பட்டுப் போன்ற கூந்தலைப் பெற உதவும் அற்புத எண்ணெய்கள்!!!

அவகேடோ எண்ணெய்

அவகேடோ எண்ணெய் கொண்டு கூந்தலைப் பராமரித்தால், நல்ல பட்டுப் போன்ற கூந்தலைப் பெறலாம். அதிலும் அவகேடோ-தேங்காய்-ரோஸ்மேரி போன்ற எண்ணெய்களை ஒன்றாக கலந்து, கூந்தலுக்கு தடவி நன்கு மசாஜ் செய்து 1/2 மணிநேரம் ஊற வைத்து, பின் குளிக்க வேண்டும். இந்த முறையை வாரத்திற்கு 2 முறை செய்தால், நல்ல பட்டுப் போன்ற கூந்தலைப் பெறலாம்.

விளக்கெண்ணெய்

விளக்கெண்ணெயை வெதுவெதுப்பாக சூடேற்றி, நன்கு ஸ்கால்ப்பில் படும் படி தலையில் தடவி மசாஜ் செய்மு, காட்டன் துணி கொண்டு தலையைச் சுற்றி, 20 நிமிடம் ஊற வைத்து, வெதுவெதுப்பான நீரில் மைல்டு ஷாம்பு போட்டு குளிக்க வேண்டும். இந்த முறையை தினமும் செய்து வந்தால், நிச்சயம் நல்ல அடர்த்தியான மற்றும் மென்மையான கூந்தலைப் பெறலாம்.

தேங்காய் எண்ணெய்

காலம் காலமாக தலைக்கு தேய்த்து வரும் ஒரு எண்ணெய் தான் தேங்காய் எண்ணெய். இந்த தேங்காய் எண்ணெயை தினமும் ஸ்கால்ப்பில் படும்படியாக கொஞ்சமாக தடவி மசாஜ் செய்து வந்தால், கூந்தல் வளர்ச்சி சீராக இருப்பதோடு, நல்ல அடர்த்தியான மற்றும் பட்டுப் போன்ற கூந்தலைப் பெறலாம். ஆகவே மலிவான விலையில் கிடைக்கக்கூடிய இந்த எண்ணெயை தவறாமல் நாள்தோறும் உபயோகித்து பயன் பெறுங்கள்.

ஆலிவ் ஆயில்

எண்ணெய்களிலேயே மிகச்சிறந்த எண்ணெய் என்றால் அது ஆலிவ் ஆயில் தான். இதனை இறைவன் நமக்கு கொடுத்த ஒரு வரப்பிரசாதம் என்று சொல்லலாம். ஏனெனில் இந்த எண்ணெய் கொண்டு கூந்தலைப் பராமரித்தால் கூந்தல் நன்கு வலுவோடு, பொடுகின்றி ஆரோக்கியமாக வளரும். அதிலும் ஆலிவ் ஆயிலில் சிறிது தேன் சேர்த்து கலந்து, கூந்தலுக்கு மாஸ்க் போட்டால், கூந்தல் நன்கு பட்டுப் போன்று இருக்கும்.

ரோஸ்மேரி ஆயில்

ரோஸ்மேரி ஆயிலில் இரும்புச்சத்து, கால்சியம் மற்றும் வைட்டமின் பி போன்ற சத்துக்கள் நிறைந்துள்ளது. இந்த எண்ணெய் கூந்தல் வளர்ச்சிக்கு உதவுவதோடு, நரை முடியை தடுத்து, நல்ல மென்மையான மற்றும் பொலிவான கூந்தலுக்கு வழிவகுக்கும். ஆகவே வாரம் ஒரு முறை இந்த எண்ணெய் கொண்டு ஆயில் பாத் எடுங்கள்.

பாதாம் எண்ணெய்

பாதாம் எண்ணெயில் வைட்டமின் ஈ மற்றும் நல்ல கொழுப்புக்கள் உள்ளன. இவை கூந்தலை பொலிவாகவும், ஆரோக்கியமாகவும் வைத்துக் கொள்ள உதவும். இந்த எண்ணெயின் சிறப்பம்சம் என்னவென்றால், எந்த பயமின்றியும் இதனை மற்ற எண்ணெய்களோடு சேர்த்து ஹேர் மாஸ்க் போடலாம்.

லாவெண்டர் ஆயில்

நறுமணமிக்க எண்ணெயான லாவெண்டர் எண்ணெய் பொடுகுத் தொல்லையை நீக்கி, கூந்தலை பட்டுப் போன்று வைத்துக் கொள்வதில் சிறந்தது. அதிலும் இந்த எண்ணெயை டீ-ட்ரீ ஆயிலுடன் சேர்த்து கலந்து, தலையில் தடவி நன்கு மசாஜ் செய்து, பிளாஸ்டிக் கவர் கொண்டு மூடி, 1/2 மணிநேரம் ஊற வைத்து, மைங்ல ஷாம்பு போட்டு குளிக்க வேண்டும்.

புதினா எண்ணெய்

கூந்தல் ஆரோக்கியத்திற்கும், அதன் வளர்ச்சிக்கும் உதவும் சிறப்பான எண்ணெய்களுள் ஒன்று தான் புதினா எண்ணெய். அதற்கு இந்த எண்ணெயை தலைக்கு குளிக்கும் போது ஷாம்புவில் சிறு துளிகள் சேர்த்து கலந்து குளிக்க வேண்டும். இதனை தினமும் பயன்படுத்தினால், நல்ல அழகான கூந்தலைப் பெறலாம்.