2 வெங்காயமும், 1/2 கப் தயிரும் இருந்தா.. சப்பாத்திக்கு இப்படியொரு கிரேவி செய்யுங்க.. டேஸ்ட் சும்மா அள்ளும்..

Onion Gravy Recipe In Tamil: இன்று இரவு உங்கள் வீட்டில் சப்பாத்தி செய்யப் போகிறீர்களா? அந்த சப்பாத்திக்கு என்ன சைடு டிஷ் செய்வதென்று யோசித்துக் கொண்டிருக்கிறீர்களா? ஆனால் வீட்டில் காய்கறி எதுவும் இல்லையா? இருந்தாலும் ஒரு சுவையான சைடு டிஷ் செய்ய வேண்டுமா? வீட்டில் வெங்காயமும், தயிரும் உள்ளதா? அப்படியானால் அவற்றைக் கொண்டு அட்டகாசமான சுவையில் ஒரு கிரேவி செய்யுங்கள்.

இந்த கிரேவி சப்பாத்தியுடன் மட்டுமின்றி, தோசையுடன் சேர்த்து சாப்பிடவும் அருமையாக இருக்கும். முக்கியமாக இந்த கிரேவி 10-15 நிமிடத்தில் செய்யக்கூடியவாறு இருப்பதால், இது வேலைக்கு செல்பவர்கள் மற்றும் பேச்சுலர்கள் இந்த ரெசிபியை தெரிந்து வைத்துக் கொள்வது நல்லது.

உங்களுக்கு சப்பாத்திக்கு ஏற்ற வெங்காய கிரேவியை எப்படி செய்வதென்று தெரிந்து கொள்ள வேண்டுமா? கீழே வெங்காய கிரேவி ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

* பெரிய வெங்காயம் - 2
* தக்காளி - 2
* இஞ்சி - 1 இன்ச்
* பூண்டு - 4-5 பல்
* பட்டை - 1 துண்டு
* கிராம்பு - 3
* சோம்பு - 1/2 டீஸ்பூன்
* சீரகம் - 1/2 டீஸ்பூன்
* எண்ணெய் - 1 டேபிள் ஸ்பூன்
* மிளகாய் தூள் - 1 1/2 டீஸ்பூன்
* மல்லித் தூள் - 2 டீஸ்பூன்
* மஞ்சள் தூள் - 1/2 டீஸ்பூன்
* உப்பு - சுவைக்கேற்ப
* தயிர் - 1/2 கப்
* தண்ணீர் - தேவையான அளவு
* கொத்தமல்லி - சிறிது

செய்முறை:

* முதலில் ஒரு பெரிய வெங்காயத்தை எடுத்து, அதை சதுர துண்டுகளாக வெட்டிக் கொள்ள வேண்டும். பின் மற்றொரு வெங்காயத்தை எடுத்து பொடியாக நறுக்கிக் கொள்ள வேண்டும்.
* அதன் பின் மிக்சர் ஜாரில் நறுக்கிய தக்காளி, இஞ்சி, பூண்டு, பட்டை, கிராம்பு, சோம்பு, சீரகம் சேர்த்து நன்கு மென்மையாக அரைத்துக் கொள்ள வேண்டும்.
* பின்னர் ஒரு வாணலியை அடுப்பில் வைத்து, அதில் எண்ணெய் ஊற்றி சூடானதும், பெரிய துண்டுகளாக வெட்டிய வெங்காயத்தை சேர்த்து கண்ணாடி பதத்திற்கு வதக்கி, ஒரு தட்டில் எடுத்து வைத்துக் கொள்ள வேண்டும்.
* பின் அதே எண்ணெயில் பொடியாக நறுக்கிய வெங்காயத்தை சேர்த்து நன்கு வதக்க வேண்டும்.
* பின்பு அதில் அரைத்து வைத்துள்ள தக்காளி மசாலாவை சேர்த்து, 1/2 கப் நீரை ஊற்றி, எண்ணெய் பிரியும் வரை கொதிக்க வைக்க வேண்டும்.
* அதன் பின் அதில் மிளகாய் தூள், மல்லித் தூள், மஞ்சள் தூள் மற்றும் சுவைக்கேற்ப உப்பு சேர்த்து கிளறி, பச்சை வாசனை போகும் வரை 3 நிமிடம் கொதிக்க வைக்க வேண்டும்.
* பிறகு அதில் 1/2 கப் தயிரை நன்கு அடித்து ஊற்றி கிளறி, 1/2 கப் நீரை ஊற்றி நன்கு கொதிக்க வைக்க வேண்டும்.
* அடுத்து அதில் வதக்கி வைத்துள்ள வெங்காயத்தை சேர்த்து கிளறி, கிரேவி பதத்திற்கு வரும் வரை நன்கு கொதிக்க வைக்க வேண்டும்.
* எண்ணெய் பிரிந்து கிரேவி சற்று கெட்டியாக தொடங்கியதும், அதில் கொத்தமல்லியைத் தூவி கிளறி இறக்கினால், வெங்காய கிரேவி தயார்.