400 மில்லியன் ஆண்டுகளுக்கு முன் உலகில் தோன்றிய முதல் ஆறு எது தெரியுமா? டைனோசர்களை விட இது பழைய நதியாம்

நம் உலகில் உயிரினங்களின் வளர்ச்சியில் ஏற்பட்ட மாற்றங்களுக்கும், புதிய உயிரினங்களின் தோற்றங்களுக்கும் ஆதாரமாக இருந்தது நீர் நிலைகள்தான். அதனால்தான் 'நீரின்றி அமையாது உலகு' என்று நம் முன்னோர்கள் கூறியுள்ளார்கள். தற்போது உலகில் 6 லட்சத்திற்கும் மேற்பட்ட நீர் நிலைகள் உள்ளன. இதில் பல ஆறுகள் இப்போது அழியும் நிலையிலிருந்தாலும், சில தனித்துவமான ஆறுகள் உள்ளன. ஆஸ்திரேலியாவின் வறண்ட உட்புறப் பகுதியில், வழக்கமான ஆறுகளின் தன்மைக்கு முற்றிலும் எதிராக உள்ள ஒரு ஆறு உள்ளது.

ஆண்டின் பெரும்பகுதியில், இதில் நீர் ஏதுமின்றி வெறும் மணலும் ஆங்காங்கே நீர் உள்ளது. இருப்பினும், புவியியலாளர்களின் கூற்றுப்படி, இது உலகின் மிகச் சிறப்பான ஆறுகளில் ஒன்றாகும். ஆஸ்திரேலியாவின் 'வடக்கு மண்டலப்' பகுதியில் அமைந்துள்ள 'ஃபின்கே' (Finke) ஆறு, 300 முதல் 400 மில்லியன் ஆண்டுகள் பழமையானது என்றும், இதுவே உலகின் மிகப் பழமையான ஆறு என்றும் கருதப்படுகிறது.

உலகில் முதலில் தோன்றிய மிகப் பழமையான ஆறு எதுவென்று விஞ்ஞானிகளிடையே பல கருத்து வேறுபாடுகள் இருந்தாலும், ஃபின்கே ஆற்றின் புவியியல் வரலாறு, இது இன்றும் இயங்கி வரும் மிகப் பழமையான ஆற்று அமைப்புகளில் ஒன்றாக திகழ்கிறது.

ஃபின்கே ஆறு எங்கு பாய்கிறது?

ஆலிஸ் ஸ்பிரிங்ஸ் நகருக்கு மேற்கே உள்ள மெக்டோனல் மலைத்தொடர்களில் உற்பத்தியாகும் ஃபின்க் ஆறு, மத்திய ஆஸ்திரேலியா வழியாகத் தென்கிழக்கு திசையில் பாய்ந்து, இறுதியாக சிம்ப்சன் பாலைவனத்தின் மணற்பரப்பில் மறைந்துவிடுகிறது. ஆண்டு முழுவதும் வற்றாமல் ஓடும் பெரும்பாலான சாதாரண ஆறுகளைப் போலன்றி, ஃபின்க் ஆறு மழை பெய்யும்போது மட்டுமே பாயும் ஒரு தற்காலிக ஆறாகும். நீண்ட காலத்திற்கு வறண்ட நிலையில் காணப்பட்டாலும், மத்திய ஆஸ்திரேலியாவின் மிக முக்கியமான இயற்கை அம்சங்களில் ஒன்றாக இந்த ஆறு திகழ்கிறது.

டைனோசர்களை விடவும் பழமையான நதி

சுமார் 300 முதல் 400 மில்லியன் ஆண்டுகளுக்கு முன்பே பாயத் தொடங்கிய இந்த நதி, ஏறக்குறைய 230 மில்லியன் ஆண்டுகளுக்கு முன்பு டைனோசர்கள் தோன்றுவதற்கு வெகு காலத்திற்கு முன்பிருந்தே செயல்பாட்டில் இருந்து வந்துள்ளது. அண்டார்டிகா, ஆப்பிரிக்கா மற்றும் இந்தியா ஆகியவற்றுடன் இணைந்து ஆஸ்திரேலியா 'கோண்ட்வானா' எனும் பழங்கால கண்டத்தின் ஒரு பகுதியாக இருந்தபோதே, ஃபின்கே நதி தனது பாதையை உருவாக்கத் தொடங்கியிருந்தது. பல நூறு மில்லியன் ஆண்டுகளாக, கண்டங்களின் நகர்வு, காலநிலை மாற்றங்கள், பெருமளவிலான உயிரின அழிவுகள் மற்றும் மத்திய ஆஸ்திரேலியா படிப்படியாக வறண்டுபோன சூழல் ஆகிய அனைத்தையும் கடந்து இந்த நதி நிலைத்திருக்கிறது.

