வீட்டிலேயே சுவையான பாதாம் கீர் செய்வது எப்படி தெரியுமா?

உங்களுக்கு பாதாம் கீர் ரொம்ப பிடிக்குமா? அதை எப்போதும் கடைகளில் தான் வாங்கி சாப்பிட்டிருக்கிறீர்களா? அப்படியானால் இனிமேல் அதை கடைகளில் வாங்கி சாப்பிடாமல், வீட்டிலேயே செய்து சாப்பிடுங்கள். ஏனெனில் பாதாம் கீரை வீட்டிலேயே எளிய முறையில் செய்யலாம். குறிப்பாக வீட்டில் பாதாம் கீரை கடைகளில் என்றால் அளவாக தான் சாப்பிட முடியும். ஆனால் வீட்டில் செய்தால் எவ்வளவு வேண்டுமானாலும் சாப்பிடலாம். மேலும் பள்ளி முடிந்து வீட்டிற்கு பசியுடன் வரும் குழந்தைகளுக்கு பாதாம் கீர் கொடுத்தால், அவர்களின் பசி அடங்குவதோடு, உடலுக்கு சத்தானதும் கூட.

உங்களுக்கு வீட்டிலேயே சுவையான பாதாம் கீர் எப்படி செய்வதென்று தெரிந்து கொள்ள வேண்டுமா? கீழே பாதாம் கீர் ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

* பால் - 1 லிட்டர்

* துருவிய பாதாம் - 1/2 கப்

* சர்க்கரை - 1/2 கப்

* குங்குமப்பூ - 1/2 டீஸ்பூன்

* ஏலக்காய் பொடி - 1/4 டீஸ்பூன்

* ஜாதிக்காய் பொடி - 1 சிட்டிகை

செய்முறை:

* முதலில் பாதாமை சுடுநீரில் 1 மணிநேரம் ஊற வைக்க வேண்டும்.

* ஒரு மணிநேரம் கழித்து, பாதாமின் தோலை நீக்கிவிட்டு தனியாக வைத்துக் கொள்ள வேண்டும்.

* பின்பு பாலை ஒரு பாத்திரத்தில் ஊற்றி கொதிக்க வைக்க வேண்டும். பால் கொதிக்க ஆரம்பித்ததும், தீயை குறைத்து 2 நிமிடம் கொதிக்க வைக்க வேண்டும்.

* பின் 1/4 கப் பாலை தனியாக எடுத்து வைத்துக் கொள்ள வேண்டும்.

* பாலானது சற்று குளிர்ந்ததும், மிக்சர் ஜாரில் பாதாம் பருப்பு மற்றும் பாலை ஊற்றி, நன்கு அரைத்து தனியாக வைத்துக் கொள்ள வேண்டும்.

* பின் கொதித்துக் கொண்டிருக்கும் பாலில், குங்குமப்பூவை சேர்த்து 5 நிமிடம் மீண்டும் குறைவான தீயில் வைத்து கொதிக்க வைக்க வேண்டும்.

* பாலின் நிறம் வெளிரிய மஞ்சள் நிறத்தில் மாறியதும், அதில் சர்க்கரை மற்றும் ஏலக்காய் பொடி சேர்த்து கிளற வேண்டும்.

* பாலானது சற்று கெட்டியானதும், அதில் அரைத்து வைத்துள்ள பாதாம் பேஸ்ட்டை சேர்த்து நன்கு கட்டிகளின்றி கிளறி விட்டு 2 நிமிடம் கொதிக்க வைக்க வேண்டும். (பாதாம் பேஸ்ட் சேர்ந்ததும் 2 நிமிடத்திற்கு மேல் பாலை கொதிக்க வைக்க வேண்டாம்.)

* பின் அதில் ஜாதிக்காய் பொடி சேர்த்து கிளறி இறக்கி, குறைந்தது 1 மணிநேரம் குளிர வைத்து பரிமாறினால், பாதாம் கீர் தயார்.

Image Courtesy: sharmispassions