புடலங்காய் பாசிப்பருப்பு கூட்டு

இன்று மதியம் உங்கள் வீட்டில் புளிக்குழம்பு செய்துள்ளீர்களா? அதற்கு ஒரு அட்டகாசமான சைடு டிஷ் செய்ய விரும்புகிறீர்களா? உங்கள் வீட்டில் புடலங்காய் உள்ளதா? அப்படியானால் அந்த புடலங்காயைக் கொண்டு கூட்டு செய்யுங்கள். இந்த புடலங்காய் கூட்டு புளிக்குழம்பிற்கு ஒரு சிறந்த சைடு டிஷ்ஷாக இருப்பதோடு, சப்பாத்திக்கும் அட்டகாசமாக இருக்கும். மேலும் இந்த கூட்டு செய்வது மிகவும் சுலபம். குறிப்பாக இது பேச்சுலர்கள் சமைக்க ஒரு சிறந்த ரெசிபியாக இருக்கும்.

உங்களுக்கு புடலங்காய் பாசிப்பருப்பு கூட்டு எப்படி செய்வதென்று தெரிந்து கொள்ள வேண்டுமா? கீழே புடலங்காய் பாசிப்பருப்பு கூட்டு ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

வேக வைப்பதற்கு...

* புடலங்காய் - 1 1/2 கப் (நறுக்கியது)

* பாசிப்பருப்பு - 1/2 கப்

* வெங்காயம் - 1 (பொடியாக நறுக்கியது)

* தக்காளி - 1 (நறுக்கியது)

* சீரகம் - 1/4 டீஸ்பூன்

* உப்பு - சுவைக்கேற்ப

அரைப்பதற்கு...

* தேங்காய் - 1/4 கப் (துருவியது)

* பச்சை மிளகாய் - 3

* சீரகம் - 1/2 டீஸ்பூன்

தாளிப்பதற்கு...

* எண்ணெய் - 1 டேபிள் ஸ்பூன்

* கடுகு - 1/2 டீஸ்பூன்

* உளுத்தம் பருப்பு - 1/2 டீஸ்பூன்

* சீரகம் - 1/4 டீஸ்பூன்

* பெருங்காயத் தூள் - 1 சிட்டிகை

* கறிவேப்பிலை - சிறிது

செய்முறை:

* முதலில் குக்கரில் நறுக்கிய புடலங்காய் மற்றும் பாசிப் பருப்பை எடுத்துக் கொள்ள வேண்டும்.

* பின் அதில் பொடியாக நறுக்கிய வெங்காயம், தக்காளி மற்றும் சீரகத்தை போட்டுக் கொள்ள வேண்டும்.

* பின்பு மிக்சர் ஜாரில் அரைப்பதற்கு கொடுத்துள்ள தேங்காய், சீரகம், பச்சை மிளகாய் சேர்த்து நன்கு அரைத்துக் கொள்ள வேண்டும்.

* பிறகு அரைத்த தேங்காய் விழுதை குக்கரில் உள்ள புடலங்காயில் போட்டு, சிறிது நீரை ஊற்ற வேண்டும்.

* பின் குக்கரை மூடி 3-4 விசில் விட்டு இறக்கி, விசில் போனதும் குக்கரைத் திறந்து, அதில் சுவைக்கேற்ப உப்பு சேர்த்து கிளற வேண்டும்.

* இறுதியாக சிறு வாணலியை அடுப்பில் வைத்து, அதில் தாளிப்பதற்கு கொடுத்துள்ள எண்ணெய் ஊற்றி, சூடானதும், கடுகு, உளுத்தம் பருப்பு, சீரகம், கறிவேப்பிலை, பெருங்காயத் தூள் சேர்த்து தாளித்து, குக்கரில் உள்ள கூட்டுடன் சேர்த்து கிளற வேண்டும்.

* இப்போது சுவையான புடலங்காய் பாசிப்பருப்பு கூட்டு தயார்.