முட்டைக்கோஸை எப்பவும் போல பொரியல் செய்யாம இந்த மாதிரி கூட்டு செய்யுங்க... சூப்பர் சைடிஷா இருக்கும்...!

Muttaikose Kootu Recipe in Tamil: சாதத்திற்கு குழம்பு வைப்பது எவ்வளவு குழப்பமானதோ அதேபோல என்ன சைடிஷ் செய்வது என்பதும் மிகவும் கடினமான ஒன்றாகும். மதியம் சிம்பிளா அதிகம் மெனக்கெடாம சமையலை முடிக்க நினைக்கிறீங்களா? உங்கள் வீட்டில் முட்டைக்கோஸ் உள்ளதா? அப்படியானால் அந்த முட்டைகோஸை வைத்து வழக்கமான பொரியல் செய்யாம இந்த மாதிரி சூப்பரான கூட்டு செய்யுங்கள். இதை குக்கரில் 10 நிமிடத்தில் எளிதாக செய்து விடலாம். இந்த பக்குவத்தில் முட்டைக்கோஸ் கூட்டு செய்யும் போது, அது சூடான சாதத்துடன் மட்டுமின்றி, சப்பாத்தியுடன் சேர்த்து சாப்பிடவும் அருமையாக இருக்கும்.

இந்த முட்டைக்கோஸ் கூட்டு செய்வதற்கு ஈஸியாக இருப்பதால், பேச்சுலர்களும் இதை செய்யலாம். முக்கியமாக இந்த கூட்டு நீங்கள் வழக்கமாக செய்வதை விட சற்று வித்தியாசமான சுவையில் இருப்பதால், முட்டைக்கோஸ் பிடிக்காதவர்களும் விரும்பி சாப்பிடுவார்கள்.

உங்களுக்கு முட்டைக்கோஸ் கூட்டு எப்படி செய்வதென்று தெரிந்து கொள்ள வேண்டுமா? கீழே முட்டைக்கோஸ் கூட்டு ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

- மெலிதாக நறுக்கிய முட்டைகோஸ் - 1/2 கப்
- நீளமாக நறுக்கிய பச்சை மிளகாய் - 3
- பொடியாக நறுக்கிய இஞ்சி - 1/2 அங்குல துண்டு
- பொடியாக நறுக்கிய வெங்காயம் - 2 டீஸ்பூன்
- துவரம் பருப்பு வேக வைத்தது - 3 டீஸ்புன்
- உப்பு - தேவையான அளவு

அரைக்க தேவையான பொருட்கள்:

- தேங்காய் துருவல் - 3 டீஸ்பூன்
- சீரகம் - 1/4 டீஸ்பூன்
- அரிசி மாவு - 1/4 டீஸ்பூன்

தாளிக்க தேவையான பொருட்கள்:

- கடுகு - தேவையான அளவு
- கடலை பருப்பு - 2 டீஸ்பூன்
- எண்ணெய் - தேவையான அளவு

செய்முறை:

- முதலில் மிக்சியில் அரைப்பதற்காக கொடுக்கப்பட்டுள்ள அனைத்தையும் அரைத்து தனியாக எடுத்து வைத்து கொள்ளவும்.

- பின் குக்கரில் முட்டைக்கோஸ், பச்சை மிளகாய், வெங்காயம், துவரம் பருப்பு, இஞ்சி மற்றும் தேவையான அளவு உப்பு சேர்த்து 1/2 கப் தண்ணீர் ஊற்றவும்.

- குக்கரை விசில் போட்டு மூடி ஒரு விசில் வரும் வரை வேகவைக்கவும். விசில் அடங்கியதும் குக்கரை திறந்து தனியாக வைக்கவும்.

- பின்னர் அரைத்து வைத்துள்ள தேங்காயை சேர்த்து மீண்டும் அடுப்பின் மேல் மிதமான தீயில் மூன்று நிமிடங்கள் அல்லது எல்லாம் ஒன்று சேர்ந்து வரும் வரை கொதிக்க விடவும். பின் அடுப்பில் இருந்து இறக்கி வைக்கவும்.

- இறுதியாக கடாயில் எண்ணெய் விட்டு சூடாக்கி கடுகு, கடலை பருப்பு சேர்த்து பொன்னிறமாகும் வரை வறுத்து முட்டைக்கோஸ் கூட்டின் மேல் ஊற்றவும்.

- சுவையான முட்டைக்கோஸ் கூட்டு ரெடி. இதை சாதத்தில் போட்டும் சாப்பிடலாம் அல்லது சப்பாத்தியுடன் வைத்தும் சாப்பிடலாம்.