தீபாவளி ஸ்பெஷல் கேரளா ஸ்டைல் மனோகரம் முறுக்கு ரெசிபி - ட்ரை பண்ணி பாருங்க - இனிப்பா சூப்பரா இருக்கும்

Diwali Special Sweet Murukku Recipe in Tamil: தீபாவளிக்கு அனைவரின் வீட்டிலும் செய்யப்படும் முக்கியமான பலகாரமென்றால் அது முறுக்குதான். காரசாரமான முறுக்கை செய்து விட்டால் வாரக்கணக்கில் வீட்டில் வைத்து சாப்பிடலாம். முறுக்கு எவ்வளவு சுவையானதோ அதேயளவிற்கு அதை செய்வதும் மிகவும் எளிதானது. முறுக்கு என்றாலே பொதுவாக மொறுமொறுவென்று காரமாக இருக்கும். இந்த தீபாவளிக்கு கொஞ்சம் வித்தியாமான முறுக்கை செய்ய ஆசைப்படுறீங்களா?

அப்படியென்றால் இந்த கேரளா ஸ்டைல் மனோகரம் முறுக்கை செய்து பாருங்கள், இந்த மனோகரம் முறுக்கு வழக்கமான முறுக்கு போல அல்லாமல் இனிப்பாக அதேசமயம் மிகவும் சுவையாக இருக்கும். குறிப்பாக இந்த முறுக்கு குழந்தைகளுக்கு மிகவும் பிடித்ததாக இருக்கும். வழக்கமான முறுக்கு சாப்பிட்டு போரடித்தவர்க்ளுக்கு இந்த மனோகரம் முறுக்கு புது சுவையைக் கொடுக்கும்.

உங்களுக்கு இந்த கேரளா ஸ்டைல் மனோகரம் முறுக்கை எப்படி செய்வதன்று தெரிந்து கொள்ளவேண்டுமா? கீழே கேரளா ஸ்டைல் மனோகரம் முறுக்கு ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

- அரிசி மாவு - 1 கப்
- உளுந்து மாவு - 1 ஸ்பூன்
- உப்பு - ½ ஸ்பூன்
- வெண்ணெய் - 2 ஸ்பூன்
- எண்ணெய் - பொரிக்க தேவையான அளவு
- அரிசி மாவு - 2 ஸ்பூன்

வெல்லப்பாகு செய்ய:

- 1 கப் துருவிய வெல்லம்
- ½ கப் தண்ணீர்
- ½ ஸ்பூன் சுக்குத் தூள்
- ¼ ஸ்பூன் ஏலக்காய் தூள்

செய்முறை:

- உளுந்தை வெறும் வாணலியில் வறுத்து ஆறவைத்து அரைத்துக் கொள்ளவும்.

- ஒரு பாத்திரத்தில் அரிசி மாவு, அரைத்த உளுந்து மாவு, உப்பு மற்றும் வெண்ணெய் ஆகியவற்றைச் சேர்த்து நன்றாகக் கலக்கவும்.

- பின்னர் சிறிது சிறிதாகத் தண்ணீர் தெளித்து, மென்மையான மாவாகப் பிசைந்துகொள்ளவும். இப்போது முறுக்கு செய்வதற்கான மாவு தயார்.

- ஒரு வாணலியில் எண்ணெய் ஊற்றிச் சூடாக்கவும். முறுக்கு அச்சில் மூன்று துளைகள் கொண்ட தட்டைப் பொருத்தவும். அதில் இரண்டு கைப்பிடி அளவு மாவை நிரப்பி, எண்ணெயில் பிழிந்து முறுக்குகளை பிழியவும்.

- அடுப்பை மிதமான தீயில் வைத்து, முறுக்கு மொறுமொறுப்பாகும் வரை பொரித்தெடுக்கவும். பொரித்த முறுக்குகளை எடுத்து, அதிகப்படியான எண்ணெய் வடிவதற்காக ஒரு காகிதத் துண்டின் மீது வைக்கவும்.

- அனைத்து மாவையும் இதேபோல முறுக்காக பொரித்தெடுக்கவும், அவற்றைச் சிறு துண்டுகளாக உடைத்துத் தனியே எடுத்து வைக்கவும்.

- ஒரு பாத்திரத்தில் நீரைச் சூடாக்கி, அதில் துருவிய வெல்லத்தைச் சேர்த்து முழுமையாகக் கரைத்துக்கொள்ளவும். வெல்லக் கரைசலில் உள்ள அசுத்தங்களை நீக்க அதை வடிகட்டிக்கொள்ளவும்.

- வடிகட்டிய வெல்லக் கரைசலை மீண்டும் சூடாக்கி, கொதிக்க வைக்கவும். அதனுடன் சுக்குத் தூள் மற்றும் ஏலக்காய் தூள் சேர்த்து நன்கு கலக்கவும்.

- மென்மையான உருண்டை பதம் வரும் வரை கொதிக்க விடவும். ஒரு கிண்ணத்தில் உள்ள தண்ணீரில் சிறிது வெல்லக் கரைசலைச் சொட்டு விட்டால், அதை வைத்து ஒரு மென்மையான உருண்டையை உருவாக்க முடிய வேண்டும். அதுதான் சரியான பதம்.

- பின்னர் உடைத்து வைத்துள்ள முறுக்கில் வெல்லப்பாகை ஊற்றி நன்றாகக் கிளறவும். வெல்லப்பாகு பூசப்பட்ட தேன்குழல் கலவை 5 நிமிடங்கள் அப்படியே ஆறட்டும். அதன் பிறகு, உங்கள் உள்ளங்கைகளிலும் விரல்களிலும் அரிசி மாவைத் தடவிக்கொண்டு, இந்தக் கலவையிலிருந்து எலுமிச்சை அளவு உருண்டைகளை உருட்டவும்.

- முதலில் தோராயமாக உருண்டைகளைச் செய்துவிட்டு, பிறகு அவற்றைச் சீரான வடிவம் கொண்ட உருண்டைகளாக மாற்றிக்கொள்ளவும். மனோகரம் முழுமையாக ஆறிவிடுவதற்கு முன்பே உருண்டைகளைச் செய்துவிட வேண்டும்; இல்லையெனில், உருண்டைகளை உருவாக்க முடியாது.

- அவ்வளவுதான் சூப்பரான கேரளா ஸ்டைல் மனோகரம் முறுக்கு ரெடி!