தக்காளி சட்னியை ஒருவாட்டி இந்த பக்குவத்துல செய்யுங்க.. வீட்டுல எல்லாரும் 2 இட்லி எக்ஸ்ட்ரா சாப்பிடுவாங்க...

Tomato Chutney Recipe In Tamil: இட்லி, தோசை என்றாலே அதற்கு சரியான சைடு டிஷ் என்றால் அது சட்னி, சாம்பார் தான். சிலரது வீடுகளில் சட்னியைத் தான் பெரும்பாலும் செய்வார்கள். அதுவும் அந்த சட்னியில் தக்காளி சட்னியை மட்டும் ஒவ்வொரு பகுதிகளிலும், ஏன் ஒவ்வொரு வீட்டிலும் கூட வித்தியாசமாக செய்வார்கள்.

இப்படி எந்த ஸ்டைலில் செய்தாலும், தக்காளி சட்னியின் சுவைக்கு இணை வேறு எந்த சட்னியும் வந்துவிடாது. உங்கள் வீட்டிலும் தக்காளி சட்னியை அடிக்கடி செய்வீர்களா? அப்படியானால் ஒருமுறை தக்காளி சட்னியை கீழே கொடுக்கப்பட்டுள்ள பக்குவத்தில் செய்யுங்கள். இப்படி சட்னியை செய்யும் போது, வழக்கத்தை விட அதிகமாக சாப்பிடுவார்கள்.

உங்களுக்கு தக்காளி சட்னியை எப்படி செய்வதென்று தெரிந்து கொள்ள வேண்டுமா? கீழே தக்காளி சட்னி ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

* எண்ணெய் - 1 டேபிள் ஸ்பூன்
* வேர்க்கடலை - 1 டேபிள் ஸ்பூன்
* கடலைப் பருப்பு - 1 டேபிள் ஸ்பூன்
* உளுத்தம் பருப்பு - 1 டேபிள் ஸ்பூன்
* வெங்காயம் - 2 (நறுக்கியது)
* பூண்டு - 4 பல்
* பச்சை மிளகாய் - 2
* வரமிளகாய் - 4
* தக்காளி - 4 (நறுக்கியது)
* கொத்தமல்லி - சிறிது
* புதினா - சிறிது
* துருவிய தேங்காய் - 2 டேபிள் ஸ்பூன்
* உப்பு - சுவைக்கேற்ப

தாளிப்பதற்கு...

* எண்ணெய் - 1 டீஸ்பூன்
* கடுகு - 1/2 டீஸ்பூன்
* உளுத்தம் பருப்பு - 1/2 டீஸ்பூன்
* கறிவேப்பிலை - 1 கொத்து
* வரமிளகாய் - 1

செய்முறை:

* முதலில் ஒரு வாணலியை அடுப்பில் வைத்து, அதில் எண்ணெய் ஊற்றி சூடானதும், வேர்க்கடலை, கடலைப் பருப்பு மற்றும் உளுத்தம் பருப்பை சேர்த்து நன்கு வறுக்க வேண்டும்.
* பின்பு அதில் நறுக்கிய வெங்காயத்தை சேர்த்து, அத்துடன் பூண்டு பற்களை சேர்த்து கண்ணாடி பதத்திற்கு வதக்க வேண்டும்.
* அடுத்து அதில் பச்சை மிளகாய் மற்றும் வரமிளகாய் சேர்த்து நன்கு வதக்க வேண்டும்.
* பிறகு அதில் நறுக்கிய தக்காளியை சேர்த்து மென்மையாகும் வரை வதக்க வேண்டும்.
* அதன் பின் அதில் கொத்தமல்லி, புதினா மற்றும் துருவிய தேங்காயை சேர்த்து 1 நிமிடம் வதக்கி இறக்கி குளிர வைக்க வேண்டும்.
* பின்னர் மிக்சர் ஜாரில் வதக்கிய பொருட்களை சேர்த்து, அத்துடன் சுவைக்கேற்ப உப்பு சேர்த்து, நன்கு அரைத்துக் கொள்ள வேண்டும்.
* பின்பு அரைத்த சட்னியை ஒரு கிண்ணத்தில் எடுத்துக் கொள்ள வேண்டும்.
* இறுதியாக சட்னியை தாளிப்பதற்கு ஒரு வாணலியை அடுப்பில் வைத்து, அதில் எண்ணெய் ஊற்றி சூடானதும், கடுகு, உளுத்தம் பருப்பு, கறிவேப்பிலை, வரமிளகாய் சேர்த்து தாளித்து, சட்னியுடன் சேர்த்து கலந்தால், சுவையான தக்காளி சட்னி தயார்.