2 கப் கோதுமை ரவை இருந்தா.. ஒருடைம் இப்படி செய்யுங்க.. பிடிக்காதவங்களும் கேட்டு விரும்பி சாப்பிடுவாங்க...

Wheat Rava Biryani Recipe In Tamil: காலையில் எப்பவும் இட்லி, தோசை செய்து போரடித்துவிட்டதா? சற்று வித்தியாசமான காலை டிபனை செய்ய நினைக்கிறீர்களா? உங்கள் வீட்டில் கோதுமை ரவை உள்ளதா? பொதுவாக கோதுமை ரவை என்றால் உப்புமா தான் செய்வோம்.

ஆனால் அந்த கோதுமை ரவை இருந்தால், அதைக் கொண்டு அருமையான சுவையில் பிரியாணி செய்யலாம். இந்த பிரியாணி செய்வதற்கு மிகவும் சுலபவமாக இருக்கும். அதோடு, இது ஒரு சிறந்த லஞ்சு பாக்ஸ் ரெசிபியாகவும் இருக்கும். பேச்சுலர்கள் கூட இந்த ரெசிபியை ட்ரை செய்யலாம்.

உங்களுக்கு கோதுமை ரவை பிரியாணியை எப்படி செய்வதென்று தெரிந்து கொள்ள வேண்டுமா? கீழே கோதுமை ரவை பிரியாணி ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

* கோதுமை ரவை - 2 கப்
* எண்ணெய் - 1 டேபிள் ஸ்பூன்
* பிரியாண இலை - 1
* பட்டை - 1 சிறிய துண்டு
* சோம்பு - 1 டீஸ்பூன்
* வெங்காயம் - 1 (மெல்லியதாக நறுக்கியது)
* பச்சை மிளகாய் - 2
* இஞ்சி பூண்டு பேஸ்ட் - 1 டேபிள் ஸ்பூன்
* உப்பு - சுவைக்கேற்ப
* மிளகாய் தூள் - 1 டீஸ்பூன்
* மல்லித் தூள் - 1 டேபிள் ஸ்பூன்
* மஞ்சள் தூள் - 1 டீஸ்பூன்
* கரம் மசாலா - 1 டீஸ்பூன்
* சீரகத் தூள் - 1/2 டீஸ்பூன்
* கேரட் - 1 (பொடியாக நறுக்கியது)
* பீன்ஸ் - 6 (பொடியாக நறுக்கியது)
* பட்டாணி - 1/2 கப்
* தண்ணீர் - 4 கப்
* கொத்தமல்லி - சிறிது (பொடியாக நறுக்கியது)

செய்முறை:

* முதலில் குக்கரை அடுப்பில் வைத்து, அதில் எண்ணெய் ஊற்றி சூடானதும், பட்டை, பிரியாணி இலை, சோம்பு சேர்த்து தாளிக்க வேண்டும்.
* பின் அதில் நறுக்கிய வெங்காயம், பச்சை மிளகாய் சேர்த்து பொன்னிறமாக வதக்க வேண்டும்.
* அடுத்து அதில் இஞ்சி பூண்டு பேஸ்ட் சேர்த்து, சுவைக்கேற்ப உப்பு தூவி 1 நிமிடம் வதக்க வேண்டும்.
* பின்பு அதில் மிளகாய் தூள், மல்லித் தூள், மஞ்சள் தூள், கரம் மசாலா, சீரகத் தூள் சேர்த்து 10 நொடிகள் வதக்க வேண்டும்.
* பிறகு அதில் நறுக்கிய கேரட், பீன்ஸ், பட்டாணி ஆகியவற்றை சேர்த்து 5 நிமிடம் அல்லது பச்சை வாசனை போக வதக்க வேண்டும்.
* அதன் பின் அதில் கோதுமை ரவையை சேர்த்து நன்கு கிளறி விட வேண்டும்.
* பின்னர் அதில் 4 கப் நீரை ஊற்றி கிளறி, குறைவான தீயில் வைத்து, குக்கரை மூடி 1 விசிவ் விட்டு இறக்க வேண்டும்.
* விசில் போனதும் குக்கரைத் திறந்து, அதில் கொத்தமல்லியைத் தூவி கிளறினால், சுவையான கோதுமை ரவா பிரியாணி தயார்.