கத்தில் நெல் சாகுபடி ஒரு முக்கியத் தொழிலாக விளங்குவதுடன், லட்சக்கணக்கான விவசாயிகளின் வாழ்வாதாரமாகவும் விளங்குகிறது.

மேற்கு வங்கம் ஏன் இந்தியாவின் 'அரிசித் தலைநகரம்' என்று அழைக்கப்படுகிறது?

மேற்கு வங்கம் ஒவ்வொரு ஆண்டும் தொடர்ந்து அதிக அளவில் அரிசியை உற்பத்தி செய்வதால், அது 'அரிசித் தலைநகரம்' என்று அழைக்கப்படுகிறது. மேற்கு வங்கத்தில் பாயும் கங்கை நதியால் உருவாக்கப்பட்ட வளமான சமவெளிகள், பயிர்கள் நன்கு வளர்வதற்குத் தேவையான சத்துக்கள் நிறைந்த மண்ணை வழங்குகின்றன. மேலும், இந்த மாநிலத்தில் போதிய அளவு மழையும் கிடைக்கிறது, இது நெல் சாகுபடிக்கு மிகவும் தேவையான ஒன்றாகும். தென் மாநிலங்களைப் போல அல்லாமல் மேற்கு வங்க விவசாயிகள் ஆண்டுக்கு பல பருவங்களில் நெல் பயிரிடுவதால், ஒட்டுமொத்த அரிசி உற்பத்தி அதிகரிக்கிறது.

எந்தெந்த மாநிலங்கள் அதிகம் நெல் உற்பத்தி செய்கின்றன?

மேற்கு வங்கம் இந்தியாவில் அதிக நெல் உற்பத்தியில் முதலிடத்தில் உள்ளது. நாட்டின் மொத்த நெல் உற்பத்தியில் பெரும் பங்கினை இந்த மாநிலம் ஒவ்வொரு ஆண்டும் வழங்குகிறது. உத்தரப் பிரதேசம், பஞ்சாப், ஆந்திரப் பிரதேசம் மற்றும் சத்தீஸ்கர் ஆகிய மாநிலங்களும் நெல் உற்பத்தியில் முக்கியப் பங்கு வகிக்கின்றன; இங்கும் நெல் பெருமளவில் பயிரிடப்படுகிறது.

இந்தியாவின் 'அரிசிக் கிண்ணம்' எது?

நமது அண்டை மாநிலமான ஆந்திரப் பிரதேசம் 'இந்தியாவின் அரிசிக் கிண்ணம்' என்று அழைக்கப்படுகிறது. கோதாவரி மற்றும் கிருஷ்ணா ஆறுகளால் உருவாக்கப்பட்ட வளமான டெல்டா பகுதிகள், நெல் சாகுபடிக்குத் தேவையான நீரை ஏராளமாக வழங்குகின்றன. இத்தகைய சூழல், ஆந்திரப் பிரதேசத்தை இந்தியாவில் நெல் உற்பத்தியில் மிகச் சிறந்த மாநிலங்களில் ஒன்றாக மாற்றியுள்ளது.

உலக அளவில் அதிக அரிசி உற்பத்தி செய்யும் நாடுகள்

இந்தியாவின் அனைத்து மாநிலங்களிலும் அரிசி உற்பத்தி செய்யப்பட்டாலும், உலக அளவில், சீனா அதிக அரிசி உற்பத்தி செய்யும் நாடாக முதலிடத்தில் உள்ளது. அதற்கு அடுத்தபடியாக இந்தியா இரண்டாவது இடத்தில் உள்ளது. இந்தோனேசியா, வங்கதேசம் மற்றும் வியட்நாம் ஆகியவையும் அரிசி உற்பத்தியில் முக்கியப் பங்கு வகிக்கின்றன.

இந்திய அரிசிகள் பற்றிய சுவாரஸ்ய உண்மைகள்

மேற்கு வங்காளத்தில் காரிஃப், ரபி மற்றும் கோடைக்காலம் என வெவ்வேறு பருவங்களில் நெல் பயிரிடப்படுகிறது. இது விவசாயிகள் ஆண்டுக்கு ஒன்றுக்கு மேற்பட்ட முறை அறுவடை செய்ய வழிவகுப்பதோடு, மேற்கு வங்கத்தின் ஒட்டுமொத்த உற்பத்தியையும் அதிகரிக்கிறது. இந்தியாவில் பல்வேறு பிராந்தியங்களுக்கும், சமையல் முறைகளுக்கும் ஏற்ற பல வகையான நெல் ரகங்கள் பயிரிடப்படுகின்றன. இதில் உலகளவில் அதன் நறுமணத்திற்கும் தரத்திற்கும் பெயர் பெற்ற 'பாசுமதி' அரிசி மிகவும் பிரபலமானது.