கலாச்சார முக்கியத்துவம்

ஃபின்கே ஆறு புவியியல்ரீதியாகப் பழமையானது மட்டுமல்ல, அது பாயும் நிலத்தின் பாரம்பரியப் பாதுகாவலர்களான மேற்கு அரெர்ன்டே மக்களுக்கும் ஆழ்ந்த முக்கியத்துவம் வாய்ந்தது. உள்ளூர் மக்களால் லராபின்டா என்று அழைக்கப்படும் இந்த ஆறு, பழங்குடியினரின் கனவுக் கதைகள், பாடல் வரிகள் மற்றும் கலாச்சார மரபுகளில் முக்கிய இடம் வகிக்கிறது. பல்லாயிரக்கணக்கான ஆண்டுகளாக, பழங்குடி சமூகங்கள் உயிர்வாழ்வதற்கும், அவர்கள் பின்பற்றி வரும் சடங்குகளுக்கும் ஆற்றின் நீர்நிலைகளையே நம்பி வாழ்ந்து வந்துள்ளனர். இது பூமியின் ஆழமான கடந்த காலத்திற்கும் இன்றைய கலாச்சாரத்திற்கும் இடையே ஒரு உயிருள்ள இணைப்பாக விளங்குகிறது.

இதுதான் உண்மையிலேயே உலகின் மிகப் பழமையான நதியா?

ஃபின்கே ஆறு 300 முதல் 400 மில்லியன் ஆண்டுகள் பழமையானது என்று கூறுவது கட்டுக்கதைகள் அல்ல. அது புவியியல் உண்மைகளை அடிப்படையாகக் கொண்டது. சுமார் 300 மில்லியன் ஆண்டுகளுக்கு முன்பு மலைகள் உருவான ஒரு முக்கிய காலகட்டத்தில் மேக்டோனல் மலைத்தொடர்கள் மேலெழுவதற்கு முன்பே ஃபின்கே ஆற்றின் பாதை அமைந்திருந்ததாகப் புவியியல் சான்றுகள் தெரிவிக்கின்றன. பொதுவாக, மலைத்தொடர்கள் உருவான பின்னரே ஆறுகள் தோன்றுகின்றன. அவை புதிதாக உருவான சரிவுகளின் வழியே கீழ்நோக்கிப் பாய்கின்றன. ஆனால் ஃபின்கே ஆறு இதற்கு மாறானதாகத் தோன்றுகிறது.

இது ஒரு 'முன்னேற்பாட்டு ஆறு' என்று கருதப்படுகிறது. அதாவது, மலைகள் உருவாவதற்கு முன்பே ஒப்பீட்டளவில் சமமான நிலப்பரப்பில் இந்த ஆறு பாய்ந்து கொண்டிருந்தது. பல மில்லியன் ஆண்டுகளுக்குப் பிறகு நிலப்பகுதி மெதுவாக மேலெழுந்தபோது, ​​மலைகளைச் சுற்றிச் செல்வதற்குப் பதிலாக, இந்த ஆறு தனது பாதையை மாற்றிக்கொள்ளாமல் அப்படியே தக்கவைத்துக்கொண்டது. அது மேலெழும் பாறைகளை ஊடுருவி ஆழமான பள்ளத்தாக்குகளை உருவாக்கியது. மலைகளைச் சுற்றிச் செல்லாமல் மேக்டோனல் மலைத்தொடர்களுக்கு ஊடாகவே ஃபின்கே ஆறு பாய்வதற்கு இந்தப் செயல்முறையே காரணமாகும்.