இட்லி, தோசைக்கு ஒருமுறை இந்த கிராமத்து ஸ்டைல் வெங்காய சட்னியை செஞ்சு சாப்பிடுங்க..

Village Style Onion Chutney Recipe In Tamil: ஒவ்வொரு நாள் காலையிலும் டிபனுக்கு இட்லி, தோசை செய்தால், அதற்கு சைடு டிஷ்ஷை முடிவெடுப்பது என்று ஒரு பெரிய வேலையாக இருக்கும். இன்று உங்கள் வீட்டில் இட்லி, தோசை செய்யப் போகிறீர்கள் என்றால் என்ன சைடு டிஷ் செய்வதென்று முடிவெடுத்து விட்டீர்களா?

இன்னும் இல்லையென்றால் இன்று இட்லி, தோசைக்கு கிராமத்து ஸ்டைல் வெங்காய சட்னியை செய்யுங்கள். இந்த சட்னி செய்வதற்கு மிகவும் ஈஸியாக இருக்கும். மேலும் இது குழந்தைகள் முதல் பெரியவர்கள் வரை அனைவரும் கேட்டு விரும்பி சாப்பிடக்கூடியவாறு இருக்கும்.

உங்களுக்கு இந்த கிராமத்து ஸ்டைல் வெங்காய சட்னியை எப்படி செய்வதென்று தெரிந்து கொள்ள வேண்டுமா? கீழே கிராமத்து ஸ்டைல் வெங்காய சட்னி ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

* எண்ணெய் - 2 டீஸ்பூன்
* பூண்டு - 5- பல்
* சின்ன வெங்காயம் - 20
* வரமிளகாய் - 4
* புளி - சிறிய துண்டு
* கறிவேப்பிலை - சிறிது
* கொத்தமல்லி - சிறிது
* உப்பு - சுவைக்கேற்ப
* தணணீர் - தேவையான அளவு

தாளிப்பதற்கு...

* எண்ணெய் - 2 டீஸ்பூன்
* கடுகு - 1/2 டீஸ்பூன்
* உளுத்தம் பருப்பு - 1/2 டீஸ்பூன்
* கறிவேப்பிலை - சிறிது

செய்முறை:

* முதலில் ஒரு வாணலியை அடுப்பில் வைத்து, அதில் எண்ணெய் ஊற்றி சூடானதும், பூண்டு மற்றும் சின்ன வெங்காயத்தை சேர்த்து நன்கு கண்ணாடி பதத்திற்கு வதக்க வேண்டும்.
* பின்னர் அதில் வரமிளகாய், புளி சேர்த்து நன்கு வதக்க வேண்டும்.
* அடுத்து கறிவேப்பிலை மற்றும் கொத்தமல்லியை சேர்த்து சிறிது நேரம் வதக்கி இறக்கி குளிர வைக்க வேண்டும்.
* பின் வதக்கிய பொருட்களை அம்மிக் கல்லில் அல்லது மிக்சர் ஜாரில் போட்டு, சுவைக்கேற்ப உப்பு சேர்த்து நன்கு அரைத்துக் கொள்ள வேண்டும்.
* பின்பு ஒரு கிண்ணத்தில் அரைத்த சட்னியை எடுத்துக் கொள்ள வேண்டும்.
* இறுதியாக ஒரு வாணலியை அடுப்பில் வைத்து, அதில் தாளிப்பதற்கு எண்ணெய் ஊற்றி சூடானதும், கடுகு, உளுத்தம் பருப்பு, கறிவேப்பிலை சேர்த்து தாளித்து, சட்னியுடன் சேர்த்து கிளறினால், சுவையான கிராமத்து ஸ்டைல் வெங்காய சட்னி தயார்.

Image Courtesy: Raks Kitchen