காலையில் இந்த கஞ்சியை 1 கப் குடிச்சா.. நாள் முழுவதும் சுறுசுறுப்பாக வேலை செய்யலாம்.. டேஸ்டியாவும் இருக்கும்..

Kambu Vegetable Kanji In Tamil: எப்போதும் இட்லி, தோசை சாப்பிட்டு போடித்துவிட்டதா? சற்று லைட்டான காலை உணவை எடுக்க விரும்புகிறீர்களா? அப்படியானால் கஞ்சி தான் சிறந்ததாக இருக்கும். அதுவும் உங்கள் வீட்டில் கம்பு இருந்தால், அட்டகாசமான சுவையில் கம்பு வெஜிடேபிள் கஞ்சியை செய்யலாம்.

முக்கியமாக இந்த கஞ்சி செய்வது மிகவும் சுலபம். வீட்டில் உள்ள காய்கறிகளே போதுமானது. மேலும் இது குழந்தைகளும் விரும்பி சாப்பிடுமாறு இருக்கும். இந்த கஞ்சியை டயட்டில் இருப்பவர்கள் குடித்தால், நீண்ட நேரம் பசி எடுக்காமல் இருக்கும் மற்றும் நாள் முழுவதும் சுறுசுறுப்பாகவும் செயல்படலாம்.

உங்களுக்கு கம்பு வெஜிடேபிள் கஞ்சியை எப்படி செய்வதென்று தெரிந்து கொள்ள வேண்டுமா? கீழே கம்பு வெஜிடேபிள் கஞ்சி ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

வேக வைப்பதற்கு...

* கம்பு - 1 கப்
* தண்ணீர் - 3 கப்
* உப்பு - சுவைக்கேற்ப

கஞ்சிக்கு...

* எண்ணெய் - 1 டேபிள் ஸ்பூன்
* கடுகு - 1/2 டீஸ்பூன்
* கேரட் - 1 (பொடியாக நறுக்கியது)
* பீன்ஸ் - 10 ()
* ஸ்வீட் கார்ன் - 1 கைப்பிடி (பொடியாக நறுக்கியது)
* இஞ்சி பூண்டு பேஸ்ட் - 1 டீஸ்பூன்
* பச்சை மிளகாய் - 3 (கீறியது)
* தண்ணீர் - 1 1/2 கப்
* உப்பு - சுவைக்கேற்ப
* கொத்தமல்லி - சிறிது

செய்முறை:

* முதலில் கம்பை நீரில் 2 முறை கழுவிக் கொள்ள வேண்டும்.
* பின் மிக்சர் ஜாரில் கழுவிய கம்பை சேர்த்து சற்று கொரகொரவென்று அரைத்துக் கொள்ள வேண்டும்.
* பின்பு குக்கரில் பொடித்த கம்பை சேர்த்து, அத்துடன் 3 கப் நீரை ஊற்றி, சுவைக்கேற்ப உப்பு சேர்த்து, குக்கரை மூடி, மிதமான தீயில் வைத்து, 2 விசில் விட்டு இறக்கி தனியாக வைத்துக் கொள்ள வேண்டும்.
* அடுத்து ஒரு வாணலியை அடுப்பில் வைத்து, அதில் எண்ணெய் ஊற்றி சூடானதும், கடுகு சேர்த்து தாளிக்க வேண்டும்.
* பின் அதில் பொடியாக நறுக்கிய கேரட், பீன்ஸ் மற்றும் ஸ்வீட் கார்ன்னை சேர்த்து 2 நிமிடம் வதக்க வேண்டும்.
* பிறகு இஞ்சி பூண்டு பேஸ்ட் சேர்த்து பச்சை வாசனை போக வதக்க வேண்டும்.
* பின் பச்சை மிளகாய் சேர்த்து சிறிது நேரம் வதக்க வேண்டும்.
* பின்பு அதில் 1 1/2 கப் நீரை ஊற்றி, சுவைக்கேற்ப உப்பு சேர்த்து 5 நிமிடம் நன்கு கொதிக்க வைக்க வேண்டும்.
* 5 நிமிடம் நன்கு கொதித்ததும், குக்கரைத் திறந்து, வேக வைத்துள்ள கம்புடன் கொதித்துக் கொண்டிருக்கும் இந்த வெஜிடேபிள் நீரை அப்படியே ஊற்றி கலந்து கொள்ள வேண்டும்.
* பின் மீண்டும் அந்த குக்கரை அடுப்பில் வைத்து, 5 நிமிடம் நன்கு கொதிக்க வைத்து, கொத்தமல்லியைத் தூவி இறக்கினால், சுவையான கம்பு வெஜிடேபிள் கஞ்சி தயார்.