ஜப்பானில் 90 லட்சம் வீடுகளில் ஒருவர் கூட வசிக்காத வினோதம் - ஆடம்பர வீடுகள் 'பேய் வீடுகளாக' மாற காரணம் என்ன?

உலகம் முழுவதும் பல மர்மமான பகுதிகளும், இடங்களும் உள்ளன. அந்த வகையில் ஜப்பானில் ஒரு அசாதாரணமான சூழல் உருவாகி வருகிறது. ஒரு குறிப்பிட்ட பகுதியில் இலட்சக்கணக்கான வீடுகள் யாரும் வசிக்காமல் கைவிடப்பட்டுள்ளன. இந்த வீடுகளின் கதவுகளும், ஜன்னல்களும் பல ஆண்டுகளாக மூடியே உள்ளது, சரியான பராமரிப்பு இல்லாததால் இங்குள்ள செடிகள் காடுகள் போல வளர்ந்து நிற்கின்றன.

ஜப்பானில் சுமார் 90 லட்சம் காலி வீடுகள் இருப்பதாகக் கூறப்படுகிறது, இந்த எண்ணிக்கை தொடர்ந்து அதிகரித்து வருகிறது. ஒரு வளர்ந்த நாட்டில் இந்த சூழல் நிலவுவது ஆச்சரியமாகவும், நம்பமுடியாததாகவும் தோன்றுகிறது. ஆனாலும், இந்த எண்கள் அரசால் அதிகாரப்பூர்வமாக அறிவிக்கப்பட்டது. இந்த அசாதாரண சூழலுக்கு மக்கள்தொகைக் குறைவு, வாரிசுரிமைப் பிரச்சினைகள், கிராமப்புறங்களில் மக்கள்தொகைக் குறைவு, மாறிவரும் நகர்ப்புற இடப்பெயர்வு முறைகள், மற்றும் பயன்படுத்தப்படாத சொத்துக்களைப் பராமரிப்பதன் பொருளாதாரச் சுமை என பல காரணங்கள் கூறப்படுகிறது.

ஜப்பானில் கைவிடப்பட்ட வீடுகளின் எண்ணிக்கை அதிகரிக்கக் காரணம் என்ன?

ஜப்பான் முழுவதும் ஆள்நடமாட்டம் இல்லாத அல்லது காலியாக உள்ள வீடுகள் 'அகியா' என்று அழைக்கப்படுகின்றன. இவை தொலைதூரக் கிராமங்களில் மட்டுமல்லாமல், புறநகர்ப் பகுதிகளிலும், ஏன் பரபரப்பான நகரங்களுக்கு அருகிலும் கூட அதிக அளவில் காணப்படுகின்றன. 2023-ஆம் ஆண்டு நடத்தப்பட்ட வீட்டுவசதி குறித்த கணக்கெடுப்பின்படி, ஜப்பானில் உள்ள மொத்த வீடுகளில் சுமார் 13.8% வீடுகள் காலியாக உள்ளன. காலியாக உள்ள அந்த 90 லட்சம் வீடுகளில், ஒரு பெரிய பகுதி வாடகைக்கோ அல்லது விற்பனைக்கோ கிடைக்கக்கூடிய நிலையில் இல்லை. அவற்றில் சில வீடுகள்உரிமையாளர்களின் இரண்டாவது வீடுகளாகவோ அல்லது தற்காலிகப் பயன்பாட்டிற்கான இடங்களாகவோ உள்ளன.

இந்த வீடுகள் யாரும் வசிக்காத, வாடகைக்கு விடப்படாத மற்றும் எதிர்காலப் பயன்பாட்டிற்கான தெளிவான திட்டம் ஏதுமில்லாத வீடுகளாகும். வீடுகள் எப்போதும் புறக்கணிப்பால் மட்டும் கைவிடப்படுவதில்லை. சில சந்தர்ப்பங்களில், குடும்பங்கள் ஒரு வீட்டைப் பரம்பரைச் சொத்தாகப் பெற்ற பிறகு வேறு நகரத்திற்குக் குடியேறிவிடுகின்றன. காலப்போக்கில் அந்தச் சொத்து கவனிக்கப்படாமல் விடப்படுகிறது. சில சூழல்களில், தலைமுறைகள் மாறும்போது சொத்துரிமை யாருக்கு என்பது குறித்த தெளிவு இல்லாமல் போகிறது. இதனால், பயன்படுத்தப்படாத வீடுகளின் எண்ணிக்கை ஆண்டுதோறும் அதிகரித்து வருகிறது.

