சப்பாத்திக்கு வேர்க்கடலை வெச்சு இந்த மாதிரி ஒரு சைடு டிஷ் செய்யுங்க.. சும்மா அள்ளும்...

Peanut Masala Recipe In Tamil: இன்று உங்கள் வீட்டில் சப்பாத்தி செய்யப் போகிறீர்களா? அந்த சப்பாத்திக்கு வழக்கமாக செய்யும் சைடு டிஷ்ஷை விட சற்று வித்தியாசமான சுவையைக் கொண்ட சைடு டிஷ் செய்ய நினைக்கிறீர்களா?

வீட்டில் வேர்க்கடலை இருந்தால், அதைக் கொண்டு அட்டகாசமான சுவையில் மசாலா செய்யுங்கள். இந்த வேர்க்கடலை மசாலா சப்பாத்தியுடன் மட்டுமின்றி, தோசை, பூரி போன்றவற்றுடன் சாப்பிடவும் அற்புதமாக இருக்கும்.

உங்களுக்கு வேர்க்கடலை மசாலாவை எப்படி செய்வதென்று தெரிந்து கொள்ள வேண்டுமா? கீழே வேர்க்கடலை மசாலா ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

* பச்சை வேர்க்கடலை - 1 கப்
* எண்ணெய் - 4 டேபிள் ஸ்பூன்
* பட்டை - 1 துண்டு
* பிரியாணி இலை - 1
* கிராம்பு - 2
* சோம்பு - 1/2 டீஸ்பூன்
* கறிவேப்பிலை - சிறிது
* வெங்காயம் - 2 (பொடியாக நறுக்கியது)
* இஞ்சி பூண்டு பேஸ்ட் - 1 டீஸ்பூன்
* தக்காளி - 2 (பொடியாக நறுக்கியது)
* உப்பு - சுவைக்கேற்ப
* மஞ்சள் தூள் - 1/4 டீஸ்பூன்
* தனி மிளகாய் தூள் - 1 1/2 டீஸ்பூன்
* கொத்தமல்லி - சிறிது

அரைப்பதற்கு...

* தேங்காய் - 1/4 மூடி
* சோம்பு - 1/4 டீஸ்பூன்

செய்முறை:

* முதலில் வேர்க்கடலையை சுடுநீரில் 4 மணிநேரம் மூடி வைத்து ஊற வைத்துக் கொள்ள வேண்டும்.
* பின் அதை குக்கரில் போட்டு, தேவையான அளவு நீரை ஊற்றி, சிறிது உப்பு தூவி, அடுப்பில் வைத்து, 3-4 விசில் விட்டு இறக்கிக் கொள்ள வேண்டும்.
* விசில் போனதும், குக்கரைத் திறந்து, சிறிது வேர்க்கடலையை மிக்சர் ஜாரில் போட்டு அரைத்து தனியாக வைத்துக் கொள்ள வேண்டும்.
* பின்பு ஒரு வாணலியை அடுப்பில் வைத்து, அதில் எண்ணெய் ஊற்றி சூடானதும், பட்டை, கிராம்பு, பிரியாணி இலை, சோம்பு, கறிவேப்பிலை சேர்த்து தாளிக்க வேண்டும்.
* பிறகு அதில் பொடியாக நறுக்கிய வெங்காயத்தை சேர்த்து பொன்னிறமாக வதக்க வேண்டும்.
* அடுத்து இஞ்சி பூண்டு பேஸ்ட் சேர்த்து பச்சை வாசனை போக வதக்க வேண்டும்.
* பின் அதில் தக்காளியை சேர்த்து, சுவைக்கேற்ப உப்பு சேர்த்து, மென்மையாகும் வரை வதக்க வேண்டும்.
* அடுத்து அதில் மஞ்சள் தூள், மிளகாய் தூள் சேர்த்து 2 நிமிடம் வதக்கி, பின் அதில் தேவையான அளவு நீரை ஊற்றி, வேக வைத்துள்ள வேர்க்கடலை மற்றும் அரைத்து வைத்துள்ள வேர்க்கடலையை சேர்த்து மூடி வைத்து 5 நிமிடம் கொதிக்க வைக்க வேண்டும்.
* அதற்குள் மிக்சர் ஜாரில் தேங்காய் மற்றும் சோம்பு சேர்த்து, சிறிது நீரை ஊற்றி நன்கு மென்மையாக அரைத்துக் கொள்ள வேண்டும்.
* பின் அரைத்ததை கொதித்துக் கொண்டிருக்கும் மசாலாவுடன் சேர்த்து 2-3 நிமிடம் கொதிக்க வைத்து, கொத்தமல்லியைத் தூவி இறக்கினால், சுவையான வேர்க்கடலை மசாலா தயார்.

Image Courtesy: kurinji. com