ஜப்பானின் கடுமையான வரி விதிமுறைகள்

இந்த கைவிடப்பட்ட வீடுகள் இடிக்கப்படாமல் இருப்பதற்கான முக்கிய காரணங்களில் ஒன்று ஜப்பானின் சொத்து வரி முறையாகும் குடியிருப்பு கட்டிடம் உள்ள நிலத்திற்கு வரி கணிசமாகக் குறைக்கப்படுகிறது. சில சமயங்களில், கட்டிடமற்ற காலி நிலத்துடன் ஒப்பிடுகையில், குடியிருப்பு நிலத்திற்கான வரி ஆறில் ஒரு பங்காகக் கூடக் குறைக்கப்படுகிறது. எனவே பயன்படுத்தப்படாத வீட்டை இடித்தால், நில வரி கடுமையாக உயரக்கூடும். ஆனால் கட்டிடம் பயன்பாட்டில் இல்லாவிட்டாலும் அல்லது சேதமடைந்திருந்தாலும், அதை அப்படியே வைத்திருந்தால் வரி குறைவாகவே இருக்கும். இதன் விளைவாக, பல உரிமையாளர்கள் தங்கள் சொத்துக்கள் இனி தேவைப்படாத நிலையிலும் அவற்றை இடிக்காமல் விட்டுவிடுகிறார்கள்.

வீட்டை இடிப்பதற்கான செலவும் அதிகமாக உள்ளது. ஒரு சாதாரண மர வீட்டை அகற்ற சுமார் 10 முதல் 15 லட்சம் யென் வரை செலவாகலாம். நடுத்தர குடும்பத்தினருக்கு இது மிகப்பெரிய தொகையாகும், குறிப்பாக அந்தச் சொத்தை மீண்டும் விற்பதன் மூலம் பெரிய வருமானம் கிடைக்காத சூழலில் இது பெரும் சுமையாக அமைகிறது. வரி விதிமுறைகள் மற்றும் இடிக்கும் செலவு ஆகிய இரண்டும் இணைந்து, எவ்வித நடவடிக்கையும் எடுக்காமல் வீட்டை அப்படியே விட்டுவிட வழிவகுக்கிறது.

வாரிசுரிமை சிக்கல்கள்

ஜப்பானில் கைவிடப்பட்ட வீடுகள் பிரச்சினைக்கு மற்றொரு முக்கிய காரணம் வாரிசுரிமை தொடர்பான சிக்கல்கள் ஆகும். ஒரு தலைமுறையிலிருந்து அடுத்த தலைமுறைக்குச் சொத்து கைமாறும்போது, ​​அதன் உரிமை பல வாரிசுகளுக்கு இடையே பிரிக்கப்படுகிறது. இதனால் வாரிசுகளிடையே கருத்து வேறுபாடுகள் ஏற்படுவதால் பெரும்பாலான வீடுகள் கைவிடப்படுகின்றன. சொத்தை விற்பனை செய்ய அனைத்து உரிமையாளர்களின் ஒப்புதலும் தேவைப்படுகிறது. கட்டிடத்தை இடிப்பதற்கும் ஒப்புதல் தேவைப்படுகிறது. உரிமை யாருக்கு என்பது தெளிவாக இல்லாதபோது, ​​அடிப்படைப் பராமரிப்புப் பணிகளைக் கூட மேற்கொள்வது சிக்கலாகிறது.

இந்த வீடுகளுக்கு எதிர்காலத்தில் என்ன நடக்கும்?

வீடுகள் நீண்ட காலத்திற்கு ஆளில்லாமல் இருக்கும்போது, ​​அவை கொஞ்சம் கொஞ்சமாக சிதையத் தொடங்குகின்றன. முறையான பராமரிப்பு இல்லாததால், கூரையில் கசிவு ஏற்படலாம், மரத்தாலான கட்டமைப்புகள் பலவீனமடையலாம் மற்றும் வீட்டிற்குள் பூஞ்சை வளரலாம். சில சமயங்களில், கட்டமைப்பு ரீதியாகப் பாதுகாப்பற்ற கட்டிடங்கள் அருகிலுள்ள சொத்துக்களையோ அல்லது பொது இடங்களையோ பாதிக்கக்கூடும். இந்த வீடுகள் பொருளாதார மற்றும் சுற்றுசூழல் சார்ந்த சிக்கல்களை ஒவ்வொரு ஆண்டும் அதிகரித்து வருகிறது.